ఏపీలో ఇండస్ట్రీయలైజేషన్, పెట్టుబడులపై మంత్రి నారా లోకేష్ స్పెషల్ ఫోకస్ పెట్టారు. ఇందులో భాగంగా ప్రిమియర్ ఎనర్జీస్ సంస్థకు సంబంధించిన భారీ ప్రాజెక్టును అత్యంత వేగంగా పూర్తి చేసి సరికొత్త రికార్డు సృష్టించామని లోకేష్ ట్వీట్ చేశారు. కేవలం 18 నెలల స్వల్ప వ్యవధిలోనే పెట్టుబడి ప్రతిపాదన నుంచి పూర్తి స్థాయి ఉత్పత్తి దిశగా అడుగులు వేశామని గర్వంగా ప్రకటించారు.
నెల్లూరు జిల్లా నాయుడుపేట వద్ద ఏర్పాటు చేసిన ప్రిమియర్ ఎనర్జీస్ 7 గిగావాట్ల సోలార్ సెల్ తయారీ కేంద్రాన్ని లోకేష్ తన ట్వీట్‌లో ప్రస్తావించారు. ఇది ఇండియాలోనే అతిపెద్ద సోలార్ సెల్ మ్యానుఫ్యాక్చరింగ్ ప్లాంట్ కావడం విశేషం. ఈ ప్లాంట్‌కు సంబంధించిన ఒక ప్రత్యేక వీడియోను ఆయన తన సోషల్ మీడియా ఖాతా ద్వారా పంచుకుంటూ ఏపీ పారిశ్రామిక ప్రగతిని వివరించారు.
కూటమి ప్రభుత్వం వచ్చాక మాటల కంటే చేతలకే ప్రాధాన్యం ఇస్తున్నామని, వేగవంతమైన అనుమతులు అంతకంటే వేగవంతమైన నిర్మాణాలతో ముందుకెళ్తున్నామని లోకేష్ స్పష్టం చేశారు. ఇది ఆంధ్రప్రదేశ్ స్టైల్‌: తక్కువ మాటలు..ఎక్కువ పని అంటూ రాష్ట్రంలో పరిశ్రమల స్థాపనకు ఉన్న సానుకూల వాతావరణాన్ని వివరించారు. కాగితాలకే పరిమితం కాకుండా ప్రత్యక్షంగా కర్మాగారాలు నిర్మించి, యువతకు ఉద్యోగాలు కల్పిస్తున్నామని స్పష్టం చేశారు.
ఈజ్ ఆఫ్ డూయింగ్ బిజినెస్ స్థానంలో ఇప్పుడు ఆంధ్రప్రదేశ్ స్పీడ్ ఆఫ్ డూయింగ్ బిజినెస్ మంత్రంతో దూసుకుపోతోందని ఆయన కొనియాడారు. ప్రిమియర్ ఎనర్జీస్ ప్రాజెక్ట్ సాధించిన విజయమే దీనికి నిదర్శనమని, రాబోయే రోజుల్లో ఏపీని గ్రీన్ ఎనర్జీ ఉత్పత్తులు, పారిశ్రామిక హబ్‌గా తీర్చిదిద్దడమే లక్ష్యంగా పనిచేస్తున్నామని లోకేష్ ఆ వీడియో ద్వారా తెలియజేశారు.
