Jagan Silver Jubilee Marriage Day Celebrations In Shimla :
వైసీపీ అధినేత, ఏపీ సీఎం వైఎస్ జగన్ మోహన్ రెడ్డి ఏటా ఆగస్టు 28వ తేదీని ప్రత్యేకంగా సెలబ్రేట్ చేసుకుంటారు. ఎందుకంటే.. వైఎస్ భారతితో ఆయన పెళ్లి జరిగింది ఈ రోజే. ఏటా వివాహ వార్షికోత్సవాన్ని జరుపుకుంటున్న జగన్.. ఈ ఏడాది మాత్రం మరింత ప్రత్యేకంగా ఆ వేడుకను నిర్వహించుకుంటున్నారు. ఎందుకంటే.. ఈ ఏడాది నిర్వహించుకునే పెళ్లి వేడుక పాతికేళ్ల పెళ్లి వేడుక. అంటే.. సిల్వర్ జూబ్లీ మ్యారేజ్ డే అన్న మాట. ఒక్క జగన్ కే ఏమిటి? ఇలాంటి వేడుకలు ప్రతి ఒక్కరికీ ప్రత్యేకమే. జగనేమీ మానవాతీతుడు కాదు కదా. అందుకే సిల్వర్ జూబ్లీ మ్యారేజ్ డే వేడుకను కాస్తంత ఘనంగా నిర్వహించుకునేందుకు జగన్ ప్లాన్ చేసుకున్నారు. ఈ వేడుకలను జగన్ తన ఫ్యామిలీతో కలిసి సిమ్లాలో జరుపుకునేందుకు ప్లాన్ చేసుకున్నారు.
విదేశాలకు వెళ్లలేకే..
వాస్తవానికి ఈ తరహా వేడుకలను జగన్ లాంటి ప్రముఖులు విదేశాల్లో ప్లాన్ చేసుకుంటారు. జగన్ కూడా ఈ వేడుకను విదేశాల్లోనే ప్లాన్ చేసుకున్నారు. అందులో భాగంగా ఈ నెలాఖరులో జగన్ విదేశాలకు కుటుంబ సమేతంగా వెళ్లనున్నారని.. ఈ పర్యటనలో ఆయన లండన్, పారిస్ లలో పర్యటిస్తారని రెండు రోజుల క్రితం వార్తలు వెలువడ్డాయి. అయితే ప్రస్తుతం జగన్ అక్రమాస్తుల కేసుల్లో పీకల్లోతు కూరుకుపోయారు కదా. దానికి తోడు ఈ కేసుల్లో అరెస్టైన జగన్ .. చాలా కాలం నుంచి బెయిల్ పై ఉన్నారు. ఆ బెయిల్ ను రద్దు చేయాలంటూ తన పార్టీకి చెందిన ఎంపీ రఘురామకృష్ణరాజు నేరుగా సీబీఐ కోర్టులోనే పిటిషన్ దాఖలు చేశారు. దీనిపై ఇప్పటికే విచారణ పూర్తి కాగా.. బుధవారం (ఈ నెల 25న అంటే.. మ్యారేజ్ డేకు 3 రోజుల ముందు అన్నమాట)నాడు తుది తీర్పు వస్తుందని అంతా అనుకున్నారు. వెరసి వైసీపీలో టెన్షన్ నెలకొంది. అయితే కోర్టు తన తీర్పును వచ్చే నెల 15కు వాయిదా వేసింది. ఈ నేపథ్యంలో జగన్ తన మ్యారేజ్ డే సిల్వర్ జూబ్లీ వేడుకలను విదేశాల్లో జరుపుకునే వెసులుబాటు లేకపోయింది.
రద్దు చేసుకోలేక సిమ్లాకు
బుధవారం నాడు సీబీఐ కోర్టు జగన్ బెయిల్ ను రద్దు చేసి ఉంటే.. అసలు సిల్వర్ జూబ్లీ వేడుకలు కాదు కదా.. మ్యారేజ్ డే కూడా లేకుండానే జగన్ జైలుకెళ్లేవారు. బెయిల్ రద్దు కాకపోయి ఉంటే.. విదేశాలకు వెళ్లేందుకు అనుమతి ఇవ్వాలని కోర్టులో పిటిషన్ వేసి ఎలాగోలా అనుమతి తీసుకుని ఫారిన్ చెక్కేసేవారు. బెయిల్ పై తీర్పు వాయిదాతో ఇటు సిల్వర్ జూబ్లీ వేడుకను వాయిదా వేయలేని పరిస్థితి. అలాగని తాను అనుకున్నట్లుగా ఫారిన్ వెళ్లలేని పరిస్థితి. మొత్తంగా జగన్ ఒకింత అన్యమనస్కంగానే తన సిల్వర్ జూబ్లీ మ్యారేజ్ డే వేడుకలను జరుపుకుంటున్నారనే చెప్పాలి.
Must Read ;- జగన్ కు రఘురామ రిలీఫ్ ఇప్పించారే!
