స్థానిక సంస్థల ప్రజా ప్రతినిధులకు సరైన సౌకర్యాలే లేవంటూ ఇటీవలే ఎమ్మెల్సీ హోదాలో కల్వకుంట్ల కవిత తెలంగాణ శాసన మండలిలో గళం విప్పి ఫలితం సాధించిన విషయం తెలిసిందే కదా. కవిత డిమాండ్ చేసిన మేరకు.. 24 గంటల వ్యవధిలోనే గ్రామ సర్పంచ్ల దగ్గర నుంచి ఎంపీటీసీలు, జడ్పీటీసీలు, ఎంపీపీలు, జడ్పీ చైర్మన్ల వేతనాలను 30 శాతం మేర పెంచుతూ కేసీఆర్ సర్కారు సంచలన నిర్ణయం తీసుకుంది. ఈ క్రమంలో తెలంగాణలోని ఇతరత్రా సమస్యలను కూడా కవిత ద్వారా వినిపిస్తే.. కేసీఆర్ సర్కారు చాలా వేగంగానే స్పందిస్తుందన్న వాదనలు వినిపించాయి. ఈ క్రమంలోనే ఇప్పుడు కవిత నోట నుంచి ఇంకో డిమాండ్ వినిపించింది. ఆ డిమాండ్ ను కూడా కేసీఆర్ సర్కారు త్వరలోనే నెరవేర్చే అవకాశాలు లేకపోలేదన్న వాదనలు వినిపిస్తున్నాయి.
నగర పాలికలను పట్టించుకోరా?
స్థానిక సంస్థలు అంటే.. కేవలం గ్రామ పంచాయతీలు, మండల, జిల్లా పరిషత్లే కాదు కదా. నగర పాలక సంస్థలు కూడా స్థానిక సంస్థల కిందకే వస్తాయి కదా. మరి గ్రామ, మండల, జిల్లా పరిషత్ల ప్రజా ప్రతినిధులకు వేతనాలు పెంచుతూ కేసీఆర్ సర్కారు నిర్ణయం తీసుకుంటే.. మరి నగర పాలక సంస్థల సంగతేంటి? ఇదే వాదన చాలా మంది నుంచి కూడా వినిపించింది. అయితే ఎవరు ఏం డిమాండ్ చేసినా కేసీఆర్ పెద్దగా పట్టించుకునే అవకాశం లేదు కదా. కూతురు ఏదో కోరిందని కేసీఆర్ స్థానిక సంస్థల ప్రజాప్రతినిధుల వేతనాలు పెంచారని ఇప్పుడు నగర పాలక సంస్థలకూ పెంచుతారా ఏంటి అనే వాదనలు కూడా వినిపించాయి. అయితే కవిత కోరితే కేసీఆర్ కాదనే ప్రసక్తే లేదు కదా. అందుకే కాబోలు.. నగర పాలక సంస్థల ప్రజా ప్రతినిధులు కూడా కవితను ఆశ్రయించినట్టున్నారు.. వారి కోరిక మేరకు వారి వేతనాలు కూడా పెంచాలని కవిత కోరారు.
రెండో డిమాండ్కూ స్పందన పక్కా
నగర పాలక సంస్థల ప్రజా ప్రతినిధులు కోరారో, లేదో తెలియదు గానీ.. మంగళవారం నాటి అసెంబ్లీ సమావేశాల్లో భాగంగా మండలిలో మరోమారు మాట్లాడిన కవిత.. ఈ దఫా నగర పాలక సంస్థలుగా ఉన్న మునిసిపాలిటీలు, నగర పాలక సంస్థల ప్రజా ప్రతినిధుల డిమాండ్లను ప్రస్తావించారు. స్థానిక సంస్థల కిందకే వచ్చే నగర పాలక సంస్థలను వదిలేశారని, ఇక్కడ కూడా ప్రజా ప్రతినిధులు సరిపడ సౌకర్యాలు, వేతనాలు లేక ఇబ్బందులు పడుతున్నారని కవిత తెలిపారు. గ్రామ, మండల, జిల్లా పరిషత్ ప్రజా ప్రజా ప్రతినిధుల మాదిరే మునిసిపాలిటీలు, కార్పొరేషన్లకు అవసరమైన మేర సౌకర్యాలు కల్పించడమే కాకుండా వారి వేతనాలు కూడా పెంచాలని కోరారు. మరి కవిత కోరినట్టుగా వీరి వేతనాలను కూడా కేసీఆర్ సర్కారు పెంచేయడం ఖాయమేనన్న వాదనలు వినిపిస్తున్నాయి.
Must Read ;- కూతురి దెబ్బకు కేసీఆర్ దిగొచ్చారే
