కలెక్షన్ కింగ్, నట ప్రపూర్ణ, పద్మశ్రీ . ఇన్ని విశేషాలున్న డా. మోహన్ బాబు కొంతకాలంగా టాలీవుడ్ లో చాలా తక్కువ చిత్రాల్లో నటిస్తూ .. అభిమానుల్ని నిరాశ పరుస్తున్నారు. అపుడెప్పుడో బుజ్జిగాడు, యమదొంగ, ఆ తర్వాత రౌడీ, ఈ మధ్య ‘మామ మంచు అల్లుడు కంచు’, నిన్నటికి నిన్న ‘గాయత్రి’ లాంటి సినిమాల్లో మాత్రమే నటించారు ఆయన. ఆయన తలుచుకుంటే ఈ పాటికి .. టాలీవుడ్ లోనూ, ఇతర భాషల్లోనూ విలన్ వేషాలతోనూ, ఇతర ముఖ్యపాత్రలతోనూ బిజీగా ఉండేవారేమో. కానీ.. ఆయన ఆ దిశగా ఆలోచించకుండా.. కేవలం సెలక్టివ్ గానే వెళ్ళే ఆలోచనతో ఉన్నారని అర్ధమవుతోంది.
టాలీవుడ్ లో స్టైలిష్ విలన్ వేషాలకు పెట్టింది పేరు మోహన్ బాబు. ఒకప్పుడు ఆయన డైలాగ్స్ , మేనరిజమ్స్ , బాడీ లాంగ్వేజ్ జనాన్ని భలేగా ఎంటర్ టైన్ చేశాయి. ఆ తర్వాత హీరోగా మారి పలు చిత్రాలతో విజయం సాధించారు. ఆపై మరోసారి విలన్ గామారారు. కొంతకాలానికి మళ్ళీ హీరో అయ్యారు. ఇలా హీరో, విలన్ వేషాలతో తన కెరీర్ ను పరుగులు తీయించిన మోహన్ బాబు.. దాదాపు 550 పైచిలుకు చిత్రాల్లో నటించి మెప్పించారు. 72 సినిమాలు నిర్మించారు. సినిమా ఇండస్ట్రీలో 40 సంవత్సరాలు పూర్తి చేసుకున్నారు.
ఇంత అద్భుతమైన నేపథ్యం ఉన్నప్పటికీ గత 15 ఏళ్ళుగా మోహన్ బాబు నుంచి సరైన సినిమా ఒక్కటీ రాకపోవడం విడ్డూరం. సినిమాలు తగ్గించుకోవడంతో పాటు.. ఇప్పటి దర్శకులు ఆయన ను సరిగ్గా ఉపయోగించు కోలేకపోవడం దీనికి కారణాలని చెప్పుకోవాలి. ఏదేమైనా .. ఇంతకాలం ఆయన లాంటి లెజెండరీ నటుడ్ని ఇండస్ట్రీ మిస్ అయింది. అయితే కొంత విరామం తర్వాత మోహన్ బాబు తమిళంలో మణిరత్నం ‘పొన్నియన్ సెల్వన్’ లో ఒక ప్రత్యేక పాత్ర పోషిస్తున్నారు. అలాగే సూర్య హీరోగా నటిస్తోన్న ‘ఆకాశం నీ హద్దురా’ లో ఏరోనాటికల్ ఆఫీసర్ గా నటిస్తున్నారు. ఇక వీటితో పాటు తెలుగులో ‘సన్నాఫ్ ఇండియా’ అనే ఒక దేశభక్తి చిత్రంలో నటిస్తున్నారు.
ఆయన ఎర్లియర్ మూవీ ‘గాయత్రి’ సినిమాకి కథ, మాటలు అందించిన డైమండ్ రత్నబాబు ఈ సినిమాకి దర్శకుడు. స్వతంత్ర్య దినోత్సవాన్ని పురస్కరించుకొని ఇటీవల ఈ సినిమాకి సంబంధించిన ఫస్ట్ లుక్ పోస్టర్ ను విడుదల చేశారు మేకర్స్. గతంలో ఆయన నటించిన ‘పుణ్యభూమి నాదేశం’ తరహాలో ఒక ఆవేశపూరితమైన పాత్రలో మోహన్ బాబు నటించబోతున్నారు. ఆయన దగ్గర అంత టాలెంట్ ఉండి కూడా బుర్రకథ లాంటి ఫ్లాప్ సినిమా తీసిన దర్శకుడికే ఆయన ఎందుకు ఛాన్స్ ఇచ్చారోనని ఆయనమీద విమర్శలొస్తున్నాయి. ఆయన తలచుకుంటే .. ఓ క్రేజీ డైరెక్టర్ తో .. ఒక మంచి సినిమా తన సొంత నిర్మాణంలోనే తీయొచ్చు. మరి మోహన్ బాబు .. ఈ పరిస్థితుల్లో చాలా సెలెక్టివ్ గా ఎందుకు వెళుతున్నారో ఎవరికీ అంతు బట్టకుండా ఉంది. మరి ఇక ముందైన మోహన్ బాబు .. వరుస సినిమాలతో తెలుగు ప్రేక్షకుల్ని మెప్పిస్తారేమో చూడాలి.
