Megastar Chiranjeevi About Film Journalists :
జర్నలిస్టులు తమ కుటుంబంలో భాగమే అంటున్నారు మెగాస్టార్ చిరంజీవి. 50 ఏళ్ల చరిత్ర ఉన్న ఫిలిం క్రిటిక్స్ అసోసియేషన్ కొత్త కార్యవర్గం ఏర్పాటైన సందర్భంగా ఆయన ఈ కొత్త కమిటీని ‘ఆచార్య’ సెట్ కు ఆహ్వానించారు. హైదరాబాద్ లోని కోకాపేటలో ‘ఆచార్య’ సెట్ వేశారు. ఆయన ఎంతో బిజీగా ఉన్నా ఫిలిం క్రిటిక్స్ అసోసియేషన్ నూతన కార్యవర్గానికి ఆయన ఎంతో సమయాన్ని కేటాయించారు. సీనియర్ జర్నలిస్ట్ ప్రభు అధ్యక్షుడిగా, పర్వతనేని రాంబాబు ప్రధాన కార్యదర్శిగా ఉన్న కొత్త కమిటీని సెట్ కు ఆహ్వానించారు.
ఈ కమిటీ ఏర్పాటైన వెంటనే కమిటీ అందరికీ మెగాస్టార్ చిరంజీవి అభినందనలు తెలిపిన విషయం తెలిసిందే. కొత్త కమిటీ అధ్యక్ష, కార్యదర్శులకు చిరంజీవి పుష్ఫగుచ్ఛం ఇచ్చి అభినందించారు. అసోసియేషన్ మాజీ అధ్యక్షుడు సురేష్ కొండేటి కూడా ఈ కర్యక్రమంలో పాల్గొన్నారు. అసోసియేషన్ ఎలాంటి కార్యక్రమాలు చేయాలనుకుంటోందని అడిగి తెలుసుకున్నారుచిరంజీవి. గత ఏడాది కరోనా సమయంలో సీసీసీ ద్వారా చేసిన సహాయ కార్యక్రమాల్లో తమకు కూడా చోటు కల్పించినందుకు ఫిలిం క్రిటిక్స్ అసోసియేషన్ మెగాస్టార్ చిరంజీవికి కృతజ్ఞతలు తెలిపింది.
ఈ సందర్భంగా మెగాస్టార్ చిరంజీవి మాట్లాడుతూ.. ‘సినిమా జర్నలిస్టులతో నాకు మొదటినుంచి విడదీయరాని అనుబంధం ఉంది. ఈ అసోసియేషన్ కు ఎలాంటి సహకారం కావాలన్నా నా వంతు చేస్తా. ఇప్పుడున్న పరిస్థితుల్లో హెల్త్ ఇన్సూరెన్స్ అందరికీ చాలా అవసరం. సభ్యులందరికీ అసోసియేషన్ ఈ సదుపాయం కల్పించాలి. గృహవసతి, పెన్షన్ లాంటి సదుపాయల గురించి కూడా ఆలోచించి ముందడుగు వేయండి. అసోసియేషన్ నిర్వహించబోయే గోల్డెన్ జూబ్లీ ఉత్సవాలకు నా వంతు సహకారం ఉంటుంది. మీకు ఏ సహాయం కావాలన్నా అడగండి. మీరు నిర్వహించే కార్యక్రమాలకు ఎప్పుడూ అందుబాటులో ఉంటా’ అన్నారు.
కమిటీలోని ప్రతి ఒక్కరినీ పేరు పేరునా పలకరించారు. జర్నలిస్ట్ ల కోసం ఎంతో సమయాన్ని కేటాయించి ఆప్యాయంగా మాట్లాడిన మెగాస్టార్ చిరంజీవికి అధ్యక్షుడు ప్రభు ప్రధాన కార్యదర్శి పర్వతనేని రాంబాబు, ఇతర కార్యవర్గ సభ్యులు కృతజ్ఞతలు తెలిపారు. ఉపాధ్యక్షులు ఓగిరాల మోహనరావు, నాగేంద్ర కుమార్, ఎల్.రాంబాబు వర్మ, కోశాధికారి హేమసుందర్ పామర్తి, కార్యవర్గ సభ్యులు సురేష్ కవిరాయని, ధీరజ్ అప్పాజీ, టి. మల్లికార్జున్, జిల్లా సురేష్, అబ్దుల్, వీర్ని శ్రీనివాస్, కుమార్ వంగాల, సి.హెచ్. నవీన్, గిరిధర్ చిరంజీవిని కలిసిన వారిలో ఉన్నారు. దర్శకుడు కొరటాల శివ, నిర్మాత అల్లు అరవింద్ లు కూడా ఫిలిం క్రిటిక్స్ అసోసియేషన్ కొత్త కమిటీకి అభినందనలు తెలిపారు.
Must Read ;- చిరంజీవి ఊరికి మాటిచ్చి 40 ఏళ్లు
