దళపతి విజయ్ వారసుడు వచ్చేశాడు. సినిమా వారసుడు కాదండీ బాబూ.. విజయ్ పుత్రరత్నం సంజయ్ విజయ్ గురించి మనం మాట్లాడుకునేది. అయితే అతడు హీరోగా కాదు దర్శకుడిగా ప్రేక్షకుల ముందుకు రాబోతున్నాడు. అగ్రనిర్మాణ సంస్థ లైక్ ప్రొడక్షన్స్ అతనికి ఆ అవకాశాన్ని ఇచ్చింది. అతనితో కొత్త సినిమా చేయనున్నట్లు అధికారికంగా లైకా సంస్థ ప్రకటించింది. ఈ సందర్భంగా లైకా ప్రొడక్షన్స్ అధినేత సుభాస్కరన్ మాట్లాడుతూ ‘సరికొత్త ఆలోచనలతో ఉన్న యంగ్ టాలెంటెడ్ పర్సన్స్ ఎప్పుడూ గేమ్ చేంజర్స్ గా ఉంటారని మేం నమ్ముతాం. మా బ్యానర్ లో నెక్ట్స్ ప్రాజెక్ట్ ను జాసన్ సంజయ్ విజయ్ డైరెక్ట్ చేయబోతున్నాం.
తను చెప్పిన యూనిక్ పాయింట్ నచ్చింది. సంజయ్ లండన్ లో స్క్రీన్ రైటింగ్ లో బి.ఎ. (హానర్స్)ను పూర్తి చేశారు. అలాగే టోరంటో ఫిల్మ్ స్కూల్ లో ఫిల్మ్ ప్రొడక్షన్ డిప్లొమాను పూర్తి చేశారు. తను మా టీమ్ కి స్క్రిప్ట్ వివరించినప్పుడు మాకెంతో సంతృప్తికరంగా అనిపించింది. తను స్క్రీన్ రైటింగ్, డైరెక్షన్ లో స్పెషలైజేషన్ కోర్సులను చేయటం గొప్ప విషయం. తనకు సినిమా నిర్మాణంపై పూర్తి అవగాహన ఉంది. ప్రతి ఫిల్మ్ మేకర్ కి ఇది ఉండాల్సిన లక్షణం. జాసన్ సంజయ్ విజయ్ తో కలిసి వర్క్ చేయటం ఓ వండర్ ఫుల్ ఎక్స్ పీరియెన్స్ అవుతుందని భావిస్తున్నాం. ఈ సినిమాలో ప్రముఖ నటీనటులు, సాంతికేతిక నిపుణులు పని చేయబోతున్నారు’ అని వివరించారు.
డైరెక్టర్ జాసన్ సంజయ్ విజయ్ మాట్లాడుతూ ‘లైకా ప్రొడక్షన్స్ లాంటి అగ్ర నిర్మాణ సంస్థలో నేను తొలి సినిమా చేయటాన్ని గౌరవంగా భావిస్తున్నా. కొత్త టాలెంట్ ఉన్న ఫిల్మ్ మేకర్స్ ఎంకరేజ్ చేసే ఓ కేంద్రంగా ఈ నిర్మాణ సంస్థ ఉంది. ఈ సంస్థకు నా స్క్రిప్ట్ నచ్చటం నాకెంతో సంతోషాన్ని కలిగించే విషయంచింది. దాన్ని రూపొందించే క్రమంలో పూర్తి స్వేచ్ఛను ఇస్తున్నట్లు వారు తెలిపారు. సినీ ఇండస్ట్రీకి చెందిన ప్రముఖ స్టార్స్, సాంకేతిక నిపుణులు ఈ సినిమాకి పని చేయబోతున్నారు.
ఇంత మంచి అవకాశం ఇచ్చిన సుభాస్కరన్ గారికి థాంక్స్. ఇది నాకెంతో ఎగ్జయిట్ మెంట్ తో పాటు పెద్ద బాధ్యత. ఇదే సందర్భంలో నాకెంతో సపోర్ట్ అందించిన తమిళ్ కుమరన్ గారికి ప్రత్యేకమైన ధన్యవాదాలు తెలియజేస్తున్నా’ అన్నారు. ఈ సినిమాలో హీరో ఎవరు? ఇతర తారాగణం ఏమిటి అనే విషయాలను త్వరలో వెల్లడించనున్నారు. తన కుమారుడి చిత్రంలో విజయ్ ఏదైనా పాత్ర పోషించబోతున్నారా లేదా అన్నది మాత్రం తెలియదు.
