వైసీపీ కీలక నేత, మాజీ మంత్రి పేర్ని వెంకట్రామయ్య అలియాస్ పేర్ని నాని రేషన్ బియ్యాన్ని మాయం చేసిన వైనం ఇప్పుడు ఏపీలో తీవ్ర చర్చనీయాంశంగా మారిన సంగతి తెలిసిందే. వైసీపీ అధికారంలో ఉండగా… ఓ మంత్రిగా తానే ఓ గోదామును నిర్మించి… దానిని రాష్ట్ర పౌరసరఫరాల శాఖ అద్దెకు తీసుకునేలా వ్యూహం రచించిన నాని… అందులో ఆ శాఖ దాచిన రేషన్ బియ్యాన్ని గుట్టు చప్పుడు కాకుండా మాయం చేశారు. వైసీపీ అధికారంలో ఉన్నంతవరకూ… ఈ విషయం బయటపడకుండా జాగ్రత్త పడిన నాని… వైసీపీ అధికారం నుంచి దిగిపోవడంతో హతాశులయ్యారు. తాను చేసిన తప్పును ఎలా కప్పిపుచ్చుకోవాలలో తెలియని నాని… కూటమి సర్కారు రేషన్ బియ్యం మాయమైన విషయాన్ని బయటపెట్టగానే దానిని కప్పిపుచ్చుకునే క్రమంలో అడ్డంగా బుక్కయ్యారు.
మాయమైన బియ్యం ఎంతో చెబితే… దానికి సరిసమాన మొత్తంలో డబ్బు చెల్లిస్తామని చెప్పిన నాని… ఆ డబ్బును చెల్లించారు. దీంతో రేషన్ బియ్యం మాయమైన వ్యవహారం తన కనుసన్నల్లోనే జరిగిందని ఆయన ఒప్పుకున్నట్టు అయ్యింది. అయితే సదరు గోదాము తన సతీమణి జయసుధ పేరిట ఉండటం, ఆమెపై కేసు నమోదు కావడంతో ఏం చేయాలో దిక్కుతోచని స్థితిలోకి నాని వెళ్లిపోయారు.
ఇక తాాజాగా అధికారుల విచారణలో భాగంగా నాని మాయం చేసిన రేషన్ బియ్యం పరిమాణం రెట్టింపు అయ్యింది. ఇప్పటిదాకా నాని గోదాములో నుంచి 3,708 బస్తాల రేషన్ బియ్యం మాయమైనట్లుగా తెలిసింది. దీనికి సంబందించిన డబ్బును మాత్రమే నాని ప్రభుత్వానికి చెల్లించారు. అయితే నెల రోజుల పాటు సదరు గోదాములో ఉన్న నిల్వలను లెక్కించిన అదికారులు… మాయమైన రేషన్ బియ్యం బస్తాల సంఖ్య అంతకు రెట్టింపుగా ఉందని తేల్చారు. తాజాగా తేలిన లెక్కల ప్రకారం… నాని గోదాము నుంచి మాయమైన రేషన్ బియ్యం బస్లాల సంఖ్య 7,577 అంట. అంటే… తొలుత తేలిన లెక్క కంటే డబుల్ అన్న మాట.అంటే… నానిఇంకా ప్రభుత్వానికి చెల్లించాల్సిన సొమ్ము చాలానే ఉందన్నమాట.
తాను అధికారంలో ఉండగా… తనకు మచ్చిక అయిన అధికారుల సహాయంతో నాని మాయమైన రేషన్ బియ్యం బస్తాల సంఖ్యను తక్కువ చేసి చూపించుకున్నారన్న మాట. ఆ మేరకే డబ్బు చెల్లించేసి చేతులు దులుపుకుందామని నాని యత్నించినట్లుగా అధికారులు భావిస్తున్నారు. తాజాగా తేలిన లెక్క చూస్తుంటే… నానా గోదాము నుంచి తరలిపోయిన రేషన్ బియ్యం ఇంకా భారీ మోతాదులోనే ఉండే అవకాశాలు లేకపోలేదన్న వాదనలు వినిపిస్తున్నాయి.
ఇదిలా ఉంటే… తాను చేసిన తప్పుకు తన సతీమణి జయసుధను బుక్ చేసి పారేసిన నాని.. ఇప్పుడు ఆమెను ఎలా బయటపడవేయాలి అన్న దిశగా తర్జనభర్జన పడుతున్నారట. ఇటు మచిలీపట్నం జిల్లా కోర్టులో జయసుధకు బెయిల్ ఇవ్వాలంటూ పిటిషన్ దాఖలు చేయించిన నాని… అదే సమయంలో ఎందుకైనా మంచిదన్న భావనతో అదే అంశంతో హైకోర్టులోనే బెయిల్ పిటిషన్ దాఖలు చేయించారట. ఈ రెండు చోట్లలో దేనిలోనో… ఒక దానిలో బెయిల్ దొరకదా? అన్న దిశగా నాని ఆశగా ఎదురు చూస్తున్నారు. ఈ బెయిల్ పిటిషన్లపై శుక్రవారం విచారణ జరగనుంది.
ఈ లోగానే తన సతీమణిని పోలీసులు అరెస్ట్ చేయకుండా నాని పలాయనవాదాన్ని ఎంచుకున్నారు. కుటుంబ సభ్యులతో కలిసి 20 రోజులుగా పరారీలో ఉన్న నాని,… ఇటీవలే తాను మాత్రం ఇంటికి వచ్చారు. తన సతీమణిని మాత్రం ఆయన ఇంకా అండర్ గ్రౌండ్ లోనే ఉంచేశారు. తన సతీమణి ఎక్కడ బయటకు వస్తే… పోలీసులుఎక్కడ అరెస్ట్ చేస్తారోనన్న భయం ఆయనను వెంటాడుతోంది. అంతేకాకుండా తాను చేసిన తప్పుకు తన సతీమణి బలి కావాల్సి వస్తుందన్న విషయం కూడా నానిని దహించి వేస్తోందన్న వాదనలు వినిపిస్తున్నాయి. మొత్తంగా మొన్నటిదాకా తానో శుద్దపూసను అన్న చందంగా మాట్లాడిన నాని.. ఇప్పుడు రేషన్ బియ్యం బొక్కుడు బయటకు రాగానే..నోటికి తాళం వేసుకుని భార్యను ఈ కేసు నుంచి బయటపడేసేందుకు తహతహలాడిపోతున్న వైనం ఆసక్తి రేకెత్తిస్తోంది.
