చిరంజీవిని తథాస్తు దేవతలు కరుణించారా?

మెగాస్టార్ చిరంజీవిని తథాస్తు దేవతలు కరుణించారా?.. కొన్ని విన్నప్పుడు నిజమేనేమో అనిపిస్తుంటుంది. కొణిదెల శివశంకర వరప్రసాద్ చిరంజీవిగా మారడానికి ముందు ఏంజరిగిందో చూద్దాం. నటనలో శిక్షణ తీసుకోడానికి చిరంజీవి ఫిలిం ఛాంబర్ ఆధ్వర్యంలోఏర్పాటైన ఫిలిం ఇన్ స్టిట్యూట్ లో చేరారు. ఉండటానికి ఓ రూమ్ ఉండాలి కాబట్టి సుధాకర్, హరిప్రసాద్ లతో కలిసి చెన్నై విజయ రాఘవాచారి రోడ్డులో 11వ నంబర్ ఇంట్లో గది అద్దెకు తీసుకున్నారు. వీరిలో సుధాకర్ వీరికి సీనియర్.. మొదట హీరో అవకాశం కూడా సుధాకర్ కే వచ్చింది.

ఇక్కడి వరకూ అందరికీ తెలిసిన విషయాలే. ఆ రూమ్ లో ఉన్న సమయంలోనే శివశంకర వరప్రసాద్ ను ‘నాయనా చిరంజీవీ లే.. నాయనా’ అంటూ సుధాకర్ సంబోధించేవారట. వారి మధ్య ఉన్నసాన్నిహిత్యం వల్ల అలా పిలవాల్సి వచ్చేదని సుధాకర్ ఓ ఇంటర్వ్యూలో చెప్పారు. ‘నా నాయనా చిరంజీవీ లే.. త్వరగా రెడీ అవ్వు.. బయలుదేరదాం’ అనేవారట సుధాకర్. భవిష్యత్తులో ఆ పేరే వరప్రసాద్ కు స్థరపడుతుందని సుధాకర్ కు కూడా తెలీదట. పైన తథాస్తు దేవతలుంటారంటారు కదా.. అలానే దీవించారేమో ఆయనకు అదే పేరు స్థరపడింది.

ఆ కల అలా నెరవేరింది..

చిరంజీవి తన స్క్రీన్ నేమ్ వెనకున్న కథను కూడా ఓ ఇంటర్వ్యూలో చెప్పారు. ఆయనకు నిద్రలో ఓ కల వచ్చిందట. రాములవారి గర్భ గుడిలో ఆయన సొమ్మసిల్లి పడుకున్నరట. అంతలో అక్కడికి ఓ పాప వచ్చి ‘ఏమయ్యా చిరంజీవీ.. ఇక్కడ పడుకున్నావు.. లే.. ఎక్కడికైనా వెళ్లి పడుకో’ అన్నదట. లేచి చూస్తే చుట్టూ గుడి వాతావరణం కనిపించిందట. ఆ అమ్మాయి చిరంజీవి అనటం ఏమిటి? నేను లేవడం ఏమిటి? అని ఆలోచించారట చిరంజీవి. ఈలోగా బయటి నుంచి తన స్నేహుతుడు ‘అరే చిరంజీవీ.. రా వెళదాం’ అంటున్నాడట. అలా కల ముగిసింది.

తనను అలా పిలిచిన ఫ్రెండ్ ఎవరో కూడా తెలీదట. తెల్లారగానే అమ్మతో చిరంజీవి ఈ కల విషయం చెప్పారు. ‘నువ్వు సినిమాల్లోకి వెళ్లావు కదా.. తెర మీద ఏం పేరు వేసుకోవాలా అని ఆలోచిస్తున్నావు .. నువ్వు ఆంజనేయ స్వామి భక్తుడివి. ఆ స్వామికి చిరంజీవి అనే పేరు ఉంది. ఆయన తల్లి పేరు కూడా అంజనాదేవే. నా పేరు కూడా అదే కాబట్టి చిరంజీవి అనే పెట్టుకో అన్నారట ఆమె. ఆ పేరు ఎంతో పవిత్రమైనదని, బహుశా ఇది ఆ స్వామివారే ఈ పేరు సూచించి ఉండొచ్చని తల్లి చెప్పడంతో ఆ పేరునే పెట్టుకున్నారు చిరంజీవి.

ఆయన మొదటి సినిమా నుంచీ తెర మీద చిరంజీవి అనే పేరునే వేసుకున్నారు. ఆయన పేరు మార్చుకోవాలనుకోడానికి కూడా కారణం ఉంది. అప్పటికే శంకర్, ప్రసాద్ అనే పేర్లు ఉండటంతో పేరు మార్చుకోవాలన్న ఆలోచన చిరంజీవి వచ్చింది. మొత్తానికి చిరంజీవి అనే పేరు వెనక పెద్ద కథే ఉంది కదూ.

Must Read ;- పిచ్చ కామెడీ కి సుధాకరే పితుహు