ఆడు మగాడ్రా బుజ్జీ : నాడు శేషన్.. నేడు నిమ్మగడ్డ!

(విశాఖపట్నం నుంచి లియో న్యూస్ ప్రతినిధి)

‘ఆడు మగాడ్రా బుజ్జి.. ఎవడైనా కోపంగా కొడతాడు.. లేపోతే.. బలంగా కొడతాడు.. వీడు ఏంట్రా చాలా శ్రద్ధగా కొట్టాడు..’

రాష్ట్ర ఎన్నికల కమిషనర్ నిమ్మగడ్డ రమేష్ కుమార్ గురించి ప్రస్తుతం రాష్ట్రంలో తీవ్రమైన చర్చ జరుగుతోంది. ‘ అతడు’ చిత్రంలోని ఓ సన్నివేశాన్ని గుర్తు చేస్తోంది.
ఎన్నికల సంస్కరణల విషయంలో..  టిఎన్ శేషన్ తనదైన ముద్ర వేస్తే… ఎన్నికల నిర్వహణ కోసం నిమ్మగడ్డ రమేష్ ఒకే ఒక్కడు గా నిలిచారు.

సంచలనం టిఎన్ శేషన్..

కేంద్ర ముఖ్య ఎన్నికల కమిషనర్ గా సంచలనం రేపిన వ్యక్తి టిఎన్ శేషన్. పారదర్శకతకు, సమర్థతకు పర్యాయపదాలుగా కేంద్ర ఎన్నికల కమిషనర్ గా ఆయన బాధ్యతల నిర్వహణ సాగింది. దేశ ఎన్నికల నిర్వహణ ముఖచిత్రాన్ని సమూల మార్పుల తో తన ముద్ర వేసిన వ్యక్తి. ఆయన ఎన్నికల సంస్కరణలను రాజకీయ వర్గాలు, మీడియా ఇలా అనేక రకాలు వ్యతిరేకించినా.. ఆయన అనుకున్న విధానాలను ప్రవేశపెట్టడంలో వెనకడుగే వేయలేదు. ఒకానొక సమయంలో ఆయన్ను “ఎలక్షన్ వాచ్ డాగ్” గా అభివర్ణించేవారు. శేషన్
తీసుకొచ్చిన సంస్కరణల కారణంగా… ఎన్నికల్లో ధన ప్రవాహానికి అడ్డు పడింది. ఎన్నికల సంఘానికి ఉన్న విశేష అధికారాలను వినియోగించడంలో అగ్రస్థానంలో నిలిచారని చెప్పాలి. అందుకే ఆయన కమిషనర్‌గా ఉన్న సమయంలో “ శేషన్ వెర్సస్ నేషన్”గా చెప్పేవారు.

చాలా ఏళ్ళ తరువాత..

ఎన్నికల సంఘానికి ఉన్న ప్రత్యేక అధికారాలు ఎటువంటివో మరోమారు రాష్ట్ర ఎన్నికల సంఘం కమిషనర్ రమేష్ కుమార్ ప్రపంచానికి చాటిచెప్పారు. ఆదినుంచి ఆయన పై జరుగుతున్న దాడిని ఎదుర్కొంటూ… చిట్ట చివరకు విజయం సాధించారు. స్వయం ప్రతిపత్తి కలిగిన రాజ్యాంగ సంస్థల నిర్ణయాల ముందు… మరేవీ నిలబడవని నిరూపించారు. స్థానిక సంస్థల ఎన్నికల ప్రస్తావన వచ్చినప్పటినుంచి ఎన్నికల సంఘం వర్సెస్ ప్రభుత్వం మధ్య యుద్ధం జరుగుతూనే ఉంది. న్యాయవ్యవస్థ అండతో.. రమేష్ కుమార్ అంతిమంగా ఎన్నికల నిర్వహణకు కావలసిన ఆదేశాలు సుప్రీం కోర్టు ద్వారా సాధించగలిగారు.

Must Read ;- నిమ్మగడ్డ చెప్పినట్లే ఎన్నికలు జరుగుతాయి : సజ్జల

ప్రభుత్వ యంత్రాంగం ఒకవైపు… అతనొక్కడే మరోవైపు..

151 మందికి పైగా అధికార పార్టీకి చెందిన ఎమ్మెల్యేలు.. మంత్రులు.. పార్టీ నాయకులు.. పార్టీ సానుభూతిపరులు మూకుమ్మడిగా ఎన్నికల కమిషన్ తీరుపై నిప్పులు చెరుగుతూ వచ్చారు. గతంలో స్థానిక ఎన్నికలను రద్దు చేస్తూ తీసుకున్న నిర్ణయానికి … పర్యవసానంగా ఆయనను పదవి నుంచి తప్పించడం.. ఆయన స్థానంలో కనగరాజన్‌ను నియమించటం.. ఆపై కోర్టు జోక్యంతో మళ్లీ ఆయన తన పదవిని పదిల పంచుకోవడం జరిగింది. అప్పటి నుంచి ఎస్ఈసి ప్రతి నిర్ణయాన్ని.. వైఎస్సార్సీపీ నేతలు, అధికారులు వ్యతిరేకిస్తూనే వస్తున్నారు. ఉన్నత హోదాలో ఉన్న వ్యక్తిని నోటికి వచ్చినట్టు మాట్లాడుతూ.. కించపరుస్తూ… అనేక విధాలుగా అవమానపరుస్తూ నే ఉన్నారు.

అయినప్పటికీ రమేష్ కుమార్ ఆత్మవిశ్వాసాన్ని కోల్పోలేదు. రాష్ట్ర ప్రభుత్వం తనపై కత్తులు దూస్తున్నా భయపడలేదు. తాను తీసుకుంటున్న నిర్ణయాలు న్యాయమైనవి అనే నమ్మకం.. స్వలాభం కోసం.. ఇతరుల కోసం.. తీసుకుంటున్నవి కాదన్న విశ్వాసం ఆయన విజయం సాధించేలా చేశాయి. ఒక్క వ్యక్తి ఇంత పెద్ద వ్యవస్థ పై పోరాటం చేస్తున్న తీరు రాష్ట్ర వ్యాప్తంగా హీరోగా నిలబెట్టాయి. ప్రభుత్వం ఏ కోర్టు గుమ్మం తొక్కినా … రమేష్ కుమార్ నిర్ణయాన్ని బలపరచడంతో ఎస్ఈసి నిర్ణయాల పట్ల ప్రజల్లో విశ్వాసం పెరిగింది.

ప్రభుత్వం మొండిగా వ్యవహరిస్తున్న విషయం అర్థమైంది. చివరకు సుప్రీంకోర్టు కూడా ఇదే విషయాన్ని ప్రస్తావించింది. భవిష్యత్తులో ఎదురయ్యే పరిణామాల గురించి భయపడకుండా… రమేష్ కుమార్ ఎన్నికల నిర్వహణ కోసం చూపిన తెగువ ప్రశంసలందుకుంటోంది. నాటి టిఎన్ శేషన్ వైఖరిని గుర్తు చేసింది. అతనితో పోలిక సమతూకం కానప్పటికీ… రాజకీయ పార్టీలపై పోరాటం సాగించిన తీరును గుర్తు చేస్తోంది.

పట్టువదలని విక్రమార్కుడిలా రమేష్ కుమార్ ఎన్నికల నిర్వహణకు వేస్తున్న అడుగుల పై ఒక్క అధికార పార్టీ తప్ప… సామాన్యులు సైతం మెచ్చుకుంటున్నారు. పట్టుదలకు, మొండి తనానికి, వితండవాదానికి… తనదైన శైలిలో బుద్ధిచెప్పిన రమేష్ కుమార్ ‘మగాడ్రా బుజ్జీ..’’.. అని సరదాగా వ్యాఖ్యానించుకుంటున్నారు.

ఎన్నికల రీషెడ్యూల్..

రాష్ట్ర ఎన్నికల సంఘం ఎన్నికలను రీషెడ్యూల్ చేసింది. మొదటి విడత ఎన్నికల నోటిపికేషన్ ను నాలుగోవిడతకు వాయిదా వేసి, రెండో విడత షెడ్యూల్ ని మొదటి షెడ్యూల్ గా మార్చుతూ ఎన్నికల సంఘం నిర్ణయం తీసుకుంది. గత షెడ్యూల్‌ ప్రకారం ఫిబ్రవరి 5, 9, 13, 17 తేదీల్లో ఎన్నికలు జరగాల్సి ఉండగా.. మార్పుల తరువాత ఫిబ్రవరి 9, 13, 17, 21 తేదీల్లో ఎన్నికలు జరగనున్నాయి. ఈ క్రమంలో నిష్పక్షపాతమైన ఎన్నికలు నిర్వహించేందుకు అడ్డుగా ఉన్న అధికారులను బదిలీ చేస్తూ సంచలన ఆదేశాలు ఒక్కొక్కటిగా జారీ చేస్తున్నారు.

Also Read ;- ఎన్నికల ముంగిట్లో ‘పరాక్రమ్’ ప్రదర్శన!