మహా నట వారసత్వంలో మాస్ పల్స్ తెలిసిన ఒకే ఒక్క హీరో నందమూరి బాలయ్యేననడం అతిశయోక్తి కాదు. థియేటర్ లో తన డైలాగులతో ఈలలు వేయించాలన్నా, గోల చేయించాలన్నా అది బాలయ్య వల్లే సాధ్యం. ముక్కుసూటితనం.. రాజీ పడని తత్వం.. వెరసి నందమూరి నట వారసత్వం బాలకృష్ణ.
మహానటుడు నందమూరి తారక రాముడి నట వారసత్వాన్ని పుణికి పుచ్చుకుని తెలుగు సినిమా రంగంలో ఆ వారసత్వాన్ని నిలబెట్టిన ఘనత బాలకృష్ణకే దక్కుతుంది. అందుకేనేమో ఎన్టీఆర్ జీవించి ఉండగానే ‘బాలయ్యే నా వారసుడు’ అని ప్రకటించేశారు. నందమూరి వంశంలో ఇప్పుడు మూడో తరం ఉన్నా ఆ తరానికి కూడా బాలయ్యే అభిమాన హీరో అని చెప్పక తప్పదు. నేడు అగ్ర హీరోగా వెలుగొందుతున్న జూనియర్ ఎన్టీఆర్ సైతం బాలకృష్ణ సినిమాలను మొదటిరోజే చూసి థియేటర్లో ఈలలు వేసిన రోజులున్నాయి.
పాత్రలో పరకాయ ప్రవేశం చేసే తత్వం బాలయ్యకు మొదటి సినిమా నుంచే ఉంది. అదే ఈనాడు ఆయనను మాస్ హీరోగా సినీ పరిశ్రమలో అగ్రస్థానంలో నిలబెట్టింది. అరవయ్యేళ్ల జీవితం.. 50 ఏళ్లకు చేరువైన సినీ ప్రయాణం.. 107 చిత్రాలతో ఆయన పయనం ‘అఖండ’ంగా దూసుకుపోతోంది. మంగమ్మగారి మనవడు సాధించిన కలెక్షన్లు.. పాత రికార్డులను తిరగ రాసిన సమరసింహారెడ్డినీ, నరసింహనాయుడునూ ఎవరూ మరచిపోలేరు. సింహా, లెజెండ్.. ఇలా చెప్పుకుంటే పోతే బాలయ్య సినిమా జోనర్ ఓ ప్రత్యేకమైనదనే చెప్పాలి.
తండ్రి మాదిరిగానే జానపదాన్నీ చూశారు.. పౌరాణిక పాత్రల్నీ ఆపోశన పట్టారు. సాంఘికాల్లో తనకు తిరుగులేదని నిరూపించుకున్నారు. శతాధిక చిత్రాల ఆయన నట ప్రయాణం అనితర సాధ్యమనే చెప్పాలి. రికార్డులు బద్దలు కొట్టాలంటే బాలయ్య వల్లే సాధ్యమని ఎన్నో సందర్భాల్లో నిరూపితమైంది. పవర్ ఫుల్ డైలాగ్ చెప్పాలంటే ఈ తరంలో తన ఒక్కడి వల్లే సాధ్యమని ఎన్నో సందర్భాల్లో నిరూపించారు. ఆ డైలాగులు, ఆ ఎనర్జీ, రాజీలేని ధోరణి.. ఆయనను ఓ ప్రత్యేకమైన నటుడిని చేశాయి. బాలయ్య సినిమాలను వేరొకరి సినిమాలతో పోల్చలేం.. ఆయన వ్యక్తిత్వాన్ని వెలకట్టలేం.
Must Read ;- న్యూ లుక్ : అదిరిపోయిన ‘అఖండ’ రోరింగ్ ట్రీట్.. అభిమానులకు పండగే
ఎంతో సాహసం కావాలి..
తండ్రి ఎన్టీఆర్ మహానటుడు. ఆయన వారసుడిగా నటనా రంగంలోకి అడుగుపెట్టాలంటే ఎంతో సాహసం కావాలి. ఎందుకంటే సినిమాలు చూసే ప్రేక్షకులు తండ్రితో పోల్చి చూస్తుంటారు. తాము ఆరాధించే నటుడికి ఏ మాత్రం తగ్గినా అంగీకరించలేరు.. ఆ నట వారసత్వాన్ని ఆమోదించలేరు. ఇలాంటి పరిస్థితి రాకూడదనే కాబోలు 14వ ఏటనే బాలయ్యను నటనా బరిలోకి దించేశారు ఆ మహానటుడు ఎన్టీఆర్. 1974లో ‘తాతమ్మకల’ చిత్రంతో నటనలో ఓనమాలు దిద్దుకున్నారు బాలయ్య. సోలో హారోగా ‘సాహసమే జీవితం’తో జనం ముందుకు వచ్చారు.
అప్పటి నుంచి ఇప్పటిదాకా బాలయ్య మడమ తిప్పలేదు. తన తర్వాత ఎందరు హీరోలు వచ్చినా తనకంటూ ఓ ప్రత్యేక స్థానాన్ని తెలుగు చిత్ర పరిశ్రమలో ఏర్పరచుకుని వివాదాలు లేకుండా ముందుకు సాగుతున్నారు. అప్పటి నుంచి ఇప్పటికీ ఆయన స్థానం చెక్కు చెదరలేదు. ఆయన సినిమాల క్రేజ్ అంతకంతకూ పెరుగుతుందే తప్ప తగ్గలేదు. తాజాగా బోయపాటి దర్శకత్వంలో రూపొందుతున్న ‘అఖండ’ చిత్రమే అందుకు ఉదాహరణ. ఈ నట ప్రయాణంలో ఉత్తమ నటుడిగా ఎన్నో పురస్కారాలు లభించాయి.
తండ్రి మాదిరిగానే సేవాతత్పరత
తెలుగు ప్రజలకు తండ్రి మాదిరిగానే ఏదో రకంగా సేవ చేయాలన్న ఆలోచన బాలయ్యలో ఎప్పట్నుంచో ఉంది. అందుకే ఆయన రాజకీయ వారసత్వాన్ని కూడా చేపట్టారు. తండ్రి వారసత్వం రాజకీయాల దిశగానూ అడుగులు వేయించింది. ఎన్టీఆర్ క్రియాశీలక రాజకీయాల్లో ఉన్నప్పుడు కూడా మండల ఎన్నికలు జరిగినప్పుడు ఎన్నికల ప్రచారంలో పాల్గొన్నారు. అప్పట్లో ఆయన రాజకీయం ఎన్నికల ప్రచారాలకే పరిమితమైనా 2014 నుంచి క్రియాశీలక రాజకీయాల్లోకి అడుగుపెట్టారు. 2014, 2019 ఎన్నికల్లో రెండు సార్లు శాసనసభకు ఎన్నికయ్యారు.
కరోనా సంక్షోభ సమయంలో ప్రజలను ఆదుకునేందుకు నడుం కట్టారు. తను ఎన్నికైన హిందూపురం నియోజక వర్గంతో పాటు సినీ కార్మికులను కూడా ఆదుకునేందుకు బాలయ్య తన వంతు ప్రయత్నాలు చేశారు. బసవ తారకం క్యాన్సర్ ఆస్పత్రి ద్వారానూ ఆయన సేవలు ప్రజలకు అందుతున్నాయి. ఇటు సినిమా అటు రాజకీయం.. రెండూ రెండు కళ్లులా భావించి అడుగు ముందుకు వేస్తున్న బాలయ్య పుట్టిన రోజు జూన్ 10. ఈ సందర్భంగా ‘ది లియో న్యూస్’ ఆయనకు పుట్టిన రోజు శుభాకాంక్షలు అందజేస్తోంది.
– హేమసుందర్
Also Read ;- బర్త్ డే సర్ ప్రైజ్ : బాలయ్య- గోపీచంద్ మలినేని మూవీ అనౌన్స్ మెంట్