తెలంగాణలో అసెంబ్లీ ఎన్నికల ఫలితం ఎలా ఉన్నప్పటికీ.. ప్రభావితం అయిన నేతలతో టీడీపీకి మాత్రం గతంలో సంబంధాలు ఉండేవి. ముఖ్యమంత్రిగా ఓడిపోయిన కేసీఆర్ అయినా, అదే సీటు దక్కించుకోబోతున్న రేవంత్ రెడ్డి అయినా కొన్నేళ్ల క్రితం చంద్రబాబు శిష్యులే. చంద్రబాబు వద్ద రాజకీయ పాఠాలు నేర్చుకున్న ఈ ఇద్దరిలో కేసీఆర్ సీనియర్ కాగా, రేవంత్ రెడ్డి జూనియర్ గా భావించవచ్చు. ఎందుకంటే కేసీఆర్ దాదాపు 20 ఏళ్ల క్రితం అంటే.. 2000 ఏడాదికి ముందు చంద్రబాబు మొదటిసారి సీఎం అయినప్పుడు కేబినెట్‌లో మంత్రిగా పని చేసేవారు. రేవంత్ రెడ్డి మాత్రం చంద్రబాబు ప్రతిపక్షంలో ఉన్నప్పుడు ఎమ్మెల్యేగా ఉండేవారు. రాష్ట్రం విడిపోయాక తెలంగాణ టీడీపీలో రేవంత్ రెడ్డి కీలక పాత్ర పోషించారు.
ముఖ్యమంత్రిగా రాజీనామా చేసిన కేసీఆర్ చంద్రబాబు కేబినెట్ లో మంత్రిగా ఉండేవారు. 1995 నుంచి 1999 వరకూ టీడీపీ ప్రభుత్వంలో రవాణా శాఖా మంత్రిగా పని చేశారు. ఆ తర్వాతి టెర్మ్ లో చంద్రబాబు మంత్రి పదవి నిరాకరించడం వల్ల.. నొచ్చుకున్న కేసీఆర్.. ఆయనతో విభేదించి బయటికి వచ్చి టీఆర్ఎస్ పార్టీని పెట్టారు. అంటే, టీడీపీ రూట్స్ ఉన్న వ్యక్తి తెలంగాణకు ఈ పదేళ్లుగా సీఎంగా కొనసాగారు. ఇప్పుడు మారుతున్న ప్రభుత్వంలో కూడా మళ్లీ చంద్రబాబు శిష్యుడు రేవంత్ రెడ్డి సీఎం అవుతారన్నమాట!
తెలంగాణ ప్రాంతంలో ఎక్కువగా అభివృద్ధి జరిగింది.. ఉమ్మడి ఆంధ్రప్రదేశ్‌లో సీఎంగా ఉన్న చంద్రబాబు హాయాంలో అయితే.. మళ్లీ ఆ స్థాయిలో చంద్రబాబు శిష్యుడు కేసీఆర్ వల్లనే రాష్ట్రంలో కీలక మార్పులు జరిగాయి. చంద్రబాబు పాలన తరహాలోనే కేసీఆర్ కూడా సంక్షేమం, డెవలప్‌మెంట్‌కి సమానంగా ప్రాధాన్యం ఇచ్చేవారు. ఇప్పుడు కొత్తగా సీఎం అవ్వబోయే రేవంత్ రెడ్డి కూడా చంద్రబాబు విజన్‌ను ఆకళింపు చేసుకొనే పాలన సాగిస్తారనే అభిప్రాయం వ్యక్తం అవుతోంది.
చంద్రబాబుకి అత్యంత నమ్మకస్తుడిగా రేవంత్ రెడ్డికి పేరు ఉన్న సంగతి తెలిసిందే. సీనియర్ శిష్యుడైన కేసీఆర్ చంద్రబాబుతో వైరం పెట్టుకుంటే.. రేవంత్ రెడ్డి మాత్రం సత్సంబంధాలను కొనసాగిస్తున్నారు. అందుకే తాజా తెలంగాణ ఎన్నికల్లో చంద్రబాబు మౌనం ప్రదర్శిస్తూనే కేసీఆర్ కి దిమ్మతిరిగిపోయేలా రిటర్న్ గిఫ్ట్ ఇచ్చారు. తెలంగాణలో టీడీపీని పోటీకి దూరంగా ఉంచారు. దీంతో సహజంగానే తెలంగాణలో ఆంధ్ర సెటిలర్ల ఓట్లు కాంగ్రెస్ కు మళ్లాయి. అప్పటికే చంద్రబాబు అరెస్టు విషయంలో బీఆర్ఎస్ స్పందించిన తీరు పట్ల ఆగ్రహంతో ఉన్న సెటిలర్లు.. ఈసారి బీఆర్ఎస్‌కు బుద్ధి చెబుతామని చెప్పిన వీడియోలు సామాజిక మాధ్యమాల్లో వైరల్ అయ్యాయి. ఆ ప్రకారమే వివిధ జిల్లాల్లో ఆ ప్రభావం బాగా కనిపించింది. దీనికి తోడు 10 ఏళ్ల నుంచి కొనసాగుతున్న ప్రభుత్వంపైన కూడా అసహనం రేగి, వారు కూడా కాంగ్రెస్ వైపు మళ్లారు. దీంతో చంద్రబాబు సీనియర్ శిష్యుడు కేసీఆర్ ఓటమి నుంచి తప్పించుకోలేకపోయారు.
