బుల్లి తెరమీద యాంకర్ గా బాగా పాపులరై.. మంచి ఫాలోయింగ్ సంపాదించుకున్న ప్రదీప్ మాచిరాజు వెండితెరమీద హీరోగా తొలి ప్రయత్నంగా నటించిన ప్రేమకథా చిత్రం ‘30 రోజుల్లో ప్రేమించడం ఎలా’? కొత్త కుర్రోడు మున్నా దర్శకత్వంలో ఈ సినిమా తెరకెక్కింది. ఇందులోని నీలి నీలి ఆకాశం అనే పాట విడుదలకు ముందే మిలియన్స్ వ్యూస్ తెచ్చుకుని ప్రేక్షకుల్లో అంచనాల్ని పెంచేసింది. మరి పాట అంత అందంగా సినిమా కూడా ఉందా? ప్రేక్షకుల్ని ఏ స్థాయిలో మెప్పించింది అనే విషయాలు.. విశేషాలు రివ్యూలో చూద్దాం.
కథేంటి?
అరకులోయలోని ఒక కొండ ప్రాంతంలో ఒక సిద్ధుడు (శుభలేఖ సుధాకర్ ), అతడి శిష్యుడు (జబర్దస్త్ మహేశ్) సంభాషణల మీద కథ ప్రారంభమవుతుంది. అసలు ఈ లోకంలో నిజమైన ప్రేమ ఎక్కడన్నా ఉందా అని శిష్యుడు అడిగిన ప్రశ్నకు సమాధానంగా ప్రేమంటే రెండు శరీరాల కలయిక కాదు . రెండు మనసుల కలయిక అని చెబుతూ.. గతంలో జరిగిన ఓ ప్రేమకథను వివరిస్తాడు గురువు.
మన దేశానికి స్వాతంత్ర్యం రాకపూర్వం అదే ప్రాంతంలో ఒకరి మీద మరొకరికి కోపం కారణంగా ప్రాణంగా ప్రేమించుకున్న ఓ ఇద్దరు ప్రేమికులు చనిపోతారు. అప్పుడు దక్కించుకొలేని వారి ప్రేమను మరో జన్మ ఎత్తి మళ్ళీ ప్రేమలో పడి ఒకటవుతారు. ఆ ఇద్దరూ ఇక్కడికే వస్తారు. అంటూ ఆ ప్రాంతంలో ఒక సర్కిల్ గీస్తాడు గురువు. ఇందులోకి ఆ ఇద్దరూ ఎప్పుడైతే వస్తారో అప్పుడు ఒక అద్భుతం జరుగుతుందని చెబుతాడు.
ఇక ప్రెజెంట్ కథలోకి వస్తే…
అక్షర ( అమృతా అయ్యర్ ), అర్జున్ (ప్రదీప్ ) ఒకే కాలేజ్ లో చదువుకుంటూ ఉంటారు. కానీ ఆ ఇద్దరికీ ఒకరంటే మరొకరికి పడదు. అర్జున్ అల్లర చిల్లరగా తిరుగుతూ.. చదువుని నిర్లక్ష్యం చేస్తూ .. బాక్సింగ్ మీద ఫోకస్ పెడుతూ.. తండ్రి (శివన్నారాయణ నారిపెద్ది)ని చిరాకు పెడుతూ ఉంటాడు. తల్లి (హేమ) ప్రేమను అర్ధం చేసుకోకుండా ఫ్రెండ్స్ తో లైఫ్ ను ఎంజాయ్ చేస్తూ ఉంటాడు. అక్షరకి మరో సమస్య ఉంటుంది. ఆమె అక్క ప్రేమించి పెళ్లిచేసుకొని తండ్రి నిరాదరణకు గురవుతుంది. తండ్రి ఎప్పటికైనా తన ప్రేమను అర్ధం చేసుకుంటాడనే ఆశతో ఉంటుంది. ఇలా సాగుతున్న ఈ ఇద్దరి జీవితం అరకులోయ టూర్ కు వెళ్ళినప్పుడు విచిత్రం గా మారిపోతుంది. సిద్ధుడు గీసిన సర్కిల్ లోకి అనుకోకుండా వచ్చిపడేసరికి ఇద్దరి శరీరాలు ఎక్స్ చేంజ్ అవుతాయి. హీరో బాడీలో హీరోయిన్, హీరోయిన్ బాడీలోకి హీరో ప్రవేశిస్తారు. ముప్పై రోజుల్లో మీరిద్దరూ నిజమైన ప్రేమలో పడి .. ఇక్కడికి వస్తే ఎవరి శరీరాలు వారికి వస్తాయని చెబుతాడు. మరి ఆ ఇద్దరూ నిజంగా ప్రేమలో పడతారా? చివరికి ఏం జరుగుతుంది అనేదే మిగతా కథ.
ఎలా చేశారు? ఎలా తీశారు?
ఇది రొటీన్ గా ఉండే ప్రేమకథ కాదని దర్శకుడు ట్రైలర్ లోనే జనానికి హింటిచ్చాడు. అలాగే.. పునర్జన్మల నేపథ్యంలోని కథ అని చెప్పకనే చెప్పాడు. అయితే దర్శకుడు తెలివిగా గత జన్మ మీద ఎక్కువ ఫోకస్ పెట్టకుండా.. ప్రెజెంట్ కథతోనే ఎక్కువగా సన్నివేశాల్ని రాసుకోవడం..దానికి తగ్గట్టుగానే కథని కామెడీ, సెంటిమెంట్, ఎమోషన్స్ తోనూ నడిపించాలని ప్రయత్నించాడు. అయితే అందులో కొంతవరకే సక్సెస్ అయ్యాడని చెప్పుకోవాలి. సాధారణంగా పూర్వజన్మల నేపథ్యంలోని సినిమాల్లో .. హీరో, హీరోయిన్స్ కి ఏదో ఒక సన్నివేశం వద్ద వారికి గత జన్మల జ్ఞాపకాలు గుర్తుకు వస్తాయి. కానీ ఈ సినిమాలో అలాంటిదేమీ కనిపించదు. అసలు హీరో, హీరోయిన్స్ ఒక శరీరంలో ఉన్న మరొకరు .. వారి వారి సమస్యల్ని పరిష్కరించుకోవడం అనే పాయింట్ చుట్టూనే ఈ మొత్తం కథను రాసుకున్నాడేమోననే సందేహం కలుగుతుంది. నిజానికి ఆ పాయింట్ ను జంధ్యాల గారి ‘రావూ గోపాలరావూ’ అనే సినిమా నుంచి ప్రేరణ పొందినట్టు కూడా అనిపిస్తుంది. ఇక ఇందులోని కొన్ని సన్నివేశాలు బోర్ కొట్టిస్తాయి. మరికొన్ని సన్నివేశాలు నవ్వు పుట్టిస్తాయి. మరికొన్ని సన్నివేశాలు ఎమోషనల్ గా కదలిస్తాయి.
ప్రదీప్ మాచిరాజు .. టీవీషోస్ లో బిహేవ్ చేసినట్టే తన సహజమైన నటనతో మెప్పించాడు. అలాగే. కథానాయిక అమృతా అయ్యర్ కాస్తంత ఎక్కువ మోతాదులోనే గ్లామర్ ను ప్రదర్శించింది. అలాగే.. కొన్ని సీన్స్ ను చాలా బోల్డ్ గా నటించింది. అప్పుడు మనకి హెబ్బా పటేల్ గుర్తుకొస్తుంది. ఇక నీలి నీలి ఆకాశం పాట.. మేకింగ్ పరంగా బాగానే మెప్పిస్తుంది. మిగతా పాటలు ఓకే. ఇంకా హర్షా కామెడీ మెప్పిస్తుంది, పోసాని సెంటిమెంట్ సీన్స్ ఆకట్టుకుంటాయి. టోటల్ గా 30 రోజుల్లో ప్రేమించడం ఎలా అనే సినిమా స్టోరీ లైన్ కామెడీ అనిపించినా.. సినిమా పర్వాలేదనిపిస్తుంది.
హైలైట్స్ : హీరో, హీరోయిన్స్ శరీరాలు ఎక్స్ ఛేంజ్ అయినప్పుడు వచ్చే సన్నివేశాలు బాగా ఎంటర్ టైన్ చేస్తాయి.
నటీనటులు : ప్రదీప్ మాచిరాజు, అమృతా అయ్యర్ , వైవా హర్షా, శివన్నారాయణ నారిపెద్ది, పోసాని కృష్ణమురళి, హేమ, సమీర్, శుభలేఖ సుధాకర్, జబర్దస్త్ మహేశ్ తదితరులు.
సంగీతం : అనూప్ రూబెన్స్
సినిమాటో గ్రఫీ : దాశరథి శివేంద్ర
బ్యానర్ : యస్వీ ప్రొడక్షన్స్
నిర్మాత : యస్వీ బాబు
దర్శకత్వం : మున్నా ధూళిపూడి
విడుదలతేదీ : జనవరి 29, 2021
ఒక్కమాటలో : నీలి నీలి ఆకాశమంత గొప్పగా లేదు
రేటింగ్ : 2.5
-ఆర్కే
