2024 ఎన్నికల్లో టీడీపీకి విజ‌య‌మే ల‌క్ష్యంగా ఆ పార్టీ అధినేత నారా చంద్ర‌బాబునాయుడు ఇప్ప‌టినుంచే పక్కా ప్ర‌ణాళిక‌తో ముందుకు సాగుతున్నారు. ఇందుకోసం ఆయ‌న విప‌క్షాల‌న్నింటినీ ఏకం చేసే దిశ‌గా పావులు క‌దుపుతున్నార‌న్న వాద‌న‌లు వినిపిస్తున్నాయి. 2014లో మాదిరిగా బీజేపీ, జ‌న‌సేల‌తో కలిసి కొత్త జ‌ట్టు క‌ట్టేందుకు చంద్రబాబు య‌త్నిస్తున్నార‌ని తెలుస్తోంది. అవ‌స‌ర‌మైతే వామపక్షాలను కూడా క‌లుపుకునిపోయే దిశ‌గా చంద్రబాబు వ్యూహాలు ర‌చిస్తున్నార‌ట. ఈ పార్టీల్లో ఏ పార్టీలు కూడా చంద్రబాబు ప్ర‌తిపాద‌న‌ను ప‌క్క‌న‌పెట్టే ప్ర‌సక్తే లేద‌న్న వాద‌న‌లూ లేక‌పోలేదు. ఒక‌వేళ టీడీపీతో బీజేపీ దోస్తీ క‌డితే.. వామ‌పక్షాలు కూట‌మిగా జ‌త‌కూడ‌టానికి విముఖ‌త చూపినా.. జనసేన, బీజేపీల‌తోనే చంద్రబాబు పాత జ‌ట్టునే కొత్త జ‌ట్టుగా రూపొందించుకుని ముందుకు సాగే అవ‌కాశాలున్నాయ‌ట. ఈ మేర‌కు ఎన్నిక‌ల‌కు ఇంకా రెండున్న‌రేళ్లు ఉన్నా.. ఇప్ప‌టినుంచే చంద్రబాబు తనదైన శైలి వ్యూహాల‌కు ప‌దును పెడుతున్న‌ట్లుగా సమాచారం.
సెల్ఫ్ డిఫెన్స్ లో వైసీపీ
చంద్రబాబుపై పింక్ డైమండ్ చోరీ, పోలవరం ప్రాజెక్టులో అవినీతి, అమరావతి భూములలో ఇన్ సైడ్ ట్రేడింగ్‌, రాజధాని కోసం దళితుల భూములు లాక్కున్నారు.. ఇలా ఇంకా అనేక విషయాలలో వైసీపీ చేసిన ఆరోపణలు గాలికి కొట్టుకుపోయాయి. ఇప్పుడు చంద్రబాబును విలన్ గా చూపెట్టడానికి ఎలాంటి అంశాలు దొరకపోగా.. వైసీపీ పాలన వైఫల్యాలతో, దౌర్జ్యనాలతో, నేత‌ల అవినీతితో ప్రజలలో నమ్మకం కోల్పోయి డిఫెన్స్ పడిపోయింది. ఈ తరుణంలో చంద్రబాబు రాష్ట్రంలో జగన్ ను ఒంటరి చేయాలని పావులు కదుపుతున్నట్లు సమాచారం. చంద్రబాబు బీజేపీ తో స్నేహ సంబంధాలు నడుపుతూనే జగన్ ను బీజేపీ నుండి దూరం చేయాలని ప్రయత్నాలు చేస్తున్నారు. ఈ దిశ‌గా ఇప్ప‌టికే ఓ ప‌కడ్బందీ వ్యూహాన్ని ర‌చించిన చంద్రబాబు.. దానిని నిదానంగా అమ‌లులోకి తీసుకొచ్చే చ‌ర్య‌లు ప్రారంభించార‌న్న వాద‌న‌లు వినిపిస్తున్నాయి. ఈ త‌ర‌హా వ్యూహంతో జగన్ కు చంద్రబాబు చెక్ పెట్ట‌డం ఖాయ‌మేనని చెప్పాలి.
ఫ్రంట్ ఏర్పాటులో బాబు దిట్ట
రాష్ట్ర రాజకీయాలు పరిశీలిస్తే అమరావతి ఉద్యమం, విశాఖ ఉక్కు ఉద్యమాల్లో బీజేపీ మినహా అన్ని రాజకీయ పార్టీ లు కలసి ఉద్యమిస్తున్నాయి. బీజేపీ- జనసేన కలసి పని చేస్తున్నా.. బీజేపీ కొన్ని విషయాలలో వ్యవహరించిన తీరుతో లోలోపల జన సైనికులు, పవన్ కూడా ఆ పార్టీతో అంటి అంటనట్లు ఉన్నట్లు సమాచారం. అయితే ఈ రెండు పార్టీలు గ‌తంలో టీడీపీతో జ‌త క‌ట్టిన పార్టీలే కాబ‌ట్టి.. వాటి మ‌ధ్య ఉన్న విభేదాల‌ను సామ‌ర‌స్య‌పూర్వ‌కంగా ప‌రిష్క‌రించేలా కూడా చంద్రబాబు ప్లాన్ చేస్తున్న‌ట్లుగా సమాచారం. ఈ క్ర‌మంలోనే ఆయ‌న జాతీయ స్థాయి రాజకీయ ప‌రిణామాల‌పై ఓ క‌న్నేసి ఉంచార‌ట. ఢిల్లీలో జ‌రుగుతున్న ప‌రిణామాల‌ను తనదైన శైలిలో ప‌రిశీలిస్తున్న చంద్రబాబు.. ఏ క్ష‌ణాన్నైనా బీజేపీ ముందు కొత్త జ‌ట్టు ప్ర‌తిపాద‌న పెట్టే దిశ‌గా క‌దులుతున్నార‌ట. ఇక ఒంట‌రిగా జనసేన సాధించేదేమీ లేద‌న్న విష‌యం ఆ పార్టీతో పాటు ఆ పార్టీ అధినేత పవన్ క‌ల్యాణ్ కు కూడా తెలుసు కాబ‌ట్టి.. టీడీపీతో పొత్తు ప్ర‌తిపాద‌న‌ల‌కు ఆ పార్టీ నుంచి ఎలాంటి వ్య‌తిరేక‌త రాక‌పోవ‌చ్చ‌న్న విశ్లేష‌ణ‌లు సాగుతున్నాయి. జగన్ తో కొన‌సాగిస్తున్న లోపాయికారీ మైత్రి నేప‌థ్యంలో టీడీపీతో మైత్రికి బీజేపీ వెనుకాడితే.. జ‌న‌సేన‌తో పాటుగా వామపక్షాలను క‌లుపుకుని పోయే దిశ‌గా చంద్రబాబు ప్లాన్ చేస్తున్నార‌ట. మొత్తంగా క‌నీసం రెండు పార్టీల‌తో జ‌ట్టు క‌ట్టి 2024 ఎన్నికల్లో జగన్ కు చెక్ పెట్టే దిశ‌గా చంద్రబాబు ఇప్ప‌టినుంచే వ్యూహాలు ర‌చిస్తున్నార‌న్న వాద‌న‌లు టీడీపీ శ్రేణుల్లో కొత్త ఉత్సాహాన్ని నింపుతున్నాయ‌న్న వాద‌న‌లు వినిపిస్తున్నాయి.
Must Read ;- బాబు స‌త్తా ఇది!.. ఎనీ బ‌డీ కేన్ చెక్!
