స్వల్ప ఘటనలు మినహా ఏపీలో పరిషత్ ఎన్నికలు ప్రశాంతంగా ముగిశాయి. ప్రధాన ప్రతిపక్షం టీడీపీ ఎన్నికలు బహిష్కరించడంతో పోలింగ్ శాతం భారీగా తగ్గింది. విజయనగరం, శ్రీకాకుళం, విశాఖ జిల్లాల్లో 61 శాతం, పశ్చిమగోదావరి, తూర్పుగోదావరి జిల్లాలో 54 శాతం, ప్రకాశం, గుంటూరు జిల్లాల్లో 44 శాతం, నెల్లూరు జిల్లాలో47 శాతం నమోదైంది. కడపలో కేవలం 49 శాతం పోలింగ్ మాత్రమే నమోదైంది. హైకోర్టు డివిజన్ బెంచ్ తీర్పు మేరకు ఓట్ల లెక్కింపు ఎప్పుడనేది త్వరలో తేలనుంది. పలు జిల్లాల్లో స్వల్ప వివాదాలు తలెత్తినా మొత్తం మీద ఎన్నికలు ప్రశాంతంగానే ముగిశాయని చెప్పవచ్చు.
స్ట్రాంగ్ రూంలకు బ్యాలెట్ బాక్సులు
ఏపీలో మొత్తం 515 జడ్పీటీసీ, 7 వేలకుపైగా ఎంపీటీసీలకు ఎన్నికలు నిర్వహించారు. మొత్తం 2 కోట్ల 69 లక్షల మంది ఓటు హక్కు వినియోగించుకోవాల్సి ఉండగా 3గంటల వరకు కేవలం 47 శాతం మాత్రమే పోలింగ్ నమోదైందని అధికారులు వెల్లడించారు. గుంటూరు జిల్లా కొలకలూరులో స్వతంత్ర అభ్యర్థి వైసీపీ నేతలపై దాడికి దిగాడు. దీంతో పోలీసులు ఇరు వర్గాలను చెదరగొట్టారు. క్రోసూరు మండలం ఉయ్యందన గ్రామంలో అధికారులే ఫ్యాను గుర్తుపై స్వస్థిక్ ముద్రలు వేశారని గ్రామస్థులు ఆందోళనకు దిగారు. మొత్తం మీద ఏపీలో పరిషత్ ఎన్నికలు ప్రశాంతంగా ముగిశాయి. బ్యాలెట్ బాక్సులను స్ట్రాంగ్ రూంలకు తరలిస్తున్నారు.
మధ్యాహ్నానికే వెలవెలబోయిన పోలింగ్ కేంద్రాలు
ప్రధాన ప్రతిపక్షం టీడీపీ ఎన్నికలు బహిష్కరించడంతో ఓటింగ్‌లో పాల్గొనేందుకు ప్రజలు పెద్దగా ఆసక్తి చూపలేదు. మధ్యాహ్నానికి కేవలం 41 శాతం మాత్రమే పోలింగ్ నమోదైంది. ఆ తరవాత 3గంటలకు 47 శాతానికి పెరిగింది. విజయనగరం జిల్లాల్లో అత్యధికంగా 61 శాతం నమోదైంది. అత్యల్పంగా గుంటూరు జిల్లాలో కేవలం 37 శాతం మాత్రమే నమోదైంది. ఎండవేడి పెరగడం, టీడీపీ ఎన్నికలు బహిష్కరించడం వల్ల పోలింగ్ శాతం తగ్గినట్టు తెలుస్తోంది. విజయనగరం జిల్లాలో ఒక కేంద్రంలో రీపోలింగ్ నిర్వహించనున్నారు. మరికొన్ని ప్రాంతాల్లో వచ్చిన ఫిర్యాదులను పరిశీలించి ఉన్నతాధికారులు రీ పోలింగ్ పై తుది నిర్ణయం ప్రకటించనున్నారు.
Must Read ;- వైసీపీ ఎమ్మెల్యేకు అడుగడుగునా అవమానం : మా గ్రామాలకు రావొద్దు!
