ఆ యువతి క్యాచ్‌ మహాద్భుతం!

Harleen Deol Catch Goes Viral : 

మహిళల క్రికెట్‌లో ఆ యువ క్రికెటర్ పట్టిన క్యాచ్ అందరిని మైమరిపించింది. ఆ అద్భుత క్యాచ్‌తో టీమ్ ఇండియా యువ క్రికెటర్‌ హర్లీన్‌ డియోల్‌ అందరి ప్రశంసలు అందుకున్నారు.

వైరల్ గా మారిన క్యాచ్

ప్రస్తుతం ఇండియా మహిళల జట్టు ఇంగ్లాండ్‌లో పర్యటిస్తోంది. వన్డే సిరీస్‌ ముగియడంతో టీ20 సిరీస్‌ మొదలైంది. నార్తాంప్టన్‌ కౌంటీ మైదానంలో శుక్రవారం రాత్రి తొలి మ్యాచ్‌ జరిగింది. మొదట ఇంగ్లాండ్ టీం బ్యాటింగ్‌ చేస్తోంది. అప్పటికే అమీ జోన్స్‌ 27 బంతుల్లో 43 స్కోరుతో దూకుడు మీదుంది. వాటిలో 4 పోర్లు ,2 సిక్స్‌లు ఉన్నాయి. శిఖా పాండే వేసిన 18.5వ బంతిని భారీ షాట్‌ ఆడగా బౌండరీ వద్ద ఆ బంతిని పట్టుకునేందుకు హర్లీన్‌ డియోల్‌ అద్భుతమే చేసింది. తల మీదుగా వస్తున్న క్యాచ్‌ను ఎడమవైపు గాల్లోకి డైవ్‌ చేసి అందుకుంది. ఈ క్రమంలో బౌండరీ అవతల పడిపోతానని తెలుసుకొని బంతిని గాల్లోకి విసిరింది. బౌండరీ అవతలికి వెళ్లి మళ్లీ గాల్లోని బంతిని అందుకొనేందుకు మైదానంలోకి డైవ్‌ చేసింది. దాంతో విస్తుపోయిన అమీ జోన్స్‌ నిరాశతో పెవిలియన్‌ చేరింది. హర్లీన్‌ను జట్టు సభ్యులు అభినందించారు. ఈ క్యాచ్‌ వీడియో ఇప్పుడు ఇంటర్నెట్లో వైరల్‌గా మారింది. లీసా స్తాలేకర్‌ వంటి క్రికెటర్లు, వ్యాపార వేత్త ఆనంద్‌ మహీంద్రా, అభిమానులు ఆమెను ప్రత్యేకంగా మెచ్చుకున్నారు.

డక్‌వర్త్‌ లూయిస్‌ విధానంలో  విజేత ఇంగ్లాండ్

ఈ మ్యాచ్‌లో టీమ్‌ ఇండియా ఓటమి పాలైంది. మొదట నటాలీ సివర్‌ (55) అమీ జోన్స్‌(43) విధ్వంసకర ఇన్నింగ్స్ ఆడటంతో ఇంగ్లాండ్‌ 177/7 స్కోరు చేసింది. ఆ తర్వాత బ్యాటింగ్‌కు దిగిన హర్మన్‌ సేన 8.4 ఓవర్లకు 3 వికెట్ల నష్టానికి 54 పరుగులు చేసింది. అప్పుడు మొదలైన వర్షం ఆగకపోవడంతో డక్‌వర్త్‌ లూయిస్‌ విధానంలో ఇంగ్లాండ్‌ను విజేతగా ప్రకటించారు.

Nope. Not possible. Couldn’t have happened. Must be some special effects trick. What? It was real? Ok, move over Gal Gadot; the real WonderWoman is here… pic.twitter.com/Cr9STZrVnW

— anand mahindra (@anandmahindra) July 10, 2021