పుకార్లకు తెరపడింది. రామాయణం కథాంశంగా ఇప్పటిదాకా చరిత్రలో ఎరగని భారీ బడ్జెట్ తో రూపొందబోతున్న ‘ఆదిపురుష్’ చిత్రంలో ప్రతినాయకుడు ఎవరో తెలిసిపోయింది. దశకంఠుడు, లంకాధీశుడైన రావణ బ్రహ్మ పాత్రలో సయీఫ్ ఆలీ ఖాన్ పటౌడీ నటించబోతున్నారు. ఈ విషయాన్ని చిత్ర బృందం అధికారికంగా ప్రకటించింది.
‘‘7000 ఏళ్ల కిందట జీవించిన ప్రపంచంలోనే అత్యంత తెలివైన అసురుడు’’ అంటూ రావణుడి గురించి దర్శకుడు ఓం రౌత్ తన ట్విటర్ లో పేర్కొన్నారు. లంకేష్ గా సైఫ్ ఆలీఖాన్ నటిస్తున్నట్టు పోస్టర్ డిజైన్ విడుదల చేశారు.
సాధారణంగా విలన్ గొప్పతనం బట్టే హీరో ఎలివేట్ అవుతాడు. ఇది కాల్పనిక, సృజనాత్మక ఫార్మాట్లలో తిరుగులేని సిద్ధాంతం. రాముడైనా, పాండవులైనా పురాణాల్లో కూడా అంతే! మన సినిమాల్లో కూడా అందుకే విలన్ పాత్రకు చాలా ప్రాధాన్యం ఉంటుంది. ఆచితూచి విలన్ ను ఎంచుకుంటూ ఉంటారు. ఆదిపురుష్ చిత్రానికి కూడా ప్రభాస్ రాముడు అయితే.. అంతకంటె దీటుగా ఉండే రావణుడి పాత్రలో ఎవరు నటించాలి?
దీనిపై చాలా తర్జన భర్జనలే జరిగాయి. పాన్ ఇండియా సినిమా కాబట్టి.. ఆదిపురుష్ లో ఉండే రెండో ప్రధానపాత్రకు బాలీవుడ్ నటుడే ఉంటారని అంతా అనుకున్నారు. హృతిక్ రోషన్ పేరు ఎక్కువగా వినిపించింది. కండలు తిరిగిన ఫిట్ నెస్, దార్ఢ్యంతో హృతిక్ రావణుడిగా మెప్పించగలరనే అంతా అనుకున్నారు. ప్రభాస్, హృతిక్ కాంబినేషన్లో సినిమా ఉంటుందని అంతకుముందునుంచి వచ్చిన పుకార్లు కూడా ఇందుకు కారణం అయ్యాయి. మధ్యలో మోహన్ లాల్ పేరు కూడా వినిపించింది. ఆయన రావణుడి గెటప్ లో స్టిల్స్ ను విడుదల చేయడంతో.. బహుశా ఆదిపురుష్ కోసం టీమ్ సంప్రదించారేమో అనే పుకార్లు వచ్చాయి.
తాజాగా ఈ పుకార్లకు తెరదించేస్తూ చిత్రబృదం సైఫ్ పేరును ప్రకటించింది. ఒకప్పట్లో లవర్ బోయ్ ఇమేజ్ తో ఉన్నప్పటికీ.. సైఫ్ ఆలీఖాన్ కూడా.. ఫిట్నెస్, దేహదార్ఢ్యం విషయంలో తక్కువేమీ కాదు. పైగా బాలీవుడ్ దిగ్గజాల్లో ఒకరు. ప్రభాస్- సైఫ్ కాంబినేషన్ లో రామరావణ యుద్ధం.. జనరంజకంగానే రూపొందుతుందని అంతా ఎక్స్పెక్ట్ చేస్తున్నారు.
7000 years ago existed the world's most intelligent demon! #Adipurush#Prabhas #SaifAliKhan @itsBhushanKumar @vfxwaala @rajeshnair06 @TSeries @retrophiles1 #TSeries pic.twitter.com/xVPrlJQSKF
— Om Raut (@omraut) September 3, 2020