చిత్రపరిశ్రమలో దర్శకుడిగా ఒక అవకాశాన్ని దక్కించుకోవడం అంత తేలికైన విషయమేం కాదు. అందునా పెద్ద హీరోలతో చేయాలంటే చాలా కాలమే వెయిట్ చేయాలి. కానీ అందుకు భిన్నంగా తొలి అవకాశాన్ని అందుకున్న దర్శకుడిగా కల్యాణ్ కృష్ణ కనిపిస్తాడు. ‘సోగ్గాడే చిన్నినాయనా‘ సినిమాతో దర్శకుడిగా ఆయన పరిచయమయ్యాడు. తొలి సినిమానే నాగార్జునతో చేయడం .. అందునా నాగార్జునతో డ్యూయెల్ రోల్ చేయించి మెప్పించడం కల్యాణ్ కృష్ణ ప్రతిభకి దక్కిన ప్రతిఫలంగానే చెప్పుకోవాలి. నాగార్జున కెరియర్లోనే అత్యధిక వసూళ్లను రాబట్టిన చిత్రంగా ఈ సినిమా నిలిచింది.
‘సోగ్గాడే చిన్నినాయనా‘ సినిమాలో నాగార్జున పోషించిన ‘బంగార్రాజు’ పాత్ర ఒక రేంజ్ లో ప్రేక్షకుల్లోకి దూసుకెళ్లింది. దాంతో ఆ పేరునే టైటిల్ గా సెట్ చేసుకుని, కల్యాణ్ కృష్ణ దర్శకత్వంలో మరో సినిమా చేయనున్నట్టు నాగార్జున చెప్పారు. అయితే కల్యాణ్ కృష్ణ టాలెంట్ .. చైతూకి సక్సెస్ కి ఇస్తుందనే నమ్మకంతో, ముందుగా చైతూతో చేయమని నాగార్జున అవకాశం ఇచ్చారు. ఆ కారణంగానే తెరకెక్కిన సినిమానే ‘రారండోయ్ వేడుక చూద్దాం’. చైతూ జోడీగా రకుల్ నటించిన ఈ సినిమా, ఆశించినస్థాయిలో ఆదరణ పొందలేకపోయింది.
Must Read: akkineni-nagarjuna-resume-big-boss-telugu-4-shoot
ఆ తరువాత తను డైరెక్ట్ చేసిన ‘నేల టిక్కెట్టు’ పరాజయంపాలు కావడంతో, కల్యాణ్ కృష్ణ ‘బంగార్రాజు’ కథపైనే కసరత్తు చేయడం మొదలుపెట్టాడు. నాగార్జునకి సంతృప్తిని కలిగించే విధంగా కథ రాకపోవడం .. ఇతర ప్రాజెక్టులతో నాగార్జున బిజీగా ఉండటం వలన ఈ ప్రాజెక్టు ఆలస్యమవుతూ వచ్చింది. ‘బంగార్రాజు’ కథతో కల్యాణ్ కృష్ణ తనని మెప్పించడానికి చాలా కష్టపడ్డాడనీ, త్వరలోనే ఈ ప్రాజెక్టు పట్టాలెక్కుతుందని ఆ మధ్య ఒక వేదికపై నాగార్జున స్పష్టం చేశారు. దాంతో ఇక ప్రాజెక్టు పట్టాలెక్కడం ఖాయమని అంతా అనుకున్నారు. కానీ ఊహించని విధంగా కొన్ని వ్యక్తిగత కారణాల వలన, కల్యాణ్ కృష్ణ కొంతకాలం పాటు ఇండస్ట్రీకి దూరంగా ఉండవలసి వచ్చింది.
రోజులు గడుస్తూ వెళుతున్నాయి .. నాగార్జున వరుస సినిమాలు చేసుకుంటూ వెళుతున్నారు. కానీ ఎక్కడా ‘బంగార్రాజు’ సినిమా గురించిన ప్రస్తావన మాత్రం రావడం లేదు. లాక్ డౌన్ తరువాత కొన్ని కొత్త ప్రాజెక్టులకు సంబంధించిన ప్రకటనలు వెలువడుతున్నాయిగానీ, ‘బంగార్రాజు’ ఆచూకీ మాత్రం లేదు. ఆల్రెడీ ఈ ప్రాజెక్టు అటకెక్కేసిందా? లేదంటే మరింత ఆలస్యమవుతుందా? అనే సందేహాలు అభిమానుల్లో వున్నాయి. త్వరలో అటు నాగార్జున నుంచిగానీ, ఇటు కల్యాణ్ కృష్ణ నుంచిగాని ఈ సినిమాకి సంబంధించిన క్లారిటీ వస్తుందేమో చూడాలి.
Must Read: అభిమానికి నాగార్జున జూమ్ కాల్
