ఆంధ్ర ప్రదేశ్ లో వైసీపీ ప్రభుత్వం అధికారంలోకి వచ్చిన నాటి నుంచి అధికారులు, ఉద్యోగుల పట్ల ఆ పార్టీ నేతల ఆగడాలు అన్నీ ఇన్నీ కాదు. తమ పార్టీ అధికారంలో ఉండి తాము ఏది చెబితే అది చేయాల్సిందే అనేలా వారు వ్యవహరిస్తున్న తీరు అనేకమార్లు విమర్శలపాలయ్యింది. ఇక కొందరు నేతలు హద్దులు మీరీ వ్యవహరిస్తున్న తీరు వివాదాస్పదంగా కూడా తయారయ్యింది. వైసీపీ నేతలను విబేధించిన అధికారులు, ఉద్యోగులపై ఆ పార్టీ నాయకులు ఏకంగా దాడులకు దిగడం కూడా చూస్తూనే ఉన్నాం. అయితే ఇదంతా జగన్ అండ చూసుకునే వైసీపీ నాయకులు హద్దులు మీరీ ప్రవర్తిస్తున్నారనే వాదనలు వినిపిస్తున్నాయి.
తాజాగా జగన్ అండతో వైసీపీ నేతలు చేస్తున్న అరచకాలకు ఓ గిరిజన ఉద్యోగి బలైపోయింది.వైసీపీ నేతల వేధింపులు తాళలేక ఓ ఎస్టీ మహిళా ఉద్యోగి ఆత్మహత్యకు పాల్పడ్డారు. ఈ ఘటన కోనసీమ జిల్లా ఉప్పలగుప్తం మండలం చల్లపల్లి పంచాయతీలో చతు చేసుకుంది. చల్లపల్లి పంచాయతీ కార్యదర్శిగా విధులు నిర్వహిస్తున్న రొడ్డా భవానీ వైసీపీ నేతల వేధింపులు తాళలేక బలవన్మరణానికి పాల్పడ్డారు. ఈ ఘటణ పై తెలుగుదేశం పార్టీ జాతీయ ప్రధాన కార్యదర్శి నారా లోకేష్ స్పందించారు.
సీఎం జగన్ అండతో వైసీపీ నేతలు సాగిస్తున్న అరాచకాలకు మరొక గిరిజన మహిళా ఉద్యోగి బలి కావడం రాష్ట్రంలో భయానక పాలనకి అద్దం పడుతోందని నారా లోకేష్ విమర్శించారు. ఉప్పలగుప్తం మండలం చల్లపల్లి పంచాయతీ కార్యదర్శి రొడ్డా భవానీ వైసీపీ నేతల వేధింపులు తాళలేక ఆత్మహత్యకి పాల్పడిందని ఆయన పేర్కొన్నారు. ఎస్టీ మహిళా ఉద్యోగిని వేధించి బలవన్మరణానికి కారకులైన వైసీపీ నేతల్ని తక్షణమే అరెస్టు చేయాలని డిమాండ్ చేశారు. డాక్టర్ సుధాకర్ నుంచి భవానీ వరకూ ప్రభుత్వ ఉద్యోగుల మరణాలన్నీ వైసీపీ చేసిన హత్యలే అని ఆరోపించారు. ఈ హత్యలని తప్పుదారి పట్టిస్తూ, నిందితులైన వైసీపీ నేతలను పోలీసులు కాపాడుతున్నారని మండిపడ్డారు. అధికారులకు జగన్ రెడ్డి క్రూర పాలనలో ఇదే గతి పట్టొచ్చని హెచ్చరించారు. వైసీపీ బాధితులైన సాటి ఉద్యోగులకు అండగా నిలవాలని లోకేష్ తెలిపారు.
