Raj Kundra Bribed Officials Rs 25 Lakhs To Avoid Arrest :
బాలీవుడ్ నటి శిల్పాశెట్టి భర్త రాజ్ కుంద్రా వ్యవహారంలో కొత్త విషయాలు అనేకం వెలుగు చూస్తున్నాయి. పోర్న్ వీడియోల చిత్రీకరణ వ్యవహారంలో రాజ్ కుంద్రా అరెస్ట్ అయిన సంగతి తెలిసిందే. అసలు ఈ విషయంలో రాజ్ కుంద్రా ఎప్పుడో అరెస్టు కావలసి ఉన్నా ఆయన కొంతమంది పోలీసు అధికారులకు రూ. 25 లక్షలు లంచం ఇవ్వడంతో ఇప్పటిదాకా పోలీసులు మీనమేషాలు లెక్కిస్తూ కూర్చున్నట్టు తెలుస్తోంది. ఆయనకు సంబంధించిన అనేక వ్యాపార లావాదేవీలు ఒక్కొటొక్కటిగా వెలుగులోకి వస్తున్నాయి.
హాట్ షాట్స్ అనే యాప్ కోసం అనేక పోర్న్ చిత్రాలు రూపొందించినట్టు ఆయనపై ప్రధాన ఆరోపణ. దీనికోసం ఆయన యూకే ప్రొడక్షన్స్ అనే కంపెనీతో చేతులు కలిపినట్టు నివేదికలు పేర్కొంటున్నాయి. ఈ యాప్ పై అనేక ఆరోపణలు రావడంతో గూగుల్ ప్లేస్టోర్ నుంచి దీన్ని తొలగించారు. దాంతో బోలీ ఫేమ్ అనే మరో బ్యాకప్ యాప్ కూడా కుంద్రాకు ఉండటంతో దాని ద్వారా తన వ్యాపారాన్ని విస్త్రృత పరిచారు. ప్రస్తుతం కుంద్రా జ్యుడిషియల్ కస్టడీలో ఉన్నారు. మరో సహ నిందితుడు రియాన్ తార్సే ఈ యాప్ ల వ్యవహారంలో సాంకేతిక సహాయం అందించాడు.
ఈ విషయం బయటకు పొక్కకుండా ఉండేందుకు రాజ్ కుంద్రా క్రైమ్ బ్రాంచ్ పోలీసులకు రూ. 25 లక్షలు లంచంగా చెల్లించినట్టు తెలుస్తోంది. అరెస్టు నుంచి తప్పించుకోవడం కోసం దర్యాప్తు అధికారులకు కూడా లంచం ఎరగా వేసినట్టు సమాచారం. పోలీసులు ఈ కేసును లోతుగా దర్యాప్తు చేస్తున్నారు. రాజ్ కుంద్రా మాజీ పీఏ ఉమేష్ కామత్ చిత్రీకరించిన దాదాపు 70 వీడియోలను పోలీసులు స్వాధీనం చేసుకున్నారు. రాజ్ కుంద్రాకు సంబంధించిన సర్వర్లు అన్నిటినీ క్రైమ్ బ్రాంచి స్వాధీనం చేసుకుంది.
ఫోరెన్సిక్ విశ్లేషణకు ఈ సర్వర్లను పంపిస్తున్నారు. ఈ వీడియోలు పెద్దల కోసం మాత్రమే చిత్రీకరించినవని, వీటిని పోర్న్ వీడియోలు అనడం సమంజసం కాదని రాజ్ కుంద్రా న్యాయవాది కోర్టులో వాదించారు. అసభ్యతకూ అశ్లీలతకూ చాలా తేడా ఉందని ఆయన పేర్కొన్నారు. ఈ కేసుకు సంబంధించి పలువురి బ్యాంకు ఖాతాల్లో రూ. 7.21 కోట్లను సీజ్ చేశారు. రాజ్ కుంద్రా అరెస్టుతో శిల్పాశెట్టి ‘హంగామా 2’ విడుదల ప్రశ్నార్థకమైంది.
Must Read ;- ఆ బూతే తన భవిష్యత్ అనుకున్న రాజ్ కుంద్రా
