కళాతపస్వి కె.విశ్వనాథ్ తెలుగు తెరకు ఆణిముత్యాల వంటి ఎన్నో సినిమాలను అందించారు. సంగీతం .. సాహిత్యం .. నృత్యం ప్రధానంగా ఆయన అల్లుకున్న కథలు .. అందించిన చిత్రాలు నేటికీ ప్రేక్షకుల హృదయాల తలుపులను తడుతూనే వున్నాయి .. మనసుకు మధురానుభూతుల రెక్కలను తగిలిస్తూనే వున్నాయి. అలాంటి విశ్వనాథ్ నుంచి వచ్చిన సందేశాత్మక చిత్రాల్లో ‘సప్తపది’ ఒకటిగా కనిపిస్తుంది. ఆ సినిమాలో నాయకా నాయికలుగా నటించిన గిరీశ్ ప్రధాన్ .. సబిత తాజాగా ‘అలీతో సరదాగా’ కార్యక్రమం ద్వారా అలనాటి సంగతులను అభిమానులతో పంచుకున్నారు.
*’సప్తపది’ కథానాయకుడు గిరీశ్ ప్రధాన్ మాట్లాడుతూ, “చెన్నై ఫిల్మ్ ఇనిస్టిట్యూట్ లో నేను కన్నడ బ్యాచ్ స్టూడెంట్ గా నటనలో శిక్షణ పొందుతుండేవాడిని. ‘సప్తపది’ సినిమాలో కొత్త హీరో కోసం ఒకరోజున విశ్వనాథ్ గారు ఫిల్మ్ ఇనిస్టిట్యూట్ కి రావడం జరిగింది. తను అనుకున్న పాత్రకు అక్కడ ఎవరూ సెట్ కారనిపించి ఆయన వెళ్లిపోయారు. ఆ రోజున నేను ఇనిస్టిట్యూట్ కి వెళ్లలేదు. ఆ మరుసటి రోజు నాకు విషయం తెలిసి, వెళ్లి విశ్వనాథ్ గారిని కలిశాను. తొలిసారి ఆయనను చూడగానే భయం వేసింది. ఆయన నన్ను ఆ పాత్రకి ఎంపిక చేశారు. వెంటనే తెలుగు భాష .. ఫ్లూట్ వాయించడం నేర్చుకోమని చెప్పారు. ఆ రోజు నుంచే వాటిని సాధన చేశాను.
*ఆ తరువాత నేను వంశీ గారి దర్శకత్వంలో ‘మంచుపల్లకి’ సినిమాలో చేశాను. చిరంజీవిగారితో పాటు నేను .. రాజేంద్రప్రసాద్ .. నారాయణరావు .. సాయిచంద్ కలిసి నటించాము. ఓ రోజున ఆ సినిమాకి సంబంధించి ‘వెల్ కమ్ వెల్ కమ్ న్యూ ఇయర్’ అంటూ సాగే పాటను ‘తార’ మాస్టర్ నృత్య దర్శకత్వంలో చిత్రీకరిస్తున్నారు. ఆ పాటకు డాన్స్ చే స్తుండగా, నా కాళ్లకు ‘షూ’ లేకపోవడం చిరంజీవిగారు చూసి అడిగారు. ‘ఈ రోజున సాంగ్ షూట్ అని తెలియదండి’ అన్నాను నేను. ఆ తరువాత కొద్ది సేపటికే లంచ్ బ్రేక్ ఇచ్చారు.
*చిరంజీవిగారు ఇంటికి వెళ్లి లంచ్ చేసి వస్తానని చెప్పి, నన్ను కూడా తీసుకుని వెళ్లారు. చిరంజీవిగారితో పాటు నేను కూడా అక్కడే భోజనం చేశాను. ఆ తరువాత చిరంజీవిగారు కొత్త ‘షూ’ తెప్పించి నాకు ఇచ్చారు. ‘ఎందుకండీ’ అన్నాను ఆశ్చర్యపోతూ. ‘డాన్స్ చేయాలంటే కాళ్లకి ‘షూ’ ఉండాలి .. నువ్వేమో చెప్పులు వేసుకున్నావు .. ‘షూ’ వేసుకో అన్నారు. చిరంజీవిగారంటే ఏమిటో అప్పుడే నాకు అర్థమైంది. లంచ్ తరువాత నేను ‘షూ’ వేసుకుని డాన్స్ చేశాను. ఒక తీపి జ్ఞాపకంగా ఆ ‘షూ’ను అలాగే దాచుకున్నాను .. ఇప్పటికీ అవి అలాగే వున్నాయి” అని చెప్పుకొచ్చారు.
Must Read ;- సీరియల్ కిల్లర్ గా ఇండియన్ మైకేల్ జాక్సన్ .. !
