విక్టరీ వెంకటేష్ మూడు సినిమాలతో అంతేగా అంతేగా !

కరోనా తర్వాత పెద్ద హీరోల సినిమాలన్నీ విడుదలకు వరుసగా క్యూ కడుతున్నాయి. విక్టరీ వెంకటేష్ ప్రేక్షకుల ముందుకు వచ్చి చాలా కాలమైంది. 2019లో ఎఫ్ 2తో పలకరించిన వెంకీ ఆ తర్వాత ‘వెంకీమామ’గా నాగచైతన్యతో ప్రేక్షకుల ముందుకు వచ్చాడు.

విక్టరీ వెంకటేష్ కు మహిళా ప్రేక్షకుల ఆదరణ ఎక్కువ. ఈ ఏడాది వరుసగా మూడు సినిమాలతో ప్రేక్షకులను పలక రించబోతున్నారు. అలా వెంకటేష్ ఈ మే 14న ‘నారప్ప’గా రాబోతున్నాడు. ఆగస్టు 27న ‘ఎఫ్ 3’ విడుదల డేట్ ఫిక్స్ అయ్యింది. ఈ మధ్యలో దృశ్యం సీక్వెల్ ‘దృశ్యం 2’ వచ్చేస్తుందన్న మాట కూడా వినిపిస్తోంది. ఏదేమైనా వెంకీమామ సినిమాలతో బిజీ అనే చెప్పాల్సి ఉంటుంది. ‘అయ్యో అయ్యో అయ్యయ్యో’ – అప్పుడెప్పుడో ‘బొబ్బిలిరాజా’ చిత్రంలో వినిపించిన మాట ఇది. ‘అంతేగా అంతేగా’.. ‘ఎఫ్ 2’లో ఈ మాట ఎంతగా నవ్వించిందో మనందరికీ తెలుసు. అది ఎలాంటి మాట అయినా అది పలికే నోటిని బట్టే దాని ప్రభావం ప్రేక్షకుడిపై ఉంటుంది.

ఆయనలోని చిలిపిదనాన్ని ఒలికించే సినిమా ఏదీ ఇంతవరకు ఫెయిల్ కాలేదు. ఇంత చిలిపిదనం ఉన్న ఆయన్ని క్లాస్ హీరో అనాలా మాస్ హీరో అనాలా అన్న సందేహం వచ్చినప్పుడు మనకు దొరికే సమాధానం ఒక్కటే క్లాస్ టచ్ ఉన్న మాస్ హీరో… ఆయనే విక్టరీ వెంకటేష్. విజయం ఎప్పుడూ ఆయన్ని వెన్నంటే ఉంటుంది. వెంకటేష్ జీవితంలో వివాదాలు ఉండవు, సినిమా, ఇల్లు… ఇవే ఆయన జీవితంలో ఎక్కువగా కనిపిస్తాయి. జీవితాన్ని సీరియస్ గా తీసుకునే మనిషి కాదని ఆయన్ని చూస్తేనే అర్థమవుతుంది. నటనను మాత్రం సీరియస్ తీసుకుంటారని సినిమాలు చూస్తుంటే అనిపిస్తుంది.

వెంకీలో తాత్వికుడు

మనం అనుకున్నది అనుకున్నట్లుగా ఏదీ జరగదు. నిజానికి ఆయన నటుడు అవుదామని అనుకోలేదట. మంచి బిజినెస్ మాగ్నెట్ గా ఎదగాలని అనుకున్నట్లు ఒకానొక సందర్భంలో చెప్పారు. తన రెండో కుమారుడు వెంకటేష్ హీరోగా పనికొస్తాడని సురేష్ ప్రొడక్షన్స్ అధినేత డి. రామానాయుడుకు ఎందుకు అనిపించిందోగాని ‘కలియుగ పాండవులు’ సినిమాతో వెంకీని తెరంగేట్రం చేయించేశారు. ప్రఖ్యాతి గాంచిన డాన్ బోస్కో స్కూల్లో చదువు, మోంటెరే ఇన్ స్టిట్యూట్ ఆఫ్ ఇంటర్నేషనల్ స్టడీస్, యు.ఎస్.ఎ. ఎంబిఎ పట్టా… ఇవేమీ ఆయనను బిజినెస్ వైపు మళ్లించలేదు. అందుకే జీవితం ఎటు తీసుకువెళుతుంటే అటే వెళ్లాలనే తాత్వికత వెంకటేష్ లో కనిపిస్తుంది. ఆయనలోని అసలు మనిషి కూడా మనకు బయటకు కనిపించడు.

వెంకీ సినిమాలకు ఆయన పాత్రలే ప్రాణమని చెప్పవచ్చు. ప్రతి సినిమాలోనూ ఆయన మేనరిజమ్స్ ప్రేక్షకులను ఆకట్టుకుంటాయి. ముఖ్యంగా మహిళా ప్రేక్షకులు ఆయనకు బాగా కనెక్ట్ అవుతారు. శోభన్ బాబు తర్వాత అంతగా మహిళల ఆదరణ చూరగొన్న నటుడు వెంకీ అనే చెప్పాలి. స్వర్ణకమలం, బొబ్బిలిరాజా, చంటి, సూర్యవంశం, ప్రేమ, ప్రేమించుకుందాం రా, క్షణక్షణం, ఇంట్లో ఇల్లాలు – వంటింట్లో ప్రియురాలు, పవిత్రబంధం, సీతమ్మవాకిట్లో సిరిమల్లె చెట్టు, గురు, దృశ్యం.. ఇలా చెప్పుకుంటూపోతే ఆయన ప్రత్యేకమైన చిత్రాల చిట్టా చాలానే ఉంటుంది.

వీటిలోని ఆయన పాత్రలను ఎవరూ మరచిపోలేరు. ‘ఘర్షణ’లో సిన్సియర్ పోలీసు ఆఫీసర్ అంటే ఎలా ఉండాలో చూపించారు. ‘సుందరకాండ’లోని మాస్టారి పాత్రగాని, ‘సీతమ్మ వాకిట్లో సిరిమల్లె చెట్టు’లోని పాత్రగాని సహజత్వానికి చాలా దగ్గరగా ఉంటాయి. ‘ఆ పూలకుండీని ఎందుకు తన్నావు రా’ అంటూ తమ్ముడు మహేష్ బాబును అడిగే తీరు ఎంతగా ఆకట్టుకుందో అందిరికీ తెలిసిందే.

Must Read ;- తెలుగులో వెంకీతో జీతూ ‘దృశ్యం 2’

ఆధ్యాత్మిక కోణం

వెంకటేష్ కెరీర్ లో మేనమామకు ప్రాధాన్యమున్న పాత్రలేవీ తెలుగు సినిమాల్లో అంతగా రాలేదు. ఒకవేళ వచ్చినా వాటికి అంత ప్రాధాన్యం కూడా ఏర్పడలేదు. వెంకీ చేతిలో ఇలాంటి పాత్ర పడితే ఎలా ఉంటుందో వెంకీ మామ చూపించింది. మేనల్లుడు చైతు కోసం చేసిన సినిమాగా దీన్ని అనుకోవచ్చు. కాకపోతే ఫలితం అంతంత మాత్రమే. నేను ఎవరు – రమణ మహర్షి బోధించిన ఈ మాట వెంకీ నోట పలకడమంటే ఆశ్చర్యంగానే ఉంటుంది. ఒక వయసు వచ్చాక తప్ప ఆద్యాత్మికత ఎవరికీ ఒంటబట్టదు. వెంకీ విషయంలో అలా కాదు చన్న వయసు నుంచే సత్యశోధన వైపు ఆయన మనసు మళ్లింది.

హిమాలయ గురువుల బోధనలు ఆయనకు బాగా తెలుసంటే ఎవరూ నమ్మలేరు. చిలిపి వెంకటేష్ లో ఇలాంటి కోణం ఒకటుందా అని తెలిసిన వారంతా అనుకుంటూ ఉంటారు. ‘ఆస్ట్రల్ ట్రావెల్’, అవుటాఫ్ బాడీ ఎక్స్ పీరియన్సెస్ లాంటి అనుభవాల గురించి కూడా బాగా అధ్యయనం చేశారు. కర్మకీ, ఈ మానవ జన్మకీ ఎంత అవినాభావ సంబంధముందో ఆయనను కదిపితే తెలుస్తుంది. ఇదే విషయం మీద ఓసారి కదిపితే ‘రమణమహర్షిగానీ, ఏసుప్రభుకానీ, అల్లా కానీ ఎవరైనా సరే.. అంతా మానవులే.. మనలాంటివారే. మనం వారిలా అవ్వలేకపోతున్నాం… అంతే తేడా.. తలచుకుంటే అందరూ అవ్వొచ్చు’ అని వివరించారు.

అందరికీ అది సాధ్యమా అంటే ‘ఎందుకలా అనుకుంటారు.. రోజువారీ పోరాటం ఎప్పుడూ ఉండేదే. ఈ షూటింగ్‌లు, కవరేజ్‌లు మామూలే కదా.. జీవితంలో కొంతసేపు మనం ఏమిటి? అనేది తెలుసుకోవాలి. ఏదైనా భగవద్గీత, రామాయణంలాంటి పుస్తకానికి ఒక్క అరగంట కేటాయించలేరా? ఎవరైనా మహర్షుల గురించి తెలుసుకోవడానికి కాసేపు టైమ్‌ కేటాయించలేరా? అలా కేటాయిస్తే మీకు ఎన్నో విషయాలు తెలుస్తాయి’ అంటారాయన. క్రికెట్ అంటే ప్రాణం. అవసరమనుకుంటే అక్కడికి వెళ్లి వీక్షిస్తారు కూడా. రాజకీయాల గురించి ఎప్పుడూ మాట్లాడిన దాఖలాలు లేవు. వెంకటేష్ ను ఓ ఆధ్యాత్మిక గురువుగా ఆయనను ఓ సినిమాలో చూసినా కూడా మనం ఆశ్చర్యపోవాల్సిన పనిలేదు.

వీలు కుదిరితే హిమాలయాలకు కూడా వెళ్లి వచ్చేస్తుంటారాయన. కొన్ని విషయాల్లో వెంకీకీ, రజనీకాంత్ కూ దగ్గరి పోలికలు కనిపిస్తాయి. 33 ఏళ్ల నట జీవితంలో కాంట్రవర్సీ లు లేకుండా ఎలా సాధ్యం అనే సందేహం ఎవరికైనా వస్తుంది. దీనికి ఆయన సమాధానం ఒక్కటే ‘కాంట్రవర్సీ లేదంటే… గత జన్మలో అంతా అయిపోయి ఉంటుందన్న మాట. అప్పుడే ఈ జన్మలో ఏం ఉండకూడదో అన్నీ అనుభవించి ఉంటాను. అందుకే ఈ జన్మలో అలాంటివాటికి దూరంగా ఉన్నాను. అది కూడా మనం చేసిన పాపపుణ్యాలను బట్టే ఉంటుంది’ అంటూ తాత్విక ధోరణిలోనే సమాధానం చెబుతారాయన. సురేష్ ప్రొడక్సన్స్ లో ఈ అన్నదమ్ముల ఆత్మీయతానుబంధం అందరినీ ఆకర్షిస్తూ ఉంటుంది.

– హేమసుందర్ పామర్తి

Also Read ;- తరుణ్ భాస్కర్ డైరెక్షన్లో వెంకీ!