Actress Sangeetha Busy With Movies After Her Re-Entry :
తెలుగు తెరకి కొంతకాలం క్రితం పరిచయమైన అందమైన కథానాయికలలో ‘సంగీత’ ఒకరు. మంచి హైటూ .. అందుకు తగిన ఆకర్షణీయమైన రూపం సంగీత సొంతం. ‘ఆశల సందడి’ సినిమా ద్వారా గుమ్మడిపువ్వు లాంటి ఈ అమ్మాయి తెలుగు తెరకి పరిచయమైంది. పొలం గట్టుపై నుంచి పొద్దుతిరుగుడు పూలన్నింటినీ ఒక్కసారిగా చూస్తే ఎలాంటి అనుభూతి కలుగుతుందో, తెరపై సంగీతను చూసిన ప్రేక్షకులు కూడా కాస్త అటు ఇటుగా అలాగే ఫీలయ్యారు. ఆ తరువాత సంగీత ఒకటి రెండు సినిమాలు చేసిన తరువాత, ‘ఖడ్గం‘లో చేసే అవకాశం లభించింది.
ఈ సినిమాలో ‘ఒక్క ఛాన్స్ .. ఒకే ఒక్క ఛాన్స్’ అంటూ సంగీత ఆ ఒక్క ఛాన్స్ తో దూసుకుపోయింది. ఆ తరువాత ఆమె వరుసగా సినిమాలు చేసినా, ‘ఈ అబ్బాయి చాలా మంచోడు’ .. ‘ సంక్రాంతి’ సినిమాలు మంచి పేరు తీసుకొచ్చాయి. ఒక వైపున తెలుగు సినిమాలు చేస్తూనే, మరో వైపున తమిళ .. మలయాళ సినిమాలలో సంగీత బిజీ అయింది. ‘శ్రీమతి కల్యాణం’ తరువాత ఇక ఆమె తెలుగు తెరపై కనిపించలేదు. ఎక్కువగా తమిళ సినిమాలు చేస్తూ వెళ్లింది. అలా తెలుగు తెరపైకి ఆమె ఓ పదేళ్లపాటు దూరమైపోయింది.
ఈ మధ్య వచ్చిన ‘సరిలేరు నీకెవ్వరు‘ సినిమాతోనే ఆమె రీ ఎంట్రీ ఇచ్చింది. ఈ సినిమాలో సంగీతను చూసినవారు, ఆమె గ్లామర్ లో పెద్దగా మార్పు రాలేదని అనుకున్నారు. ఇక హీరోయిన్ తల్లి పాత్రలో ఆమె నటన కూడా అందరినీ ఆకట్టుకుంది. దాంతో ఆమె ‘ఆచార్య‘ సినిమాలోనూ అవకాశాన్ని సంపాదించుకుంది. ఇక ప్రస్తుతం ‘ఎఫ్ 3‘ సినిమాలోను ఒక ముఖ్యమైన పాత్రను పోషిస్తోంది. అంతేకాదు మరో రెండు ప్రాజెక్టులలో సంగీత పేరు వినిపిస్తోంది. చూస్తుంటే అదే గ్లామరుతో .. అదే జోరును కొనసాగించనుందనే విషయం మాత్రం స్పష్టంగా అర్థమవుతోంది.
Must Read ;- తెలుగు తెరపై బిజీ అవుతున్న దేవయాని!
