హీరో ఎలివేషన్ కేక.. ప్రశాంత్ నీల్ తోపు

హీరో పరుగులు పెట్టలేదు..
హీరో రంకెలు వేయలేదు..
హీరో గుక్క తిప్పుకోకుండా డైలాగులు చెప్పలేదు.. మరి ఏం చేశాడు?

వెరీ సింపుల్.. ఓ మెషీన్ గన్ తీసుకున్నాడు.. దాంతో శత్రువుల కార్లను తునాతునకలు చేసిపారేశాడు.. ఆ తర్వాత నిప్పులు కక్కుతున్న ఆ గన్ బారెల్ వేడి నుంచి సిగార్ ముట్టించుకుని ఓ లుక్ వేశాడు.. అంతే.. ఆ దృశ్యం చూడటానికి రెండు కళ్లూ చాలవు.. రాయడానికి పదాలూ దొరకవు.. అందుకే జనం ఔరా అనేశారు. ఇప్పటిదాకా ‘బాహుబలి’తో ప్రభాస్ ను ఓ రేంజ్ లో చూసిన జానానికి షడ్రశోపేత విందులా అనిపిస్తున్నాడు హీరో యశ్. దానికి కారణం కేజీఎఫ్ 2లోని హీరో ఎలివేషన్. ఇప్పుడు రాఖీ ఓ కేక.. హీరో యశ్ అభిమానులకే కాదు చూసిన వారందరికీ పూనకాలు తెప్పించేలా ఉంది ఈ హీరో ఎలివేషన్ సీన్. సినిమాలో లాజిక్ ఎవరూ చూడరు.. అంతా మ్యాజిక్కే. ఆ మ్యాజిక్ ప్రశాంత్ నీల్ చేయగలిగాడు.

Must Read ;- స‌రికొత్త రికార్డ్ క్రియేట్ చేసిన‌ ‘కేజీఎఫ్ 2’ టీజ‌ర్

దర్శకుడు ప్రశాంత్ నీల్ ఈ సీన్ సితారే అనిపించాడు. ఏ హీరో కైనా స్టార్ డమ్ వచ్చాక ఆ హీరోని ఎలివేట్ చేయడం దర్శకుడికి కెమెరా మీద సామే. దర్శకుడి ప్రతిభ అక్కడే బయటపడుతుంది. మాస్ హీరో జనంలోకి వెళ్లినంత త్వరగా క్లాస్ హీరో వెళ్లలేడు. ఒక హీరో స్టార్ డమ్ పెరగాలంటే దర్శకుడి చేసే కృష్టి ఏమిటో ఈ ఒక్క సన్నివేశం చూస్తే అర్థమవుతుంది. యాక్షన్ కన్నా ఎమోషన్ తోనే ఈ సీన్ పండించే ప్రయత్నం చేశాడు. ఇంకా చెప్పాలంటే మన భారతీయ సినిమాలో హీరో ఎలివేషన్ ను పీక్స్ కు తీసుకెళ్లిన సినిమా కేజీఎఫ్ 2 అనడం కూడా అతిశయోక్తి కాబోదు.

హడావుడి చేసి హీరోను ఎలివేట్ చేయడం సబబు కాదని దర్శకుడు భావించినట్టుంది. అది వీరోచితం కాదనుకున్నాడేమో.. ఇదే హీరోచితం అనేలా హీరోని ఎలివేట్ చేశాడంటే ప్రశాంత్ నీల్ ని ఏమనుకోవాలి. ఇప్పటిదాకా రాజమౌళి గురించే ఆలోచిస్తూ వచ్చిన సినీ జనం ఇప్పుడు ప్రశాంత్ నీల్ ను మరో రేంజ్ లో చూస్తోంది. తెలుగు హీరోలు సైతం ఈ కన్నడ దర్శకుడితో సినిమా చెయ్యాలని ఉవ్విళ్లూరుతున్నారు. దర్శకుడి ప్రతిభను అంచనా వేయడానికి సినిమా మొత్తం చూడాల్సిన అవసరం లేదు.. ఇలాంటి ఒక్క సన్నివేశం చూస్తే చాలు. ఒకప్పుడు బాహుబలి – కంక్లూజన్ మీద ఎంత క్రేజ్ ఏర్పడిందో ఇప్పుడు కేజీఎఫ్ 2 మీద కూడా అంతే క్రేజ్ ఏర్పడటానికి ఈ టీజర్ కూడా చాలా తోడ్పడింది.

‘అత్యంత శక్తిమంతమైన మనుషులు అత్యంత శక్తిమంతమైన ప్రదేశాల నుంచి వస్తారని చరిత్ర మనకు చెబుతోంది.. కానీ చరిత్ర చెప్పేది అబద్దం. శక్తిమంతమైన మనుషులు ఆ ప్రాంతాలనే శక్తిమంతం చేస్తారు…’ అంటూ వాయిస్ ఓవర్ తో వచ్చిన ఈ టీజర్ దుమ్ము దులిపేసింది.హీరో ఎలివేషన్.. దీని గురించి జనం చర్చించుకోవడం వేరు.. ఆయా హీరోలు చర్చించుకోవడం వేరు. ఇప్పుడది కేజీఎఫ్ 2లో హీరో యశ్ ఎలివేషన్ గురించే సర్వత్రా చర్చ. నిన్నఈ సినిమా టీజర్ విడుదలైనప్పటి నుంచీ అందరిలోనూ రాఖీ పాత్ర ఎలివేషన్ గురించే చర్చ సాగుతోంది.

సినిమా దర్శకుడి మీడియానే

సినిమా అనేది దర్శకుడి మీడియా అని దర్శక దిగ్గజం దాసరి అంటూ ఉంటారు. నిజానికి అది ఈనాటి మాట కాదు.. దాసరి తరంలో ఈ మాట ఎక్కువగా వినిపించినా మనకు సినిమా తొలినాళ్లలోనే కనిపించింది. టాలీవుడ్ నుంచి హాలీవుడ్ దాకా జగమెరిగిన సత్యమే అది. ఒక హీరోకి స్టార్ డమ్ ని తీసుకు రావడంలో దర్శకుడి ప్రతిభ చాలా ఉపయోగపడుతుంది. ‘ఖైదీ’ సినిమాలో మెగాస్టార్ చిరంజీవి ఇంట్రడక్షన్ మనకు తెలుసు. పోలీస్ స్టేషన్ లో ఆ ఫైట్ ఏ స్థాయిలో ఉందో కూడా చూశాం.

‘బాషా’లో రజినీ హీరోయిజాన్ని దర్శకుడు సురేష్ కృష్ణ ఏ స్థాయిలో ఎలివేట్ చేశాడో మనకు తెలిసిందే. ‘నాయకుడు’, ‘భారతీయుడు’లో కమల్ హాసన్, ‘సమరసింహారెడ్డి’లో బాలకృష్ణ. ‘శివ’లో నాగార్జున, ‘ఆది’, ‘సింహాద్రి’లో జూనియర్ ఎన్టీఆర్,  పోకిరి, ఒక్కడులో మహేష్ బాబు.. ఎలా ఎలివేట్ అయ్యారో చూశాం. ఆ ఎలివేషన్ అంతా ఆయా దర్శకుల బుర్రలోంచి పుట్టినదే. అంతకుమించిన ఎలివేషన్ ‘బాహుబలి’లో ప్రభాస్ కు దక్కింది. ప్రభాస్ ప్రభ అంతర్జాతీయ స్థాయికి వెళ్లేలా ఈ ఎలివేషన్ ఉపయోగపడింది.

కేజీఎఫ్ ముందు వరకు యశ్ గురించి కన్నడ ప్రజలకు తప్ప వేరెవరికీ తెలియదు. కేజీఎఫ్ తో అందరి దృష్టినీ యశ్ ఆకర్షించాడు. ఇప్పుడు కేజీఎఫ్ 2తో యశ్ క్రేజ్ కూడా అమాంతం పెరిగిపోయిందంటే దానికి కారణం దర్శకుడు ప్రశాంత్ నీల్. దర్శకుడిగా వందకు 200 మార్కులను ప్రశాంత్ నీల్ కొట్టేశాడు. రాజమౌళి, ప్రశాంత్ నీల్ లాంటి దర్శకుల వల్లే కొన్ని సినిమాలు పాన్ సినిమాల కేటగిరీలోకి వెళ్లిపోయాయి. ఇలాంటి దర్శకులు మరికొందరు ఉంటే మంచి ప్రమాణాలతో మరిన్ని చిత్రాలు వచ్చే అవకాశం ఉంది. ప్రస్తుతం హ్యాట్సాఫ్ చెప్పాల్సింది మాత్రం ప్రశాంత్ నీల్ కే.

– హేమసుందర్ పామర్తి

Also Read ;- ‘కేజీఎఫ్ 2’ కొనేసిన మలయాళ స్టార్ హీరో.. !