‘ఎవరు’ తరువాత రెజీనా ఏం చేస్తోంది?

ఏ రంగంలోనైనా ఆగకుండా పరిగెడుతూనే ఉండాలి. అప్పుడే అనుకున్న లక్ష్యానికి చేరుకునే అవకాశం ఉంటుంది. పరుగు ఆపిన రోజున ఈ ప్రపంచం వెనక్కి నెట్టేస్తుంది .. ఒంటరిని చేసేస్తుంది. చిత్రపరిశ్రమ కూడా ఇందుకు మినహాయింపు కాదు. ఇక్కడ కథానాయికల మధ్య గట్టి పోటీ ఉంటుంది. ఇది కోట్ల రూపాయల బిజినెస్ .. అందుకే ఒక అవకాశం చిక్కడానికీ, ఒక విజయం దక్కడానికి మధ్య చాలా తతంగం ఉంటుంది. అందుకే కథానాయికలు తమకి వచ్చిన ప్రతి అవకాశాన్ని సద్వినియోగం చేసుకోవడానికి చాలా కృషి చేస్తుంటారు.

అలాంటి కథానాయికలలో ఒకరుగా రెజీనా కనిపిస్తుంది. 15 సంవత్సరాల క్రితం రెజీనా కథానాయికగా తన పరుగును మొదలుపెట్టింది. తమిళ సినిమాతో తన కెరియర్ ను ఆరంభించిన రెజీనా, ‘శివ మనసులో శృతి’ సినిమాతో తెలుగు తెరకి పరిచయమైంది. ఆ తరువాత గ్లామర్ పరంగా ఆకట్టుకుంటూ .. నటనపరంగా మెప్పిస్తూ చకచకా అవకాశాలను దక్కించుకుంది. కానీ ఆశించినస్థాయిలో ఆమెను విజయాలు వరించలేదు. ‘పిల్లా నువ్వులేని జీవితం’ .. ‘సుబ్రమణ్యం ఫర్ సేల్’ .. ‘జ్యో అచ్యుతానంద’ .. ఇలా కొన్ని విజయాలను మాత్రమే ఆమె తన ఖాతాలో వేసుకోగలిగింది.

చివరిగా తెలుగులో ఆమె చేసిన ‘ఎవరు’ సినిమా కూడా సక్సెస్ ను సాధించింది. ఒక రకంగా ఇది కథానాయిక ప్రాధాన్యత కలిగిన చిత్రమేనని చెప్పాలి. ఎందుకంటే కథ అంతా కూడా ఆమె పాత్ర చుట్టూనే తిరుగుతూ ఉంటుంది. ఈ సినిమాలో ‘సమీరా’ పాత్రలో ఆమె చూపిన సహజమైన నటనకు మంచి మార్కులు పడ్డాయి. ఈ సక్సెస్ తో తెలుగులో ఆమె కెరియర్ మళ్లీ పుంజుకుంటుందని అభిమానులు భావించారు. ఆ తరువాత కొత్త ప్రాజెక్టులను రెజీనా అంగీకరించిన దాఖలాలు కనిపించకపోవడంతో, ఆమె వెనుకబడిపోయిందని అనుకుంటున్నారు. కానీ ఇప్పుడు ఆమె ఫుల్ బిజీ .. అవును వరుస తమిళ చిత్రాలతో ఆమె తీరిక లేకుండా వుంది.

రెజీనా చేతినిండా ఇప్పుడు తమిళ సినిమాలే వున్నాయి. ఎస్.జె.సూర్య ప్రధాన పాత్రను పోషిస్తున్న ఓ హారర్ మూవీలో రెజీనా ఒక కీలకమైన పాత్రను పోషిస్తోంది. సెల్వరాఘవన్ ఈ సినిమాకి దర్శకుడిగా వ్యవహరిస్తున్నాడు. ఇక వెంకట్ ప్రభు దర్శకత్వం వహిస్తున్న ‘పార్టీ’ అనే కామెడీ ఎంటర్టైనర్లోను ఆమె ఒక విభిన్నమైన పాత్రను చేస్తోంది. విశాల్ హీరోగా ఎమ్.ఎస్.ఆనందన్ రూపొందిస్తున్న ‘చక్ర’ అనే థ్రిల్లర్ మూవీలో ఆమె ఒక వైవిధ్యభరితమైన పాత్రను పోషిస్తోంది. ఇంతవరకూ తాను చేయనటువంటి పాత్ర కావడంతో, ఆమె ఈ సినిమాపై భారీ హోప్స్ పెట్టుకుందట.

ఇక అరవిందస్వామి హీరోగా రాజాపాండి తెరకెక్కిస్తున్న యాక్షన్ థ్రిల్లర్ లోను .. చింబుదేవన్ దర్శకుడిగా రూపొందుతున్న ‘కసడతపర’ సినిమాలోను ప్రాధాన్యత కలిగిన పాత్రలను రెజీనా దక్కించుకుంది. వివిధ జోనర్లలో సాగే కథలను .. విభిన్నమైన పాత్రలను ఎంచుకున్న రెజీనా, ఆ సినిమాల రిజల్ట్ విషయంలో ఎంతో ఆశాభావంతో వుందని అంటున్నారు. ఈ బంచ్ నుంచి రెండు గట్టి హిట్లు పడినా, మరికొంతకాలం పాటు అక్కడ ఆమె హవా కొనసాగే అవకాశాలు పుష్కలంగా వున్నాయి.