Hero Ravi Teja Gear Up For His Next Projects :
మొదటి నుంచి కూడా రవితేజకి దూకుడు ఎక్కువే. తెరపై ఆయన ఎంత వేగంగా కథను నడిపిస్తాడో, అంతే వేగంగా ప్రాజెక్టులను లైన్లో పెడుతుంటాడు. ఈ ఏడాది ‘క్రాక్’ సినిమాతో ఆయన థియేటర్లను దడదడలాడించాడు. ఈ సినిమా ఆయన కెరియర్లోనే అత్యధిక వసూళ్లను రాబట్టింది. ఆ తరువాత సినిమాగా ఆయన ‘ఖిలాడి‘ సినిమాను లైన్లో పెట్టేయడం, చకచకా పూర్తిచేసి షాక్ ఇచ్చేయడం కూడా జరిగిపోయాయి.
రమేశ్ వర్మ దర్శకత్వం వహించిన ఈ సినిమాను త్వరలో విడుదల చేయాలనే ఉద్దేశంతో ఉన్నారు. సరైన సమయం కోసం వెయిట్ చేస్తున్నారు. దేవిశ్రీ ప్రసాద్ సంగీతాన్ని సమకూర్చిన ఈ సినిమా ద్వారా మీనాక్షి చౌదరి కథానాయికగా పరిచయమవుతోంది. ఆ తరువాత సినిమాను నక్కిన త్రినాథరావు దర్శకత్వంలో చేయనున్న ఆయన, తాజాగా వంశీకృష్ణ ఆకెళ్లకి గ్రీన్ సిగ్నల్ ఇచ్చాడని అంటున్నారు.
వంశీకృష్ణ ఆకెళ్ల ‘టైగర్ నాగేశ్వర్రావ్’ సినిమాను చేయనున్నాడు. ఈ సినిమాలో కథానాయకుడిగా ముందుగా రానా, ఆ తరువాత బెల్లంకొండ శ్రీనివాస్ పేర్లు వినిపించాయి. ఆ తరువాత ఏమైందో తెలియదుగానీ, తాజాగా రవితేజ పేరు తెరపైకి వచ్చింది. నక్కిన త్రినాథరావు సినిమా పూర్తయిన తరువాత ఈ ప్రాజెక్టు చేస్తానని ర్తవితేజ చెప్పినట్టుగా ఒక వార్త షికారు చేస్తోంది. ఇందులో వాస్తవమెంతన్నది చూడాలి మరి.
Must Read ;- రవితేజ మూవీతో మరో హీరో రీ ఎంట్రీ!
