జగన్.. జలం.. జగడం

ABN RK Weekend Comment On Water War : 

ప్రస్తుతం ఏపీ ప్రభుత్వం నిర్మిస్తోన్న రాయలసీమ ఎత్తిపోతల పథకమే వివాదానికి కారణం కాదని, జల విద్యుత్‌ ఉత్పత్తి చేయడం వల్ల సమస్య పరిష్కారవుతుందని చెప్పగలుతారా అని ప్రశ్నించారు. వాస్తవానికి వరదలు వచ్చినా జలాశయం నిండని పక్షంలో రాయలసీమకే ఎక్కువ నష్టం జరుగుతోందని, అయినా ఏపీ సీఎం వైఎస్ జగన్ మాత్రం కేసీఆర్ కు సంజాయిషీ ఇచ్చుకునే విధంగా వ్యవహరించడంతోపాటు కేంద్రానికి లేఖలు రాస్తూ కాలక్షేపం చేస్తున్నారన్నారు. చంద్రబాబు సీఎంగా ఉన్న సమయంలో కృష్ణా జలాలను 65:35 నిష్పత్తిలో ఆంధ్రా, తెలంగాణ పంచుకోవడానికి అంగీకరించిన కేసీఆర్ ఇప్పుడు సమాన వాటా కోసం పట్టుబట్టడం వెనుక కారణం వేరే ఉందని చెప్పారు. హుజూరాబాద్ ఉప ఎన్నికల అంశంతో పాటు షర్మిల పార్టీ అంశం, ఒకవేళ ఏపీ సీఎం జగన్మోహన్ రెడ్డికి జైలుకి వెళ్తే అనే అంశాన్ని కూడా వెల్లడించారు.

సెంటిమెంట్.. మరోసారి తెరపైకి

‘వైఎస్‌ షర్మిల తెలంగాణలో పార్టీని ప్రారంభించడం కేసీఆర్-జగన్ ల సంబంధాలపై ప్రభావం చూపించింది. ఇటీవలే షర్మిల ఓ మాట అన్నారు. రెండు రాష్ట్రాల సీఎంలు కలసి భోజనాలు చేస్తారు.. మిఠాయిలు పంచుకుంటారు.. ఉమ్మడి శత్రువును కలిసికట్టుగా ఎన్నికల్లో ఓడిస్తారు, జల వివాదం పరిష్కరించుకోవడానికి మాత్రం రెండు నిమిషాలు కూర్చోలేరా? అని ప్రశ్నించారు. ఈ వ్యాఖ్యలకు కారణం ఏంటనే అంశాన్ని పరిశీలిస్తే చాలా విషయాలు బయటకు వస్తాయి. హుజూరాబాద్ ఎన్నికల నేపథ్యంలో సెంటిమెంట్ ని మరోసారి తెరపైకి తెచ్చారని చర్చ జరిగింది. అయితే అదే ప్రధాన కారణం కాదు. షర్మిల పార్టీ కూడా ప్రధాన అంశంమే.

Also Read ;- అటు లోకేష్,ఇటు పవన్.. జగన్‌కు దబిడిదిబెడేనా!

చంద్రబాబును బలహీన పర్చి..

తొలుత షర్మిల పార్టీ అంశాన్ని కేసీఆర్ తేలిగ్గా తీసుకున్నారు. తరువాతి కాలంలో షర్మిల పార్టీ విషయంపై తెలంగాణ సీఎం కేసీఆర్ ఏపీ సీఎ జగన్మోహన్ రెడ్డికి కొన్ని సంకేతాలు, పరోక్ష హెచ్చరికలు జారీచేశారు. షర్మిలను నియంత్రించాల్సిందిగా వాటి సారాంశం. షర్మిల కోరినట్టే ఆస్తుల పంపకానికి అంగీకరించడం, షర్మిలను పార్టీ పెట్టనీయకుండా విజయమ్మ రాయభారం లాంటి ప్రయత్నాలు కూడా ఫలించలేదు. దీంతో షర్మిల పార్టీ పెట్టారు. ఈ ప్రయత్నాలు చేశామని జగన్ ఇచ్చిన సమాచారాన్ని కేసీఆర్ విశ్వసించనట్టే కనిపిస్తోంది. జగన్ ని కాదని షర్మిల ఒక్క అడుగు కూడా ముందుకు వేయలేదని భావిస్తున్నట్లు తెలుస్తోంది. గత ఎన్నికలకు ముందు ఏపీలో చంద్రబాబును బలహీన పర్చేందుకు సాయం చేసినా కనీస కృతజ్ఞత లేకుండా వ్యవహరిస్తున్నారని కేసీఆర్ అసహనం వ్యక్తం చేసినట్టు తెలుస్తోంది. అదే సమయంలో షర్మిల పార్టీ వల్ల తెలంగాణ లో కాంగ్రెస్ కే నష్టం జరుగుతుందని తొలుత భావించినా టీఆర్ఎస్ కూడా నష్టం జరుగుతుందని అంచనాకు వచ్చినట్టు తెలుస్తోంది. అందుకే ఈ ఒత్తిళ్లు తెలుస్తున్నట్లు సమాచారం.

షర్మిల తెలంగాణలో పార్టీ ప్రారంభించిన రోజునే జగన్ కూడా నోరు విప్పారు. తాము ఇతర రాష్ట్రాలతో స్నేహాన్నే కోరుకుంటున్నామని వ్యాఖ్యానించారు. ప్రాజెక్టులు నిండకుంటే రాయలసీమలో తాగు, సాగునీటి కష్టాలు తప్పవని తెలిసినా ఆ విషయంపై నోరు మెదపడం లేదు. ఈ క్రమంలో రాయలసీమ ప్రయోజనాలు గాలికిపోయినా పర్వాలేదు అన్నట్టుగా వ్యవహరిస్తున్నారు. ఆయనే కాదు.. చాలామంది కూడా ఇలాగే వ్యవహరిస్తున్నారు. హైదరాబాద్ లో ఉన్న వారి ఆస్తులు కాపాడుకోవడమే పరమావధిగా వ్యవహరిస్తున్నారు. జగన్ కు హైదరాబాద్ లో చాలా ఆస్తులున్నాయి. ఈ నేపథ్యంలో కేసీఆర్‌కు కోపం వస్తే జేసీబీలు కదలవచ్చు. బినామీల ఆస్తులు లేదా ఇతరత్రా చర్యలు తీసుకోవచ్చు. తెలంగాణలోనే కాకుండా బెంగళూరు, చెన్నైలోనూ జగన్ రెడ్డికి ఆస్తులుండడమే ఆయా రాష్ట్రాలు వేలుపెట్టబోమని చెప్పడానికి కారణం. ప్రస్తుతం ఏపీ వల్ల తమకు నష్టం జరుగుతుందని తెలంగాణలోనివారు, తెలంగాణ వల్ల తమకు నష్టం జరుగుతుందని ఏపీలోని వారు అనుకునే పరిస్థితి ఉంది. అయితే అసలు లోగుట్టు ఇదే అన్న విషయం వారికి తెలియదు. కేసీఆర్‌ను కనీసం ప్రశ్నించలేని స్థితిలో జగన్‌ రెడ్డి ఉన్నందున ఉభయ రాష్ర్టాలకు చెందిన ప్రజాహితులు జోక్యం చేసుకొని సమస్యకు శాశ్వత పరిష్కారం అన్వేషించడం అవసరం.

ఇద్దరు బిడ్డల మధ్య మొదలైన పోరు

అదే సమయంలో రాజశేఖర్ రెడ్డి కుటుంబంలో విబేధాలు మరోసాయి బయటపడ్డాయి. గతంలో వైఎస్‌ఆర్‌ జయంతి, వర్ధంతి కార్యక్రమాలకు కుటుంబ సభ్యులంతా ఇడుపులపాయలోని ఆయన సమాధి వద్దకు కలసి వెళ్లి ప్రార్థన చేసేవారు. అయితే ఇటీవల వైఎస్‌ఆర్‌ జయంతి సందర్భంగా కొన్ని పరిణామాలు చోటుచేసుకున్నాయి. జగన్‌ రెడ్డి,  సతీమణి భారతీ రెడ్డి వెళ్లి నివాళులు అర్పించారు. షర్మిల, విజయలక్ష్మితో పాటు ఇతర కుటుంబ సభ్యులు వైఎస్ ఆర్ సమాధి వద్దకు వెళ్లి నివాళులర్పించారు. షర్మిల వస్తున్న సమయంలో జగన్ తాను ఇడుపుల పాయలో లేకుండా ప్లాన్ చేసుకున్నారు. జగన్ వెంట కడప ఎంపీ అవినాష్‌ రెడ్డి కుటుంబం జగన్‌ వెంట ఉండగా, వివేకా కుమార్తె సునీతా రెడ్డి షర్మిలతోపాటు ఉన్నారు. అదే రోజు హైదరాబాద్‌లో షర్మిల ప్రారంభించబోతున్న వైఎస్‌ఆర్‌ తెలంగాణ పార్టీ సభకు వెళ్లొద్దని విజయలక్ష్మికి జగన్ చెప్పినా విజయలక్ష్మి వెళ్లారు. అదే సమయంలో తన ఇద్దరు బిడ్డలూ విభిన్న ప్రాంతాలకు ప్రాతినిధ్యం వహించాల్సి రావడం విధి నిర్ణయమని శ్రీమతి విజయలక్ష్మి చెప్పారంటే విభేధాలు ఉన్నట్టు పరోక్షంగా ఒప్పుకున్నారని చెప్పాలి. మొత్తంమీద ఇద్దరు బిడ్డల మధ్య మొదలైన పోరు కారణంగా విజయలక్ష్మి నలిగిపోతున్నారని చెప్పవచ్చు.

జగన్ జైలుకెళ్తే..

అదే సమయంలో అవినీతి ఆరోపణలకు సంబంధించి జైలుకు వెళ్లాల్సి వస్తుందేమేననని జగన్ రెడ్డి టెన్షన్ పడుతున్నట్టు తెలుస్తోంది. జైలుకు వెళ్లవలసి వస్తే భారతీ రెడ్డి తన స్థానంలో ఉంటారని జగన్ భావిస్తున్నట్లు కనిపిస్తోంది. ఒకవేళ జగన్ జైలుకి వెళ్లాల్సి వస్తే ఆ కుర్చీలో వైఎస్ విజయలక్ష్మిని కూర్చోబెట్టాలని షర్మిల భావిస్తున్నట్టు తెలుస్తోంది. అదే టైంలో పార్టీలో చీలిక అంశంతోపాటు బీజేపీ మద్దతు ఉన్న వారే సీఎం అవుతారని మరికొందరు చెబుతున్నారు. అధికారం అనేది రక్తసంబంధీకులను సైతం విడదీస్తుంది. ఏదిఏమైనా జగన్‌ రెడ్డికి హనీమూన్‌ పీరియడ్‌ ముగిసిందనే చెప్పవచ్చు. జగన్‌ రెడ్డిపై కేసీఆర్‌కు ఆగ్రహం కలిగేలా చేయడంలో ప్రస్తుతానికి షర్మిల సక్సెస్‌ అయ్యారని చెప్పవచ్చని, తెలంగాణ రాజకీయాల్లో ఎంత సక్సెస్ అవుతారో తెలియాలంటే మరికొంత సమయం పడుతుందని వైఎస్‌ఆర్‌ తెలంగాణ పార్టీ ముఖ్యుడు చెప్పారు.’ అని ఆర్కే తన విశ్లేషణలో పేర్కొన్నారు.

Must Read ;- ఆర్కే గారూ.. ఏమ‌ర‌పాటుగా ఉంటే ఎలాగండీ?