అన్నీ సుఖాలే ఉంటే జీవితంలో థ్రిల్ ఉండదనేమో భగవంతుడు మనిషి జీవితంలో కష్టాలు కూడా పెడుతుంటాడు. ఆ కష్టాలలో నుంచే సుఖాలను వెతుక్కునే జీవులు కొందరు. అది కూడా అదృష్ట దేవత కరుణా కటాక్షాల మీద ఆధారపడి ఉంటుంది. ఈ కళా రంగంలో ఒక శ్యామల పస్తులతో మలమల మాడుతుంటే మరో శ్యామల వెలిగిపోతూ ఉంటుంది. ఎవరు ఎలా ఉన్నా వారి జీవితాల వెనక మెరుపులు ఎన్ని ఉంటాయో మరకలు కూడా అన్ని ఉంటాయి. తన జీవితంలో ఎన్ని అనుభవాలు ఉన్నాయో ఓ ఇంటర్వ్యూలో యాంకర్ శ్యామల చెప్పారు.
సీరియల్ నటిగా ప్రవేశించిన ఆమె ఆ తర్వాత యాంకర్ గా మారారు. ఈ రంగంలో ఆమె నిలదొక్కుకోవడం వెనక చాలా కష్టాలు ఉన్నాయట. ఇటీవలే ఆమె భర్త ఓ కేసులో కూడా అరెస్టయ్యారు. ఇంతకీ శ్యామల జీవితంలో ఎలాంటి ఒడిదొడుకులు ఉన్నాయో చూద్దాం. అమ్మ గురించి ఇటీవల మదర్స్ డే సందర్భంగా చెప్పిన మాటలు వింటే మన హృదయం ద్రవిస్తుంది. వాళ్ల అమ్మ నలభై ఏళ్ల వయసులో శ్యామల పుట్టారట. కొద్ది రోజుల్లోనే తండ్రి చనిపోవడంతో అమ్మ చేతుల్లోనే పెరిగింది.
నిష్టాగరిష్టులైన భ్రాహ్మణ కుటుంబం వారిది. మనం కష్టాల్లో ఉన్నప్పుడు బంధువులు కూడా దగ్గరకు రారన్న విషయం అప్పుడే ఆమెకు అర్థమైంది. శ్యామల చిన్నప్పుడు జ్వరం వచ్చిందట. బంధువులు ఎవరూ దగ్గరకు రాలేదు. పైగా ఘోషా ఒకటి. ఎవరినైనా తోడు రమ్మంటే రిక్షాకు పరదా కట్టి తీసుకువెళ్లమని సూచన చేశారట. దాంతో బంధువులకు దూరంగా ఉంటూ వచ్చారు. అయినా వాళ్ల మీద ద్వేషం ఏమీ లేదట. శ్యామల తల్లి బతుకు తెరువు కోసం నర్సుగా చేసేది. ఎక్కడికైనా వెళ్లాలంటే సైకిలే. ఓసారి అమ్మతో కలిసి శ్యామల కూడా వెళ్లిందట.
వారు ఇంటికి తిరిగొచ్చేసరికి బాగా చీకటైంది. దారిలో కొందరు వారిని వెంబడించారు. అయితే వాళ్ల అమ్మ తమను వెంటబడే వారి దగ్గరకు వెళ్లి ‘మీకేం కావాలి?.. నా వయసు నలభై నాలుగేళ్లు. మీ అమ్మ వయసు కూడా ఇంతే ఉండొచ్చేమో. ఇది మీకు పద్ధతేనా?’ అంటూ నిలదీసిందట. దాంతో వారు ఎలా వచ్చారో అలా వెళ్లిపోయారు. పైగా మీకేమైనా అవసరమైతే చెప్పండి.. సాయం చేస్తాం అన్నారట. అలా తన చిన్నప్పటి జ్ఞాపకాలను శ్యామల నెమరువేసుకున్నారు.
Must Read ;- చిత్ర పరిశ్రమలో వరుసగా కరోనా మరణాలు
