జన నేతకు వన కానుక ఇచ్చేందుకు సినీ పరిశ్రమ స్పందించడం విశేషమే. మెగాస్టార్ చిరంజీవి, కింగ్ నాగార్జున ఇప్పటికే సినీ పరిశ్రమకు ఈ విషయంలో పిలుపునిచ్చేశారు. రాజ్యసభ్య సభ్యుడు జోగినిపల్లి సంతోష్ కుమార్ ప్రారంభించిన గ్రీన్ ఇండియా ఛాలెంజ్ కార్యక్రమానికి ఇది కొనసాగింపు అనుకోవాలి. ఫిబ్రవరి 17వ తేదీ ఉదయం 10 గంటలకు కోటి మొక్కలు నాటే కార్యక్రమానికి శ్రీకారం చుట్టబోతున్నారు. ఇందులో సినీ పరిశ్రమ కూడా పాల్గొనబోవడం విశేషమే.
ఇప్పటికే గ్రీన్ ఇండియా ఛాలెంజ్ లో సినీ ప్రముఖులు ఎంతో మంది భాగస్వాములయ్యారు. మెగాస్టార్ చిరంజీవి ట్విట్టర్ వేదికగా దీనిపై స్పందించారు. పచ్చదనాన్ని ప్రేమించే సీఎం కేసీఆర్ కు ముందుగా శుభాకాంక్షలు చెబుతూనే కోటి వృక్షార్చనలో అందరం భాగస్వాములం అవుదామని పిలుపునిచ్చారు. ఆ మొక్కలను పరిరక్షించే బాధ్యతను కూడా మనం తీసుకుందామని సూచించారు. కింగ్ నాగార్జున కూడా ఇదే రీతిలో స్పందించారు. గ్లోబల్ వార్మింగ్ వల్ల మన దేశానికీ, ప్రపంచానికీ ముప్పు వాటిల్లబోతోందని హెచ్చరించారు. ‘ఇటీవల ఉత్తరాఖండ్ లో వరదల వల్ల ఎంతమంది ప్రజలు చనిపోయారో మనం చూశాం.
బాధ్యత గల పౌరులుగా వాతావరణ కాలుష్యం తగ్గించడం కోసం మనం కూడా ఏదైనా ఒకటి చేయాలి. సీఎం కేసీఆర్ పుట్టిన రోజు సందర్భంగా గంటలో కోటి మొక్కలు నాటే కార్యక్రమంలో అందరం భాగస్వాములం అవుదాం’అంటూ పిలుపునిచ్చారు. ఈ కార్యక్రమం విజయవంతం కావాలని మనస్ఫూర్తిగా కోరుకుంటున్నానని అన్నారు. తెలుగు చిత్ర పరిశ్రమకు సారథులుగా వ్యవహరిస్తున్న వీరు పిలుపు ఇవ్వడంతో అన్ని విభాగాల వారూ ఇందులో భాగస్వాములు కావడానికి ఏర్పాట్లు చేసుకుంటున్నారు.
మొక్కలు నాటడం మంచిదే.. వాటిని బతికించే దెవరు?
మొక్కలు నాటడాన్ని అందరూ బాగానే చేస్తున్నారు. నాటిని మొక్కను సంరక్షించలేకపోతే పరిస్థితి ఏమిటి? అనేది ఇప్పుడు చాలామందిలో ఉన్న ప్రశ్న. ఇప్పటికే ఎందరో ప్రముఖులు మొక్కలు నాటారు. ఆ తర్వాత వాటి మొహం చూసిన వారు ఎవరూ లేరు. నాటిన మొక్క బతికే వరకైనా వాటిని సంరక్షించాల్సిన అవసరం ఉంది. పైగా వస్తున్నది వేసవి కాలం. కోటి మొక్కలు నాటితే వాటికి నీరు పోసి సంరక్షించే నాథుడెవరు అని ప్రశ్నిస్తున్నారు.
అసలు కోటి మొక్కలు నాటడానికి ఇది సరైన సమయమే కాదంటున్నారు కొందరు. కనీసం వర్షాకాలం ప్రారంభంలో నాటినా ఎంతో ప్రయోజనం ఉండేదని వారి వాదన. ఇప్పుడు నాటితే అవి ఎండిపోక తప్పదని, ఆ జాగ్రత్తలు తీసుకోగలిగితే ఇది మంచి కార్యక్రమం అవుతుందని అంటున్నారు. కాబట్టి మొక్కులు ఎవరు నాటినా అవి ఎండిపోకుండా ఉండే బాధ్యతను తీసుకోగలిగితే బాగుంటుంది.
Must Read ;- ‘మరో పదేళ్లు నేనే సీఎం’.. అందరికీ షాకిచ్చిన కేసీఆర్
