వైసీపీ నేతలు తప్పులు చేసినా, రౌడీయిజం చేసి జైలుకు వెళ్లినా ఆ నాయకులకు ఆ పార్టీ చీఫ్ జగన్ అండగా ఉంటారనే ప్రచారం ఉంది. కానీ, క్షేత్రస్థాయిలో పరిస్థితులు గమనిస్తే కొందరు నాయకుల విషయంలో ఆయన వ్యవహరిస్తున్న తీరు సొంత పార్టీ వర్గాల్లోనే చర్చనీయాంశంగా మారింది. ఆపదలో ఉన్నప్పుడు ఓదార్చి, కొండంత అండగా ఉంటానని భరోసా ఇవ్వడం..ఆ తర్వాత వారిని పూర్తిగా విస్మరించడం జగన్ నైజమనే విమర్శలు వ్యక్తమవుతున్నాయి. ఆలూరు వైకాపా ఎమ్మెల్యే విరూపాక్షి ఉదంతం ఇందుకు ప్రత్యక్ష నిదర్శనంగా నిలుస్తోంది.
ఇటీవల ఎమ్మెల్యే విరూపాక్షి ఇంటికి వెళ్లి పరామర్శించిన జగన్, భారీ ఊరేగింపుతో సందడి చేసి, కుటుంబానికి పూర్తి అండగా ఉంటానని పెద్ద ఎత్తున హామీ ఇచ్చారు. తీరా ఇప్పుడు విరూపాక్షి ఆయన కుమారుడితో సహా గత నెలన్నర రోజులుగా జైల్లో మగ్గుతున్నా జగన్ వైపు నుంచి ఎలాంటి చలనం లేదు. జగన్ అనుగ్రహం ఉంటే పార్టీలోని ఇతర ముఖ్య నేతలకు ఉన్నతస్థాయి న్యాయ సహాయం అందుతుంది. పొన్నవోలు సుధాకర్ రెడ్డి లేదా నిరంజన్ రెడ్డి వంటి సీనియర్ లాయర్లను రంగంలోకి దింపి బెయిల్ తెప్పించే ప్రయత్నాలు జరుగుతుంటాయి. కానీ, విరూపాక్షి విషయంలో మాత్రం అలాంటి న్యాయ పోరాటం కాదు కదా, కనీస సాయం కూడా అందించకపోవడం గమనార్హం.
ఒక ఎమ్మెల్యే స్థాయి నాయకుడికే ఈ పరిస్థితి ఎదురైతే, ఇక రాత్రింబవళ్లు పార్టీ కోసం కష్టపడే సామాన్య కార్యకర్తల పరిస్థితి ఏంటనే ప్రశ్నలు ఉత్పన్నమవుతున్నాయి. తమ నాయకుడు వస్తాడు, పరామర్శిస్తాడు, కెమెరాల ముందు భరోసా ఇస్తాడు… కానీ ఆపద ముదిరి జైలు పాలుకాగానే పట్టించుకోడనే భావన కేడర్‌లో బలపడుతోంది. జగన్ రెడ్డిని నమ్ముకుంటే రాజకీయ భవిష్యత్తే కాదు, వ్యక్తిగత జీవితం కూడా ప్రమాదంలో పడుతుందనే ఆందోళన పార్టీ శ్రేణుల్లో స్పష్టంగా కనిపిస్తోంది.
ఈ మొత్తం వ్యవహారంలో అత్యంత విచిత్రమైన అంశం ఏమిటంటే…వైసీపీ అధినేత జగన్ వదిలేసిన ఎమ్మెల్యే విరూపాక్షికి మద్దతుగా సీపీఐ రాష్ట్ర కార్యదర్శి కె. రామకృష్ణ గళం విప్పడం! సొంత పార్టీ అధ్యక్షుడు కనీసం బెయిల్ పిటిషన్‌కు సాయం చేయకపోయినా, ప్రత్యర్థి పార్టీల నాయకులు విరూపాక్షి అరెస్టుపై స్పందిస్తుండడం వైసీపీ అంతర్గత వైఫల్యాన్ని ఎత్తిచూపుతోంది. నాయకులను అవసరం ఉన్నప్పుడు వాడుకుని, కష్టాల్లో ఉన్నప్పుడు గాలికి వదిలేసే జగన్ వైఖరికి విరూపాక్షి ఘటన ఒక ఉదాహరణగా నిలిచింది.
