అ’స్పిన్’ మ్యాజిక్‌.. టీమిండియా ఉచ్చులో ఇంగ్లాండ్ ఢమాల్‌!

చెన్నైలో టీమిండియా లెక్క సరి చేసినట్టే! తొలి టెస్టులో ఎదురైన ఘోర పరాభవాన్ని చెరిపేసినట్టే!  తొలిరోజు బ్యాట్‌‌తో సత్తాచాటిన టీమ్‌ ఇండియా.. రెండోరోజు బంతితో హడలెత్తించింది. మొదటి టెస్టులో ఇదే మైదానంలో నానా అవస్థలు పడిన భారత బౌలర్లు.. ఈసారి ప్రత్యర్థి బ్యాట్స్‌మెన్‌ను వణికించారు. అశ్విన్ మ్యాజిక్ షోతో రూట్‌ బృందం 134 పరుగులకే చేతులెత్తేసింది. ఫలితంగా.. 9 వికెట్లు చేతిలో ఉంచుకున్న భారత్‌ ఇప్పటికే 249 పరుగుల ఆధిక్యంతో శాసించే స్థితికి చేరుకుంది.

విజయానికి టీమిండియా బాటలు..

చెపాక్‌లో ఇంగ్లాండ్‌పై ప్రతీకార విజయానికి టీమిండియా బాటలు వేసుకుంది. సమష్టి కృషితో భారత్‌ రెండో టెస్టులో తిరుగులేని స్థితిలో నిలిచింది. తొలి టెస్టులో ఎదురైన ఘోర పరాభావానికి ప్రతీకారం తీర్చుకునే దిశగా దూసుకెళుతోంది. రెండో రోజే పర్యాటక జట్టును తక్కువ స్కోరుకే కట్టడి చేసిన భారత జట్టు.. భారీ ఆధిక్యం దిశగా పరుగులు తీస్తోంది. 195 పరుగుల తొలి ఇన్నింగ్స్ ఆధిక్యంతో చివరి సెషన్లో బ్యాటింగ్ ఆరంభించిన ఆతిథ్య టీమ్.. రెండో రోజు ఆటముగిసే సమయానికి ఒక వికెట్ కోల్పోయి 54 పరుగులు చేసింది. దీంతో మొత్తం ఆధిక్యం 249 పరుగులకు చేరింది. తొలి ఇన్నింగ్స్‌లో శతక్కొట్టిన ఓపెనర్ రోహిత్ శర్మ (25)తో పాటు ఫస్ట్‌డౌన్లో వచ్చిన పుజారా(7) క్రీజులో ఉన్నారు.

పటిష్ట స్థితిలో భారత్..

ఇంగ్లండ్ తొలి ఇన్నింగ్స్‌లో 134 పరుగులకు ఆలౌట్ అయింది. దీంతో ఆ జట్టు మరోసారి బ్యాటింగ్‌కు వస్తుందని భావించారు. కానీ.. ప్రత్యర్థి ముందు భారీ లక్ష్యాన్ని నిర్దేశించాలనే వ్యూహంతో.. ఫాలోఆన్ ఆడించకుండానే భారత్ బ్యాట్స్ మెన్ క్రీజులోకి అడుగుపెట్టారు. తొలి ఇన్నింగ్స్‌లో డకౌట్ అయిన ఓపెనర్ శుభ్మన్ గిల్(14) నిలకడగా బ్యాటింగ్ చేస్తూ.. నిలదొక్కుకునే క్రమంలోనే జాక్ లీచ్ అతడిని వికెట్ల ముందు దొరకబుచ్చుకున్నాడు. దీంతో 42 పరుగులకు తొలి వికెట్ కోల్పోయింది టీమ్ ఇండియా.

అశ్విన్ మాయాజాలం..

స్పిన్నర్ అశ్విన్ మాయాజాలం చేశారు. అశ్విన్ ధాటికి ఇంగ్లాండ్ ఎంతోసేపు క్రీజులో నిలదొక్కుకోలేక పోయింది. కీలక టెస్టులో ఐదు వికెట్లు తీసి అరుదైన ఘనత సాధించారు. ఎన్నో రికార్డులను సొంతం చేసుకున్నారు. కెరీర్‌లో మొత్తంగా 29సార్లు ఇన్నింగ్స్‌లో ఐదు వికెట్లను తీయగా ఇందులో స్వదేశంలోనే 23 సార్లు ఈ ఫీట్‌  సాధించారు. ఈ విషయంలో అతను అండర్సన్‌ (22)ను అధిగమించారు. సొంత గడ్డపై అత్యధికంగా ఐదు వికెట్లను తీసిన వారిలో మురళీధరన్‌ (45), హెరాత్‌ (26), కుంబ్లే (25) అతడికంటే ముందున్నారు. అంతే కాకుండా భారత్‌లో ఎక్కువ టెస్టు వికెట్లు (268) సాధించిన రెండో బౌలర్‌ అయ్యారు. కుంబ్లే (350) తొలి స్థానంలో ఉండగా హర్భజన్‌ (265)ను అశ్విన్‌ అధిగమించారు. దీనికితోడు 200 సార్లు లెఫ్ట్‌ హ్యాండర్స్‌ను అవుట్‌ చేసిన తొలి బౌలర్‌గానూ రికార్డులకెక్కారు. ఇందులో అత్యధికంగా డేవిడ్‌ వార్నర్‌ (10సార్లు) వికెట్‌ తీశారు.

Must Read ;- రోహిత్ నైన్టీ ఫీవర్.. రితికా హార్ట్ లబ్‌..డబ్‌!