మహేష్ అభిమానులకు తమన్ ట్వీ(స్వీ)ట్

సంక్రాంతికి ‘సరిలేరు నీకెవ్వరు’ సినిమాతో ఇండస్ట్రీ హిట్ ఇచ్చిన టాలీవుడ్ సూపర్ స్టార్ మహేష్ బాబు ప్రస్తుతం ‘సర్కారు వారి పాట’తో ప్రేక్షకుల ముందుకు రానున్నాడు. పరశురామ్ దర్శకత్వంలో తెరకెక్కుతున్న ఈ సినిమాలో మహేష్ బ్యాంకు ఆఫీసర్ గా నటించనున్నాడని సమాచారం. కీర్తి సురేష్ హీరోయిన్ గా నటిస్తున్న ఈ సినిమాకి థమన్ సంగీతాన్ని అందిస్తున్నారు. మహేష్ పుట్టిన రోజు సందర్భంగా ఆగష్టు 9న టైటిల్ సాంగ్ విడుదల చేయనున్నట్లు థమన్ ట్వీట్ చేశారు. థమన్ చేసిన ట్వీట్ తో మహేష్ అభిమానులు ఫుల్ జోష్ లో ఉన్నారు. ఈ సినిమాలో విలన్ గా బాలీవుడ్ నటుడు సునీల్ శెట్టి నటించనున్నాడని వార్తలు ప్రచారంలో ఉన్నాయి. కరోనా కారణంగా ఈ సినిమా రెగ్యులర్ షూటింగ్ ఇంకా ప్రారంభం కానీ సంగతి తెలిసిందే. నవంబర్ రెండో వారం నుంచి ఈ సినిమా రెగ్యులర్ షూటింగ్ ప్రారంభం కానుంది. శరవేగంగా షూటింగ్ పూర్తి చేసి ఈ సినిమాను వచ్చే ఏడాది సమ్మర్ లో విడుదల చేయాలని చిత్ర యూనిట్ ప్లాన్ చేస్తోంది.
అయితే మహేష్ బాబు ఆగష్టు 9న 45 వసంతంలోకి అడుగుపెట్టనున్నారు. మహేష్ అభిమానులు ఈ రోజు కోసం ఎప్పటి నుంచో ఎదురుచూస్తున్నారు. కానీ ప్రస్తుతం నెలకొన్న పరిస్థితుల దృష్ట్యా ఆయన తన అభిమానులకు కీలక సూచనలు చేశారు. ” ప్రియమైన అభిమానులకు.. మీరందరూ నాకు తోడుగా ఉండడం నా అదృష్టం. నా పుట్టినరోజు, ఒక ప్రత్యేకమైన రోజుగా గుర్తుండాలని మీరు చేస్తోన్న మంచి పనులకు చాలా సంతోషంగా ఉంది. అందుకు మీ అందరినీ అభినందిస్తున్నాను. ప్రస్తుతం కరోనాతో మనమందరం చేస్తోన్న ఈ యుద్ధంలో సురక్షితంగా ఉండడం అనేది అన్నిటికంటే ముఖ్యం. నా పుట్టినరోజున అభిమానులందరూ సామూహిక వేడుకలకు దూరంగా ఉండాలని కోరుకుంటున్నాను. ప్రేమతో మీ మహేశ్ బాబు” అంటూ ట్వీట్ చేశారు.