మంగళగిరిలో అధికార పార్టీ ఎమ్మెల్యే ఆర్కేకి అక్కడి ప్రజలు మంగళం పాడబోతున్నారా ? ఎమ్మెల్యే వ్యవహార శైలితో ద్వితీయ శ్రేణి నాయకులు, క్యాడర్ విసిగివేసారిపోయారా ? సొంత పార్టీ నేతలపైనే ఆర్కే ప్రతాపం చూపిస్తున్నారా ? ఆర్కే తీరును నిరసిస్తూ సొంత సామాజికవర్గం నిర్వహించిన రహస్య సమావేశంలో ఏం తేల్చేశారు ?
మంగళగిరి వైసీపీ ఎమ్మెల్యే ఆళ్ళ రామకృష్ణ రెడ్డి అలియాస్ ఆర్కేకి అక్కడి ప్రజలు మంగళం పాడడం ఖాయంగానే కనిపిస్తోంది. సొంత పార్టీ, సొంత సామాజిక వర్గం నుంచి కూడా ఆయనపై వస్తున్న వ్యతిరేకతతో రాబోయే ఎన్నికల్లో ఆర్కే ఓటమి ఖాయమనే చర్చ పొలిటికల్ సర్కిల్స్ లో బలంగా వినిపిస్తోంది. ముఖ్యంగా ఎమ్మెల్యే వ్యవహార శైలితో ద్వితీయ శ్రేణి నాయకులు, క్యాడర్ పూర్తిగా విసిగి వేశారనిపోయారని.. ఈ క్రమంలో వారంతా ఆయనను కనీసం పట్టించుకోవడం లేదని సమాచారం.
వాస్తవానికి అధికార పార్టీ ఎమ్మెల్యేగా ఉన్న ఆర్కే ప్రతిపక్ష పార్టీని వదిలేసి సొంత పార్టీ నాయకులు, కార్యకర్తలను వేధిస్తున్నారట.అధికారులను పావులుగా వాడి వేధింపులకు గురిచేస్తున్నారట.తనకు అనుకూలంగా లేరనే కారణంతో సొంత పార్టీ నేతలను ఆర్ధికంగా, రాజకీయంగా దెబ్బతీయడమే పనిగా పెట్టుకున్నారట ఆర్కే. దీనికి తనకున్న అధికారాన్ని అడ్డుపెట్టుకుని పోలీసులు ఇతర అధికారులతో వారిపై దాడులు కూడా జరిపిస్తున్నారట. ఇప్పటికే నియోజకవర్గానికి చెందిన పలువురు నేతలను టార్గెట్ చేసి వారిపై తన మార్క్ వేధింపుల రుచి చూపిస్తున్నారట.
ఉండవల్లి కి చెందిన మాజీ ఎంపిటిసి కళ్ళం సంజీవ రెడ్డి, తాడేపల్లి వైసిపి టౌన్ ప్రెసిడెంట్ వేణు గోపాల్ రెడ్డి, పార్టీలో కీలక నేతలైన గోపిరెడ్డి, దొంతి రెడ్డి వేమా రెడ్డి లు సైతం ఎమ్మెల్యే ఆర్కే టార్గెట్ లో ఉన్నవారేనట. దీంతో వారితో పాటు వారికి మద్దతు గా నిలిచే వారి ఆస్తులు పై అనేక కేసులు, దాడులు చేయిస్తున్నారట. అయితే దీని వెనుక ఆర్ధిక పరమైన అంశాలు కూడా ఉన్నాయనే చర్చ తెరపైకి వస్తోంది. తాడేపల్లి కి చెందిన ఎస్సి నాయకుడు డేవిడ్ కూడా ఆర్కే బాధితుడేనట.ఎన్నికల సమయంలో ఎంతగానో ఉపయోగించుకుని, తర్వాత రాజకీయంగా ఆయనను అణచివేసే ధోరణిలో ఆర్కే వ్యవహరిస్తున్నారనే ఆవేదన ఆయన వర్గీయుల నుంచి వినిపిస్తోంది.
నిజానికి వేణుగోపాల్ రెడ్డి గత ఎన్నికల్లో ఆర్కే గెలుపు కోసం తీవ్రంగా శ్రమించిన వారిలో ఒకరు. అంతేకాకుండా ఎన్నికల సమయంలో ఆర్కేకు ఆర్ధికంగా కూడా ఆయన ఎంతో సహాయ పడ్డారు. సుమారు 12 కోట్ల రూపాయలు ఎన్నికల్లో ఖర్చు చేశారు. అయితే ఎన్నికల తర్వాత తిరిగి డబ్బులు చెల్లిస్తానని చెప్పిన మాట వట్టి మాట గానే మిగిలిపోగా వడ్డీగా వేధింపులు, బెదిరింపులు ఆయనుకు దక్కాయట.అంతేకాకుండా వేణు గోపాల్ రెడ్డి ఇంటిపై , ఆయన కంపెనీలపై రైడ్స్ విషయంలోనూ ఆర్కే తెర వెనుక యంత్రాంగం నడిపించారని సమాచారం.అలాగే పార్టీలో కీలక నేతలుగా ఉన్న గోపిరెడ్డి, దొంతి రెడ్డి వేమా రెడ్డి ని సైతం ఎమ్మెల్యే ఆర్కే డైరెక్ట్ గా టార్గెట్ చేసి.. వారి ఆర్ధిక మూలాలపై దాడులు , భవనాల కూల్చివేతలు చేయించారట.దీంతో నియోజకవర్గంలో ఆర్కే బాధితుల సంఖ్య రోజురోజుకి చాంతాడు అంత అవుతొందనే వాదన వైసీపీ వర్గాల్లో బలంగా వినిపిస్తోంది.
దీంతో కులాలు, మతాలు, ప్రాంతాలకు అతీతంగా మంగళగిరి ఎమ్మెల్యే ఆళ్ల రామకృష్ణా రెడ్డి వ్యతిరేక వర్గం అంతా ఒక్కతాటి పైకి వస్తోందట.ఆర్కే వ్యవహార శైలి, సొంత పార్టీ నాయకులు, కార్యకర్తల పైనే వేధింపులు, కేసులు, ఆస్తుల ధ్వంసం వంటి అనేక అంశాలు వ్యతిరేక వర్గాన్ని ఐక్యం చేస్తున్నాయని టాక్.ఈ క్రమంలోనే వ్యతిరేక వర్గం అంతా కలిసి ఇప్పటికే ఒక రహస్య సమావేశం కూడా నిర్వహించుకున్నారట.అదేసమయంలో ఎమ్మెల్యే అరాచకాలకు అడ్డుకట్ట వెయ్యడానికి ప్రత్యక్ష యుద్దానికి దిగాలని నిర్ణయించుకున్నారట.అందులో భాగంగా సీఎం జగన్ ను , సజ్జలను నేరుగా కలిసి నియోజకవర్గంలో జరుగుతున్న అవినీతి, అధికారులతో కలిసి ఎమ్మెల్యే ఆళ్ల చేస్తున్న అవినీతి పై ఫిర్యాదు చేసేందుకు సిద్ధమయ్యారనే చర్చ వైసీపీ వర్గాలలో జోరందుకుంది.అయితే ఈ విషయం లీక్ అవ్వడంతో ఆర్కే తన వ్యతిరేక వర్గానికి సీఎం అపాయింట్మెంట్ దక్కకుండా వ్యూహం మొదలుపెట్టినట్టు సమాచారం.కాగా, తమకు సిఎం అపాయింట్మెంట్ ఇవ్వకపోతే బహిరంగ పోరాటం, సహాయ నిరాకరణ స్టార్ట్ అవుతుంది అని వ్యతిరేక వర్గం సవాల్ విసురుతొందట.
ఇదిలా ఉంటే ఆర్కేకు ఇప్పటికే వ్యతిరేక వర్గం సెగ తగిలిందనే అభిప్రాయాలు వ్యక్తమవుతున్నాయి. గడప గడపకు కార్యక్రమంలో వైసిపి నేతలకి ఎదురవుతున్న అనుభవాలు నియోజకవర్గంలోని అంతర్గత పోరుకి నిదర్శనమని విశ్లేషకులు భావిస్తున్నారు.ఎమ్మెల్యే ఆర్కే ఇప్పటికే ఒంటరి అయ్యారని.. గడప గడపకు కార్యక్రమంలో ముఖ్య నాయకులు ఎవరూ ఆయన వెంట రావడం లేదని, ఇప్పుడు ఆర్కే వెంట ఉన్నది కేవలం ఆయన స్వభావం ఏంటో తెలియని వాళ్ళు, ఎదో ఉద్ధరిస్తాడు అనే నమ్మకంతో కొత్తగా వచ్చిన వారే తప్ప అసలైన వైసిపి నేతలు, క్యాడర్ ఎవరూ ఆయన వెంట కనపడటం లేదు. త్వరలోనే మంగళగిరి లో ఆర్కే కి సొంత క్యాడర్, సొంత రెడ్డి సామాజిక వర్గం నేతలే మంగళం పాడటం ఖాయమని బహిరంగంగానే చర్చించుకుంటున్నారు.
