మాజీ మంత్రి ఈటల రాజేందర్ బీజేపీ తీర్థం పుచ్చుకున్నారు. ఢిల్లీలో బీజేపీ జాతీయ అధ్యక్షుడు జేపీ నడ్డా రావడం ఆలస్యం అవుతున్నందున కేంద్ర మంత్రి ధర్మేంద్ర ప్రధాన్ సమక్షంలో ఈటల రాజేందర్‌తో పాటు మాజీ ఎంపీ రమేష్ రాథోడ్, మాజీ ఎమ్మెల్యే ఏనుగు రవీందర్ రెడ్డి, ఎక్స్ జడ్పీ ఛైర్ పర్సన్ గండ్ర నళిని, టీఆర్ఎస్ నాయకురాలు తుల ఉమ, ఆర్టీసీ కార్మిక సంఘ నేత అశ్వత్థామరెడ్డి, సికింద్రాబాద్ కంటోన్మెంట్ వైస్ ఛైర్మన్ సాద కేశవరెడ్డితో పాటు మరికొందరు నేతలు కాషాయ కండువా కప్పుకున్నారు. కేంద్ర హోంశాఖ సహాయ మంత్రి, సికింద్రాబాద్ ఎంపీ కిషన్ రెడ్డి, బీజేపీ రాష్ట్ర అధ్యక్షుడు బండి సంజయ్, నిజామాబాద్ ఎంపీ ధర్మపురి అర్వింద్, ఆదిలాబాద్ ఎంపీ సోయం బాపురావు, దుబ్బాక ఎమ్మెల్యే రఘునందర్ రావు, పార్టీ జాతీయ ఉపాధ్యక్షురాలు డీకే అరుణ, దేవేంద్ర ప్రధాన్, మురళీధర్ రావు, సీనియర్ నేత ప్రేమేందర్ రెడ్డి, రాష్ట్ర ఇన్‌ఛార్జీ తరుణ్ చుగ్, మాజీ ఎంపీ వివేక్ వెంకట స్వామితో పాటు పలువురు బీజేపీ ప్రముఖుల సమక్షంలో ఈటలతో పాటు మరికొందరు నేతలు బీజేపీలో చేరారు. వీరికి కేంద్ర మంత్రి ధర్మేంద్ర ప్రదాన్ పార్టీ సభ్యత్వం ఇచ్చి పార్టీలోకి ఆహ్వానించారు.
ప్రత్యేక విమానంలో..
సోమవారం ఉదయం 5 గంటలకు శామీర్‌పేటలోని ఆయన నివాసం నుంచి బయలు దేరిన ఈటల రాజేందర్ శంషాబాద్ విమానాశ్రయం నుంచి ప్రత్యేక విమానంలో తన అనుచరులతో కలిసి ఢిల్లీకి బయలు దేరారు. ఈటలతో పాటు పలువురు నాయకులు బీజేపీలో చేరేందుకు సిద్ధమయ్యారు. రెండు ప్రత్యేక విమానాలను బుక్ చేశారు. అయితే కొవిడ్‌ కారణంగా బీజేపీ కేంద్ర కార్యాలయంలోకి ఇరవై మందికి మాత్రమే అనుమతి ఉందని సమాచారం రావడంతో ఓ విమానం కాన్సిల్ అయింది. ఈటలతో పాటు 20 మంది మాత్రమే వెళ్లారు.
టీఆర్ఎస్‌పై సంచలన ఆరోపణలు
మెదక్ జిల్లాలో ప్రభుత్వ, అసైన్డ్ భూముల ఆక్రమణ ఆరోపణల నేపథ్యంలో ఈటల రాజేందర్‌ను మంత్రి వర్గం నుంచి బర్తరఫ్ చేసిన విషయం తెలిసిందే. అయితే ఈ ఆరోపణలు ఉద్దేశపూర్వకంగా చేసినవేనని ఈటల వర్గం చెబుతోంది. మంత్రివర్గం నుంచి ఉద్వాసనకు గురైన తరువాత ఈటల రాజేందర్ అధికార టీఆర్ఎస్‌పై పలు సంచలన ఆరోపణలు చేశారు. మంత్రి హరీష్ రావుతో పాటు పలువురి పేర్లు ప్రస్తావిస్తూ చేసిన ఈ వ్యాఖ్యలు రాజకీయ ప్రకంపనలు చేపాయి. మంత్రి వర్గం నుంచి ఉద్వాసనకు గురైన ఈటల రాజేందర్ తెలంగాణలో ప్రత్యేక పార్టీ పెడతారా లేక బీజేపీ, కాంగ్రెస్ లో చేరతారా అనే చర్చ నడిచింది. నియోజకవర్గంలోని నాయకులతో పాటు రాష్ట్రంలోని పలువురు నాయకులతో జరిగిన భేటీల అనంతరం ఈటల బీజేపీలో చేరేందుకు నిర్ణయం తీసుకున్నారు. ఇటీవలే తన శాసనసభ్యత్వానికి రాజీనామా చేశారు. ఈ సందర్భంగా ఈటల మాట్లాడుతూ ఇక హుజూరాబాద్‌లో రాజకీయ కురుక్షేత్రమే అని, కౌరవులకు, పాండవులకు మధ్య యుద్ధం జరుగుతుందని వ్యాఖ్యానించారు. హుజురాబాద్‌ ఉప ఎన్నికలో డబ్బు సంచులకు, ఆత్మగౌరవానికి మధ్య పోరాటం జరగబోతోందని వ్యాఖ్యానించారు. తన అజెండా లెఫ్ట్ అజెండా అని, తన రాజకీయ ప్రస్థానం అక్కడి నుంచే మొదలైందని, తెలంగాణ ప్రజానీకం అనుభవిస్తోన్న నియంతృత్వ పాలనకు సమాధి కట్టడమే తన లక్ష్యమన్నారు.
తెలంగాణలో నియంత పాలన..
ఇక కశ్మీర్‌లో పర్యటిస్తున్న కేంద్ర హోంశాఖ సహాయ మంత్రి కిషన్ రెడ్డి ఈటల రాజేందర్ బీజేపీలో చేరుతున్న సందర్భంగా తన పర్యటన ముగించుకుని ధిల్లీకి చేరుకున్నారు. ఈటల రాజేందర్ బీజేపీలో చేరిన సందర్భంగా తరుణ్ చుగ్ మాట్లాడుతూ తెలంగాణలో నియంత పాలన నడుస్తోందని, కుటుంబ పాలన సాగుతోందని, కేసీఆర్ పాలనకు స్వస్తి పలికేందుకు బీజేపీ సిద్ధం అవుతోంది, ఈటల రాజేందర్ తో పాటు మరికొందరు కీలక నేతల చేరికతో పార్టీ మరింత బలోపేతం అవుతోందన్నారు. రానున్న కాలంలో తెలంగాణలో బీజేపీ అధికారంలోకి రావడం ఖాయమన్నారు. ఈ సందర్భంగా ఈటల మాట్లాడుతూ తెలంగాణలో బీజేపీ పటిష్టం చేసేందుకు పాటుపడతామన్నారు. తెలంగాణలో అధికారంలోకి వచ్చేందుకు పార్టీ విధివిధానాలకు అనుగుణంగా పనిచేస్తామన్నారు. రానున్న కాలంలో బీజేపీలో మరికొన్ని చేరకలుంటాయన్నారు. బీజేపీ రాష్ట్ర అధ్యక్షుడు బండి సంజయ్ మాట్లాడుతూ తెలంగాణ కోసం పోరాటాలు చేసిన ఈటలతో పాటు ఏనుగు రవీందర్ రెడ్డి, రమేష్ రాథోడ్, తుల ఉమ, గండ్ర నళిని, అశ్వత్థామ రెడ్డి తదితరుల చేరితో పార్టీ బలోపేతం అవుతుందన్నారు. తెలంగాణలో కేసీఆర్ కుటుంబ పాలన నడుస్తోందని, రానున్న కాలంలో కేసీఆర్ కుటుంబం నుంచి తెలంగాణకు విముక్తి వస్తుందన్నారు.
Must Read ;- ఈటల బాటలో మరో నాయకుడు : టీఆర్ఎస్ కు తెలంగాణ సంపత్ గుడ్ బై
