తమిళ హీరో, డీఎండీకే పార్టీ అధినేత విజయ్ కాంత్ ఆరోగ్య పరిస్థితి విషమంగా ఉంది. ఆగస్టు 25న ఆయన పుట్టిన రోజు జరుపుకున్నారు. గతంలో కరోనా బారిన పడి కోలుకున్నారు. ఆయన వయసు 69 సంవత్సరాలు. ఆయన అసలు పేరు విజయరాజ్ అలగర్ స్వామి. సినిమాల్లోకి వచ్చాక విజయకాంత్ గా పేరును మార్చుకున్నారు. అనారోగ్య కారణాల వల్ల పార్టీ బాధ్యతలను భార్యకు అప్పగించారు. నిన్నటి నుంచి ఆయన ఆరోగ్య పరిస్థితిపై వార్తలు వస్తున్నాయి. చెన్నై విమానాశ్రయ్లో వీల్ ఛైర్ పై వెళుతున్న ఆయన ఫొటోలు వైరల్ అవుతున్నాయి.
ఇటీవల లండన్, సింగపూర్, అమెరికా లో ఆయనకు వైద్య చికిత్స కూడా అందించారు. ఆయనకు ఇద్దరు కుమారులు. కుమారుడు షణ్ముగపాండ్యన్ ఆయనను దుబాయ్ కి తీసుకెళ్లినట్టు చెబుతున్నారు. కచ్చితమైన సమాచారం లేదు. లండన్ వైద్యుడు దుబాయ్ లో ఆయనకు చికిత్స అందించనున్నట్లు తెలిసింది. హీరోగా పోలీసు పాత్రలు వేయడంలో ఆయన దిట్ట. ఆయన వేసినన్ని పోలీసు పాత్రలు ఇంకెవరూ వేసి ఉండరు. తమిళనాడులో ఒకప్పుడు ఆయనకు మంచి మాస్ ఫాలోయింగ్ ఉండేది.
ఇనిక్కుం ఇలామై చిత్రంలో నెగిటివ్ పాత్రతో తమిళనాట చిత్ర రంగ ప్రవేశం చేశారు. కెప్టెన్ ప్రభాకర్ అతని 100వ చిత్రం. ఆయన నటించిన చిత్రాలు చాలావరకు తెలుగులోకి అనువాదమై విడుదలయ్యాయి. 2005లో సొంతంగా ప్రాంతీయ పార్టీ పెట్టి రాజకీయ రంగ ప్రవేశం చేశారు. 2006 ఎన్నికల్లో అన్ని స్థానాల్లో పోటీ చేసి ఒకే ఒక్క సీటును గెలుచుకున్నా పట్టువదల లేదు. ఆ తర్వాత 2011 ఎన్నికల్లో 41 స్థానాల్లో పోటీ చేసి 29 స్థానాలు గెలుచుకోవడం విశేషం.
ఎంజీఆర్, ఎన్టీఆర్ ల తర్వాత ఎక్కువ సీట్లు గెలుచుకున్న సినిమా నటుడు విజయకాంతే అవుతారు. ఎక్కువ సీట్లు గెలుచుకోడానికి ఏఐడీఎంకేతో పొత్తు పెట్టుకోవడం కూడా ఒక కారణం. ఆ తర్వాత రాజకీయంగా వెనకబడిపోయారు. ఇటీవల జరిగిన ఎన్నికల్లో అనారోగ్యం కారణంగా ప్రచారం చేయలేకపోయారు. విజయకాంత్ త్వరగా కోలుకోవాలని ఆయన అభిమానలు కోరుకుంటున్నారు.
Must Read ;- బీజేపీ స్టాల్వార్ట్ కల్యాణ్ సింగ్ ఇక లేరు
