స్మార్ట్ ఫోన్ లేని ప్రపంచాన్ని నేడు ఊహించలేం. ఒకప్పుడు ఆనందం కోసం వాడే స్మార్ట్ ఫోన్ ఇప్పుడు నిత్యావసరాల జాబితాలో చేరింది. అదే సమయంలో రిస్క్‌లూ పెరిగాయి. స్మార్ట్ ఫోన్ భద్రత ఇప్పుడు ప్రధానమైన అంశంగా మారింది. ఏ మాత్రం అజాగ్రత్తగా ఉన్నా వ్యక్తిగత ప్రైవసీ, ఆర్థిక లావాదేవీలే కాదు.. విలువైన సమాచారం కూడా సైబర్ నేరగాళ్ల చేతిలోకి వెళ్తోంది. భద్రతాపరంగా అత్యున్నత ప్రమాణాలు పాటిస్తామని చెప్పే ఏ కంపెనీ ఫోన్ వాడుతున్నా వినియోగదారుడు ఏ మాత్రం అజాగ్రత్తగా ఉన్నా సమాచారం బయటకు వెళ్తుందని పలు సంస్థలు చెబుతున్నాయి. ఫోన్ తో పాటు ఫోన్‌లోని సమాచారం కూడా భద్రంగా ఉండాలంటే పోలీసు విభాగంతో పాటు పలువురు నిపుణులు కొన్ని సూచనలు చేస్తున్నారు. ఉదాహరణకు..
యూట్యూబ్‌లో లేదా ఏదైనా యాప్‌లో వీడియో చూడగానే..
మనం యూట్యూబ్‌లో లేదా ఏదైనా యాప్‌లో వీడియో చూడగానే తరువాత కనిపించే వీడియోలు కూడా అదే కేటగిరీకి చెందినవి ఎక్కువగా కనిపిస్తాయి. మనం గూగుల్‌లో ఏదైనా గ్యాడ్జెట్ కోసం వెతికితే ఫోన్లో ఉన్న అమేజాన్, ఫ్లిప్ కార్ట్ లలో రిలేటెడ్ గ్యాడ్జెట్స్ కనిపిస్తాయి. అంటే ఫోన్ ద్వారా మన యాక్టివిటీ రికార్డు అవుతుంది. అంతవరకు అయితే పర్వాలేదనుకోవచ్చు. కాని మనం మాట్లాడే ప్రతి మాట, మనం చేసే ప్రతి పని ఫోన్‌కి తెలుస్తుందనే విషయం తెలిస్తే.. ఒక్కసారిగా షాక్ అవుతాం. కొన్ని జాగ్రత్తలు తీసుకుంటే ఆ ప్రమాదం నుంచి బయటపడవచ్చు.
ఇలా చేస్తే రిస్క్ ఎక్కువ..
ఇలా చేస్తే రిస్క్ ఎక్కువని గుర్తించాలి.ఫోన్ అన్‌లాక్ లేదా పాస్‌వర్డ్‌లు అందరికీ తెలిసేలా ఓపెన్ చేయడం. కొన్ని యాప్‌లకు అనుమతులు (పర్మిషన్స్) విషయంలో నిర్లక్ష్యంగా వ్యవహరించడం. అవసరం లేకున్నా పలు యాప్‌లు లాగిన్ అయి ఉండడం.థర్డ్ పార్టీ లింక్‌లు క్లిక్ చేయడం.వేరే వారికి ఫోన్ ఇచ్చినప్పుడు హ్యాకింగ్ లింక్‌లు ఇన్ స్టాల్ చేయడం. పిల్లలు ఫోన్ వినియోగిస్తున్న సమయంలో వారికి తెలియకుండానే ఏదంటే అది నొక్కేసి అనుమతులు ఇవ్వడం, కొన్ని యాప్‌లు ఓపెన్ చేయడం. చట్టవిరుద్దమైన, శిక్షార్హమైన పోర్న్ లేదా అశ్లీల వెబ్ సైట్లు, వీడియోలను డౌన్ లోడ్ చేసుకోవడం లేదా ఆ వెబ్ సైట్లలో ఉండే లింక్‌లు క్లిక్ చేయడం. గేమింగ్ యాప్‌లకు అవసరం లేకుండా వివిధ పర్మిషన్లు ఇవ్వడం. మాగ్నెట్ డౌన్ లోడ్స్‌కి అనుమతించడం… అంటే ఒక యాప్ ఇన్ స్టాల్ చేసుకుంటే దాంతో పాటు ఆ గ్రూపునకు చెందిన కొన్ని యాప్‌లు ఆటోమెటిక్‌గా డౌన్ లోడ్ అయ్యేందుకు అనుమతించడం. అపరిచితులతో వాట్సాప్‌, ఛాటింగ్‌, టెస్టింగ్‌లో తెలియనివారికి మెస్సేజ్‌లు వెళ్లడం. ఆన్ లైన్ గేమ్స్ లేదా వీడియో ఎడిటింగ్, ఫొటో ఎడిటింగ్ లేదా ఫేస్ రికగ్నైజేషన్ యాప్‌ల డౌన్ లోడ్, వినియోగం విషయంలో థర్డ్ పార్టీ లింక్‌లు కాకుండా ప్లే స్టోర్ లో రివ్యూలు లేదా రేటింగ్ చూసి డౌన్ లోడ్ చేసుకోవడం. ఆన్ లైన్ గేమ్స్ కోసం అవసరం లేకున్నా పర్మిషన్లు ఇచ్చేయడం. ఫోన్లో బ్యాంకింగ్ సమాచారం, డెబిట్, క్రెడిట్ కార్డుల ఫొటోలు సేవ్ చేసి ఉంచుకోవడం. యాప్‌లకు అవసరం లేని విధంగా ఒకే క్లిక్‌తో అన్ని పర్మిషన్లకు ఒక చెప్పడం.
ఫోన్లో సూచనలు..అలర్ట్‌లు
ఫోన్లో ఇలా సూచనలు..అలర్ట్‌లు వస్తుంటాయి. ఫోన్ పలుమార్లు ఆటోమెటిక్‌గా రీస్టార్ట్ కావడం.అనుమతి లేకుండానే కొన్ని యాప్‌లు డౌన్ లోడ్ కావడం.ఫోన్ నిర్ణీత సగటు డేటా వినియోగం కంటే ఎక్కువ డేటా వినియోగించడం.రెగ్యూలర్ వినియోగం కంటే తక్కువగా వినియోగించినా బఫరింగ్ టైం పట్టడం. కొన్ని మెస్సేజ్‌లు డిలీట్ కావడం లేదా మనం రిక్వెస్ట్ పెట్టకపోయినా ఓటీపీలు రావడం.ఫోన్ స్లో కావడం.కెమెరా ఫ్లాష్ సౌండ్ తరచూ వినిపించడం.మనం మాట్లాడుకున్న విషయాలు, గాడ్జెట్లకు సంబంధించిన సమాచారం ఫోన్లో తరచూ కనిపించడం.
ఆనందంతో పాటు రిస్క్ కూడా..
ఆనందం కోసం సరే..కాని రిస్క్ కూడా ఉండే సందర్భాలూ ఉంటాయి. ఏదైనా యాప్ డౌన్ లోడ్ చేసుకుంటే పర్మిషన్లలో స్టోరేజీ, కెమెరా, కాంటాక్ట్ , మైక్రోఫోన్‌ల పర్మిషన్లు ప్రధానంగా కనిపిస్తాయి. ఉదాహరణకు ఓకే గూగుల్‌, సిరి, అమెజాన్‌ ఎకో లాంటివి మనం వాయిస్‌ కమాండ్‌ ప్రకారం పని చేస్తాయి. అంటే మన మాట మైక్రోఫోన్ ద్వారా గ్రహిస్తాయి. ఆ యాప్ అలాగే లాగిన్‌లో ఉంచితే నిరంతరం మైక్రోఫోన్ పనిచేస్తూనే ఉంటుంది. మన మాటలన్నీ వింటూ ఉంటుంది. ఆటోమేటెడ్‌ కంటెంట్‌ రికగ్నిషన్‌ టెక్నాలజీ ద్వారా ఇది పని చేస్తున్న నేపథ్యంలో అన్ని శబ్దాలనూ వింటుంది. లొకేషన్ ఆన్ చేసి ఉంటే మన కదలికలు, మాటలు అన్నీ ఫోన్లో నమోదు అవుతాయి. ఇక స్మార్ట్ టీవీలు, ఫోన్లను చాలా మంది అనుసంధానం చేస్తుంటారు. ఆ సమయంలో స్మార్ట్ హబ్‌ (శాంసంగ్ టీవీ)లోకి వెళ్లి టర్మ్‌ అండ్‌ పాలసీ కింద ‘సింక్‌ ప్లస్‌ అండ్‌ మార్కెటింగ్’ ఆప్షన్‌ని డిజేబుల్‌ చేయాలి. ఎల్జీ టీవీ అయితే ఆప్షన్లలో ‘లైవ్‌ప్లస్‌’ని ఆఫ్‌ చేయాల్సి ఉంటుంది.
Also Read ;- నకిలీ కస్టమర్ కేర్ నంబర్లు.. అడిగినవన్నీచెబితే ఖాతాలు ఖాళీ
మన ప్రైవసీనే వాళ్లకి మార్కెటింగ్..
మన ప్రైవసీనే వాళ్లకి మార్కెటింగ్‌కు ఉపయోగపడుతుంది. మనం ఏమైనా చట్టవిరుద్దమైన కార్యక్రమాలు చేయడం లేదు కదా.. మన చేసేది రోజూవారి కార్యకలాపాలే కదా తెలిస్తే ఏముంది అనుకుంటారు. అయితే మనం చేసే ఆ రోజూవారి కార్యకలాపాలు కొంతమందికి వ్యాపారంగా మారే ప్రమాదం ఉంది. మనం ఫోన్లో ఏవైనా ఫోన్లు, కార్లు లేదా వస్తువుల సమాచారం వెతికితే ఆ సమాచారం ఫోన్లో సేవ్ అవుతుంది. మనం వాడే యాప్‌లకి సంబంధించి కచ్చితంగా మెయిల్ ఐడీ లేదా ఫోన్ నెంబరు అనుసంధానం అయి ఉంటుంది. కాబట్టి మనం ఏయే విభాగాలకు చెందిన వస్తువులపై ఆసక్తి చూపిస్తున్నాం, రానున్న కాలంలో ఏ వస్తువు కొనాలనుకున్నామనేది కూడా తెలిసిపోతుంది. ఈ డేటాను సేకరించే కొన్ని యాప్‌లు, సోషల్ మీడియా సైట్లు ఆ డేటాను మార్కెటింగ్ కంపెనీలకు కొన్ని కోట్ల రూపాయలకు విక్రయిస్తాయి.
ఫోన్‌కి పర్మిషన్ల విషయంలో..
ఫోన్‌కి పర్మిషన్ల విషయంలో చెక్ చేసుకోవడం, పిల్లల చేతిలో ఫోన్ ఉన్న సమయంలో ఓ కన్నేసి ఉంచడం, తెలియని యాప్‌లను, లింక్‌లను క్లిక్ చేయకుండా ఉండడం, ఫోన్ అన్ లాక్ ప్యాట్రన్ లేదా పాస్ వర్డ్ తరచూ మార్చుకోవడం, ఫోన్ పనితీరులో తేడా వస్తే మెమోరీ కార్డు తీసేసి ఫ్యాక్టరీ రీసెట్ చేసుకోవడం లాంటివి పాటిస్తే కొంతవరకు ఫోన్ భ్రదంగా ఉంటుందని నిపుణులు చెబుతున్నారు. యాప్స్‌ని వాడని సమయంలో మ్యూట్ లేదా డిసేబుల్ చేసుకోవడం ద్వారా కూడా కొంత భద్రత పొందవచ్చని నిపుణులు చెబుతున్నారు. ఇక సైబర్ నేరాలు, నివారణ, సైబర్ భద్రతలపైనా సైబర్ సెక్యూరిటీపై ఎలాంటి ఫిర్యాదులు ఉన్నా డయల్‌ 100 లేదా 9490617111 నెం.కు వాట్సాప్‌ చేయవచ్చు. పిల్లలు ఫోన్ వినియోగం విషయంలో ఎలాంటి సందేహాలున్నా టోల్‌ ఫ్రీ నెం. 18004256235కు కాల్‌ చేసి గాని www.infosecawareness.in ద్వారా గానీ మరింత సమాచారం పొందవచ్చు.
Must Read ;- బాప్ రే.. యాప్ లు.. బతుకు బస్టాండే!
