కన్నడ సినిమాల బడ్జెట్ ఒక మాదిరిగానే ఉటుంది. తమిళ .. తెలుగు సినిమాల స్థాయిలో వాళ్లు ఖర్చు చేయరు. కనుక అక్కడ హీరోల స్టార్ డమ్ కూడా ఒక స్థాయికి మాత్రమే పరిమితమై కనిపిస్తుంది. అలాంటి కన్నడ సినిమాను జాతీయస్థాయికి తీసుకెళ్లిన హీరోగా ‘యష్’ కనిపిస్తాడు. ‘కేజీఎఫ్‘ సినిమాతో ఆయనతో ఆ ప్రయోగం చేసిన దర్శకుడిగా ప్రశాంత్ నీల్ నిలిచాడు. ఆ సినిమా విడుదలైన దగ్గర నుంచి యష్ గురించి, ప్రశాంత్ నీల్ గురించి మాట్లాడుకోనివారు లేరంటే అతిశయోక్తి కాదు. ఒక కన్నడ సినిమా ఈ స్థాయి వసూళ్లను సాధించడంతో, దర్శక నిర్మాతలు సీక్వెల్ కోసం రంగంలోకి దిగారు.
అలా ‘కేజీఎఫ్ చాఫ్టర్ 1’ సీక్వెల్ గా ‘కేజీఎఫ్ చాఫ్టర్ 2‘ రూపొందుతోంది. చాఫ్టర్ 1కి వచ్చిన రెస్పాన్స్ ను దృష్టిలో పెట్టుకుని, చాఫ్టర్ 2 భారీతనం పెంచారు. వివిధ భాషల్లో ఈ సినిమాను భారీస్థాయిలో విడుదల చేయాలనే ఉద్దేశంతో, ఆయా భాషలకు చెందిన క్రేజ్ ఉన్న ఆర్టిస్టులను కీలకమైన పాత్రల కోసం తీసుకున్నారు. ఈ సినిమాలో ‘యష్’ తో తలపడనున్న విలన్ గా సంజయ్ దత్ కనిపించనుండటం విశేషం. ఈ ఒక్క పేరు చాలు .. ఈ సినిమా స్థాయిని పెంచడానికి. శ్రీనిధి శెట్టి .. రవీనా టండన్ ముఖ్యమైన పాత్రల్లో కనిపించనున్నారు.
ఇక టాలీవుడ్ నుంచి ప్రకాశ్ రాజ్ .. రావు రమేశ్ .. ఈ సినిమాలో విభిన్నమైన పాత్రల్లో కనిపించనున్నారు. ఈ పాటికే ఈ సినిమా ప్రేక్షకుల ముందుకు వచ్చేదే. కానీ మిగతా సినిమాల మాదిరిగానే లాక్ డౌన్ కారణంగా ఆలస్యమైంది. విజయ్ కిరంగదూర్ – కార్తీక్ గౌడ నిర్మిస్తున్న ఈ సినిమాను, జూలై 30వ తేదీన విడుదల చేయాలనే ఆలోచనలో ఉన్నారు. బహుశా ఇదే తేదీ ఖరారు కావొచ్చునని అంటున్నారు. ఈ లోగా థియేటర్లు పూర్తిస్థాయిలో తెరుచుకుంటాయనేది ఒక ఆలోచన అయితే, పిల్లలకు పరీక్షలు కూడా పూర్తవుతాయనేది మరో ఆలోచన. మరి చాఫ్టర్ 1కి మించిన విజయాన్ని చాఫ్టర్ 2 సాధిస్తుందేమో చూడాలి.
Must Read ‘;- ఆ సిగరెట్ ‘కేజీఎఫ్ 2’ టీజర్ కొంపముంచింది!
