తన తండ్రి వివేకానందరెడ్డి హత్య కేసు విషయంలో ఇప్పటి వరకు నిజానిజాలు తేల్చలేదని, తన సోదరుడు సీఎంగా ఉన్నా ఈ కేసు విచారణ జరగలేదంటూ వివేకానందరెడ్డి కుమార్తె డా.సునీత ఇటీవలే ఢిల్లీ సీబీఐ అధికారులను కలిశారు. ఆ సమయంలో ఆమె చేసిన ఆరోపణలు రాష్ట్రవ్యాప్తంగా చర్చనీయాంశమయ్యాయి. ఇక నిఘా పరికరాల కొనుగోలు వ్యవహారంలో సస్పెన్షన్ గురై విచారణ ఎదుర్కొంటున్న సీనియర్ ఐపీఎస్ అధికారి ఏబీ వెంకటేశ్వరరావు చేసిన వ్యాఖ్యలు ప్రకంపనలు రేపాయి.
వైఎస్ వివేకా మరణం ప్రమాదవశాత్తూ జరిగిందనడం ఎంత నిజమో..
14రోజుల విచారణ ఆదివారంతో పూర్తికావడంతో ఏబీ వెంకటేశ్వరరావు మీడియాతో మాట్లాడుతూ సంచలన వ్యాఖ్యలు చేశారు. వైఎస్ వివేకానందరెడ్డి మరణం ప్రమాదవశాత్తూ జరిగిందనడం ఎంత నిజమో తనపై వచ్చిన ఆరోపణలు కూడా అంతే నిజమని వ్యాఖ్యానించారు. వివేకానందరెడ్డి హత్య జరిగిన టైంలో ఏబీ వెంకటేశ్వరరావు ఇంటిలిజెన్స్ డీజీగా పనిచేస్తున్నారు. ఇక ఈ ఘటనలో తొలుత గుండెపోటుతో మరణించారని వైసీపీ నాయకులు ప్రకటించగా తరువాత హత్య ఘటనగా కేసు నమోదైంది. అప్పట్లో ప్రతిపక్షంలో ఉన్న వైసీపీ సీబీఐ విచారణకు డిమాండ్ చేసినా.. అధికారంలోకి వచ్చాక వైఎస్ జగన్ తన పిటిషన్‌ను వెనక్కి తీసుకున్నట్లు వార్తలు వచ్చాయి. ఇక వివేకా కుమార్తె ఒక్కరే ఈ కేసు విషయంలో పోరాడుతున్న విషయం తెలిసిందే. ఈ నేపథ్యంలో ఏబీ వెంకటేశ్వరరావు వ్యాఖ్యలు దుమారం రేపుతున్నాయి.
ఇక విచారణ విషయానికి వస్తే..
రాష్ట్ర ఇంటెలిజెన్స్‌ చీఫ్‌గా పని చేస్తున్న సమయంలో సీనియర్ ఐపీఎస్ అధికారి ఏబీ వెంకటేశ్వరరావు నిఘా పరికరాల కొనుగోలు వ్యవహారంలో నిబంధనలకు విరుద్దంగా నిర్ణయం తీసుకున్నారని, ఆ మేరకు రూ.14లక్షలు ప్రభుత్వానికి నష్టం వచ్చిందని అభియోగం నమోదైంది. ప్రభుత్వం సస్పెండ్ చేసింది. ఈ ఆరోపణలపై, ప్రభుత్వ నిర్ణయంపై న్యాయపోరాటం చేస్తున్న ఏబీ వెంకటేశ్వరరావు హైకోర్టు, సుప్రీంకోర్టును ఆశ్రయించారు. ఈ కేసులో ఏప్రిల్ 30లోగా విచారణ పూర్తి చేయాలని సర్వోన్నత న్యాయస్థానం ఆదేశించిన నేపథ్యంలో మార్చి 18నుంచి విచారణ జరుగుతోంది. కమిషనర్ ఆఫ్ ఎంక్వైరీస్ సిసోసియా ఆధ్వర్యంలో 14రోజుల పాటు జరిగిన విచారణలో 21 మంది నుంచి వివరాలు సేకరించారు. మాజీ డీజీపీలు, పలువురు ఐపీఎస్‌లు హాజరయ్యారు. మాజీ డీజీపీలు జేవీ రాముడు, నండూరి సాంబశివరావు, ఎం.మాలకొండయ్య, ఆర్పీ ఠాకూర్‌, సీనియర్ ఐపీఎస్ అధికారులు ఎన్‌వీ సురేంద్రబాబు, సీహెచ్‌ ద్వారకా తిరుమలరావు, రవిశంకర్‌ అయ్యన్నార్‌ తదితరులు హాజరయ్యారు. సుప్రీంకోర్టు ఆదేశాల మేరకు ఈ కమిటీ మే 3లోగా నివేదిక సమర్పించాల్సి ఉంది.
ఏబీ సంచలన వ్యాఖ్యలు..
విచారణ పూర్తయిన తరువాత ఏబీ వెంకటేశ్వరరావు మీడియాతో మాట్లాడుతూ సంచలన వ్యాఖ్యలు చేశారు. తనపై ఆరోపణలు పచ్చి అబద్దాలని, 30ఏళ్ల పాటు నిజాయితీతో విధులు నిర్వర్తించిన తనపై ఇలాంటి ఆరోపణలతోపాటు దేశద్రోహం లాంటి అభియోగాలు మోపడం వెనుక కుట్ర ఉందన్నారు. కృత్రిమ ధృవపత్రాలు సృష్టించి తనను ఇరికించారని, వీటిపై న్యాయపోరాటం చేస్తామన్నారు. కుక్కమూతి పిందెలు కొందరు ఇలాంటి ఘటనకు పాల్పడ్డారన్నారు. వివరాలు, వాస్తవాలు అన్ని రికార్డ్ అయ్యాయని త్వరలోనే కమిషనర్ తన నిర్ణయం చెప్తారన్నారు. కాగా విచారణ పూర్తయినా కృత్రిమ ధృవపత్రాల అంశంపై పోరాటం చేస్తానన్నారు. తన విషయంలో హైకోర్టు ఆదేశాలను ప్రభుత్వం పట్టించుకోకపోవడంతో సుప్రీంకోర్టుకు వెళ్లాల్సి వచ్చిందని, ఆ విధంగా తనకు మేలే జరిగిందని, విచారణ త్వరగా పూర్తి చేసేందుకు చర్యలు తీసుకున్న సుప్రీంకోర్టుకు ధన్యవాదాలు చెబుతానని వ్యాఖ్యానించారు. ఇక వివేకానందరెడ్డి గురించి మాట్లాడుతూ..తాను కర్నూలు రేంజ్‌లో పనిచేస్తున్నప్పుడు వివేకానందరెడ్డితో పరిచయం ఉందని, ఆయన సౌమ్యుడని వ్యాఖ్యానించారు. ఘర్షణలకు దూరంగా ఉండే వ్యక్తి అని, అలాంటి వ్యక్తి హత్య జరగడం బాధాకరమని వ్యాఖ్యానించారు.
కాగా కమిషనర్ ఆఫ్ ఎంక్వైరీస్ నివేదిక ప్రభుత్వం, ఏబీ వెంకటేశ్వరరావు కెరియర్‌కు ముడి పడి ఉన్న నేపథ్యంలో మే3 వరకు ఎలాంటి నివేదిక వస్తుందనేది తేలాలి. అదే సమయంలో ప్రభుత్వం నుంచి గాని వైసీపీ నుంచి ఇటీవల పెద్దగా ఎలాంటి కార్యాచరణ కూడా లేదనే కామెంట్ కూడా వినిపిస్తోంది. ఒక వేళ అదే జరిగితే..ఏబీ వెంకటేశ్వరరావు చేస్తున్న ఆరోపణలు నిజమైతే.. కృత్రిమ ధృవపత్రాల వ్యవహారం మరో వివాదంగా మారే అవకాశం కనిపిస్తోంది.
Must Read ;- జగన్ ఎంత విషం కక్కినా.. ఆయన ‘సుప్రీం’ హీరోనే!
