ఏపీ అసెంబ్లీ ఎన్నికలకు సమయం ఆసన్నమవుతోంది. 2024లో జరగబోయే ఎన్నికల్లో ఈసారి నారా చంద్రబాబునాయుడు ముఖ్యమత్రి అవుతారా? అసలు ఆయన జాతకం ఏం చెబుతోంది? అనే విషయాలను చూద్దాం. 1950లో ఏప్రిల్ 20న ఆయన చిత్తూరు జిల్లాలోని నారావారి పల్లెలో జన్మించారు. ఆయన జన్మించింది గురు హోరాతో ప్రారంభమయ్యే గురువారం రోజున. రవి నక్షత్రమైన కృత్తిక ఆయన జన్మ నక్షత్రం. జాతక కుండలిలో గ్రహస్థితులను ఓసారి పరిశీలిద్దాం.
* కుంభంలో గురు – శుక్రులు, మీనంలో రాహువు, మేషంలో రవి – బుధులు, వృషభంలో చంద్రుడు, సింహంలో శని – వక్ర కుజులు, కన్యలో కేతువు ఉన్నారు. అఖండమైన యోగాన్ని ఇచ్చే జాతకం ఆయనది. ఎందుకంటే తన ఉచ్ఛ స్థానమైన మేషంలో రవి, తన ఉచ్ఛ స్థానమైన వృషభంలో చంద్రుడు ఉన్నారు. పైగా రవితో బుధుడు ఉండటంతో బుధాదిత్య యోగం, చంద్ర, గురుల 1-4-7-10 సంబంధంతో గజకేసరి యోగం ఏర్పడ్డాయి. ఈ రెండు ప్రధానమైన బలమైన యోగాలు ఆయన జీవితాన్ని నడిపిస్తున్నాయి. ఆయనకు అత్యున్నమైన రాజకీయ పదవులను ఇస్తున్నవి ఈ రెండు ప్రధానమైన యోగాలే.
* ఈయోగాలు ఎలా పనిచేశాయో చూద్దాం. 1985 నుంచి 2001 వరకు ఈ గజకేసరి యోగం పనిచేసింది. పైగా గురు హోరాతో కూడిన గురువారం ఆయన జన్మించారు కాబట్టి ఆయనది గురు బలం ఉన్న జాతకంగా చెప్పాలి. 1998 నుంచి ఏలినాటి శని ప్రారంభమైంది. ఏలినాటి శని, శని మహాదశ ఆయనను కొంత ఇబ్బంది పెట్టాయి. 2001లో ప్రారంభమైన శని మహాదశ 2020 వరకు కొనసాగింది. 2019లో ఆయన పార్టీ ఓటమి పాలవడానికి కొంత శని మహాదశ కూడా కారణం అని చెప్పవచ్చు.
* ప్రస్తుతం చంద్రాబాబు నాయుడుకు బుధ మహాదశ నడుస్తోంది. 2020 నుంచి ఈ బుధ మహాదశ ప్రారంభమైంది. ఇది 2037 వరకు కొనసాగుతుంది. ఆయన జాతకంలో బుధాదిత్య యోగం కూడా ఉంది కాబట్టి రాజకీయంగా ఉన్నత పదవులను అలంకరించడానికి ఈ దశ యోగిస్తుంది. దీనికి గోచారంలో గ్రహస్థితులను కూడా పరిశీలించాల్సి ఉంటుంది. అది ఎలా ఉందో చూద్దాం.
రాజకీయ యోగానికి కారణం ఏమిటి?
* ఏ వ్యక్తి జాతకంలో అయినా రాజకీయ పదవులను అలంకరించాలంటే కర్మ కారకుడైన శనికి రవి గ్రహంతోగానీ, రవి రాశులతో గానీ సంబంధం కలిగి ఉండాలి. చంద్రబాబు నాయుడి గారి జాతకంలో ఈ కలయిక బలంగా ఉంది. జ్యోతిషంలో 1-5-9 స్థానాలు చాలా కీలకం. 12 రాశులున్న జాతక చక్రాన్ని నాలుగు దిక్కులకు విభజిస్తే ఈ స్థానాలు వస్తాయి. ఆయన జన్మ జాతక చక్రంలో రవి తూర్పు దిక్కు రాశి అయిన మేషంలో ఉంది. అక్కడి నుంచి ఐదో దిక్కు రాశి అయిన సింహం కూడా తూర్పు దిక్కుకు చెందినదే. పైగా రవి సొంత ఇల్లయిన సింహంలో శని ఉండటం, ఆ శనికి రవితో కనెక్షన్ ఉండటమే ఆయన అత్యున్నత రాజకీయ పదవులను అలంకరించడానికి కారణంగా భృగు నాడీ జాతక విధానంలో పరిశీలించి చెప్పవచ్చు.
చంద్రబాబు నాయుడి గోచారం స్థితి
* గోచార పరంగా చూస్తే రాబోయే మూడేళ్లు ఆయనకు తిరుగులేదని చెప్పాల్సి ఉంటుంది. ఎందుకంటే ఆయన జన్మ జాతక చక్రంలో గురువు కుంభ రాశిలో ఉన్నాడు. ఆ గురువుకు గోచార శనితో సంబంధం వస్తోంది. ప్రస్తుతం శని గోచారం కుంభ రాశి మీదుగా జరుగుతోంది. ప్రస్తుతం శని వక్రించి మకరంలోకి మళ్లీ వెళ్లినా వచ్చే జనవరి నుంచి కుంభ గోచారమే ఉంటుంది. అంటే కుంభ రాశిలో ఉన్న గురువు మీదకు గోచార శని వచ్చి రెండున్నరేళ్లు అక్కడే ఉంటాడు. గోచార గురువు 2023 ఏప్రీల్ 22న మేష రాశిలోకి ప్రవేశిస్తాడు. అక్కడి నుంచి 2024 ఏప్రిల్ నెలాఖరు వరకు మేషంలోనే ఉండి కర్మ కారకుడైన శనికి బలం కలిగిస్తున్నాడు.
* ఈ గురువు 5వ దృష్టితో సింహరాశిలో ఉన్న శనితో కలయిక ఏర్పడుతుంది. అందువల్ల 2024లో జరిగే ఎన్నికల్లో తెలుగు దేశం పార్టీ అత్యధిక సీట్లను గెలుచుకుని చంద్రబాబు నాయుడు గారు మళ్లీ ముఖ్యమంత్రి పీఠాన్ని అధిష్ఠించడం ఖాయంగా కనిపిస్తోంది. 2019 ఏప్రిల్ లో ఎన్నికలు జరిగినప్పుడు చంద్రబాబుకు ఏలినాటి శనితో పాటు అష్టమ శని కూడా ఉంది. పైగా సింహరాశిలోని శనికి ధనుస్సు రాశిలోని గోచార కేతువు ఆటంకం కలిగించాడు.
* గోచార రాహువు కూడా మిధున రాశిలో ఉండి 9 దృష్టితో కుంభ రాశిలోని జీవ కారకుడైన గురువుకు ఇబ్బంది కలిగించాడు. అందువల్ల ఆ ఎన్నికల్లో తెలుగుదేశం పార్టీ అధికారంలోకి రాలేదు. 2020తోనే ఆయనకు శని మహాదశ వెళ్లిపోయింది. 2037 వరకు బుధ మహాదశ ఉండటం, పైగా ఉచ్ఛ రవితో బుధాదిత్య యోగం ఉండటం వల్ల ఆయన నిరాటంకంగా అప్పటి వరకు పరిపాలన కొనసాగించే అవకాశాలు పుష్కలంగా కనిపిస్తున్నాయి. 2029లో ఎన్నికలు జరిగినప్పుడు కూడా మళ్లీ ఆయనే అధికార పీఠాన్ని చేపట్టే అవకాశం ఉంది.
