‘నీదీ నాదీ ఒకే కథ’… ఇదేదో ఈమధ్యనే వచ్చిన సినిమా పేరులా ఉంది కదూ. మనిషిని పోలిన మనిషి ఉన్నపుడు కథను పోలిన కథలు ఉండవా? అని మీరనుకోవచ్చు. అసలు కథ రాయడం పెద్ద కథా అని కూడా అనవచ్చు. ఇంతకీ కథ ఎక్కడ పుడుతుందో తెలుసా… గుండె గొంతుకలో. అంతరంగాన్ని మథించి శోధిస్తే తప్ప కథ అంత తేలిగ్గా బయటికి రాదు. అంత గొప్ప కథకు జన్మనిచ్చిన రచయితలు అజ్ఞాతవాసి లా, దెయ్యం రచయితల్లో బతుకు వెళ్లదీస్తూ ఉంటారని ఎంతమందికి తెలుసు. తనను ఎవరో అమాంతం ఎత్తుకుపోతుంటే ఆ కథా ఘోషను ఎవరు వింటారు, రచయిత ఆత్మక్షోభను ఎవరు ఆలకిస్తారు?
ఈ కథ కూడా తెలుసుకోండి
ఇది ఓ ఎద్దు, కాకి కథ. ఈ రెండూ తమ కష్టసుఖాలను ఒకదానికొకటి పంచుకునేవి. ఓరోజు ఎద్దుతో కాకి ‘నువ్వు రోజూ ఒళ్లంతా హూనంచేసుకుని కష్టపడుతుంటే… నీ యజమాని నీ మొహాన ఓ కుడితి కొట్టి పబ్బం గడుపుకుంటున్నాడు చూశావా’అందట. దానికా ఎద్దు ‘నా సంగతి సరే… నీ సంగతి చెప్పు’ అందట. ‘ఏముంది… నేనేమీ కష్టపడను. నా కంటికి ఆహారం కనిపిస్తే చాలు ముక్కుకు కరచుకుని ఎత్తుకుపోతా… ఇలా ఎత్తుకుపోవడంలో ఎంత మజా ఉంటుందో నీకేం తెలుసు?’ అని జవాబిచ్చిందట కాకి. కథా చోరులు కూడా ఈ కాకిలాంటి వారే. ఇతరుల దగ్గర్నుంచి అన్యాయంగా తెచ్చుకునే తిండికన్నా కష్టపడి సంపాదించిన ఆహారమే మిన్నఅనే నీతిని ఈ చోరులు ఎప్పుడు తెలుసుకుంటారో అప్పుడే రచయిత కష్టాలు తీరతాయి.
వీరి హక్కుల్ని ఎవరు కాపాడతారు?
రచయితల హక్కుల్ని కాపాడటానికే కాపీరైట్ అనే చట్టం వచ్చింది. ఆ చట్టం నీడలోనే ఎందరో రచయితలు సేదతీరుతున్నా వారికి న్యాయం జరుగుతున్న దాఖలాలు లేవు. తెలుగు సినీ రచయితల సంఘం ఉన్నది కేవలం రచయితల హక్కుల్ని కాపాడటానికే ఉంది. ఏ రచయిత అయినా తన దగ్గర కథ ఉంటే అందులో రిజిస్టర్ చేసుకుంటే సదరు కాపీరైట్ చట్టం ప్రకారం ఆ కథ చాలా భద్రంగా ఉంటుందన్నది ఓ నమ్మకం. గత ఏడాది ఈ రచయితల సంఘం రజతోత్సవాలను కూడా ఘనంగా జరుపుకుంది. వారి దగ్గర ఉన్న చట్టం మాత్రం కొందరికి చుట్టమేననే ఆరోపణలు చాలా ఉన్నాయి.
ప్రముఖ సినీ రచయిత పరుచూరి గోపాలకృష్ణ దీనికి అధ్యక్షుడిగా ఉన్నారు. ఆకెళ్ల ప్రధాన కార్యదర్శి. ఈ సంఘం సభ్యులకు తాజాగా ఓ తాఖీదు వచ్చింది. కథా చౌర్యానికి సంబంధించిన వివాదాలు ఏమైనా వస్తే సదరు సభ్యులు ఎక్కడా దాని గురించి గొంతు విప్పకూడదు అనేది దాని సారాంశం. ఇదీ ఇక్కడ రచయిత హక్కులకు దక్కుతున్న గౌరవం. గత ఏడాది రజతోత్సవ వేడుకల్లో కృష్ణంరాజు ఓ మాటన్నారు ‘లక్ష్మి ఎదురు వస్తే నమస్కరించు…కానీ సరస్వతి ఎక్కడవున్నా వెళ్లి నమస్కరించమని’ అని. నిజంగా అలాంటి గౌరవం కథా రచయితకు సినిమా రంగంలో దక్కుతున్నదా అన్నదే ప్రశ్న.
కథల విషయంలో సినిమా రంగంలో తరచూ వివాదాలు ఏర్పడుతున్నాయి. కానీ ఈ సంఘం జోక్యం చేసుకుని పరిష్కరిస్తున్న దాఖలాలు మాత్రం లేవు. ‘నా కథ చోరీ చేసేశారు మహాప్రభో’ అని ఎవరైనా మొరపెట్టుకుంటే కనీసం పరిశీలన చేస్తున్నారా అనే సందేహాలు కలుగుతున్నాయి. పోనీ సదరు హీరోను కలిసి మొరపెట్టుకుందామంటే ఆ హీరోగారి అపాయింట్ మెంట్ దొరకడమే గగనం. ఇలాంటి కథల దగాకు ‘మెగా’ సమాధానం దొరుకుతుందా? సినిమా రచయితకు చివరికి మిగిలేది ఏమిటో తేల్చిచెప్పడం కష్టమే మరి.
