కొత్త తరహా కథలకు జనం పట్టం కడతారని ‘ఉప్పెన’ చిత్రం నిరూపించింది. అందులో హీరో వైష్ణవ్ తేజ్ తన మగతనాన్ని కోల్పోతాడు. ‘ఏక్ మినీ కథ’ కూడా అలాంటి తరహా కథే. ఇందులో హీరో పురుషాంగం చిన్నగా ఉంటుంది. ఇలాంటి కథను ఎంచుకుని యూవీ క్రియేషన్స్ అనుబంధ సంస్థ యువీ కాన్సెప్ట్ బ్యానర్ లో మ్యాంగో మాస్ మీడియాతో కలిసి ఈ సినిమాని నిర్మించింది. సంతోష్ శోభన్, కావ్య థాపర్, శ్రద్ధా దాస్ హీరోహీరోయిన్లుగా నటించారు. ఈ సినిమా అమెజాన్ ఓటీటీలో విడులైంది. ఎలాంటి ఫలితాన్ని ఇచ్చిందో చూద్దాం.
కథలోకి వెళితే..
హీరో మగతనానికి సంబంధించిన కథ ఇది. ఈ కథను దర్శకుడు మేర్లపాక గాంధీ రాశారు. స్వాతి పత్రికలో సుఖ సంసారంలో డాక్టర్ సమరానికి ఓ పాటకుడు అడిగిన ప్రశ్న నుంచి ఈ కథ పుట్టిందని మేర్లపాక గాంధీ చెప్పార. ఇది పెద్దలకు మాత్రమే సినిమా అని అప్పుడే అర్థమైంది. నిజానికి ఇది మినీ కథ అయినా సమస్య పెద్దదే. పురుషాంగం సైజు చిన్నగా ఉంటే బెంగపడిపోయేవారు చాలామందే ఉంటారు. సైజ్ డజన్ట్ మేటర్ అని సమరంగారు సమాధాన పర్చినా యువతలో ఆందోళన ఆగదు కదా. ఈ సమస్య ఓ యువకుడికి ఎదురైతే ఎలాంటి పరిణామాలు తలెత్తాయి? చివరికి ఈ సమస్య ఎలా పరిష్కారమైంది? అన్నదే ఇక్కడ పాయింటు.
నిజానికి ఇలాంటి కథను అందంగా చెప్పడం కూడా కత్తిమీద సామే. ఈ మినీ కథలో ఎలాంటి మెనీ థింగ్స్ ఉన్నాయో చూద్దాం. సంతోష్ (సంతోష్ శోభన్) కి తన పురుషాంగం `సైజ్` చిన్నదన్న ఆందోళన. దీంతో చదువు సరిగా సాగలేదు.. ఎలాగో ఇంజినీరింగు పాసై ఉద్యోగం చూసుకుంటాడు. దాని సైజు పెంచుకోడానికి ఏమేం చేయాలో అన్నీ చేస్తాడు. ఏదీ వర్కవుట్ కాదు. చివరికి ఆపరేషన్ కు సిద్ధమవుతాడు.
అదే సమయంలో అతనికి అమృత (కావ్య థాపర్)తో పెళ్లి కుదురుతుంది. పైగా ఆమెకున్న కోరికలే వేరు. ఆమెకు మాత్రం అన్నీ పెద్ద పెద్దవే కావాలనే కోరక ఎక్కువ. దీంతో అతనిలో మరింత భయం పెరిగిపోతుంది. కానీ ఆమెతో ప్రేమలో పడటం వల్ల పెళ్లికి ఒప్పుకుంటాడు. శోభనం జరిగితే బండారం బయటపడుతుందని దాన్ని మాత్రం వాయిదా వేస్తుంటాడు. మరి శోభనం జరిగిందా లేదా? దాని సైజు ఎలా పెంచగలిగాడు? ఆమె అతన్ని ఎలా రిసీవ్ చేసుకుంది? ఇలాంటి ప్రశ్నలకు సమాధానాన్ని సినిమా చూసి తెలుసుకోవాల్సిందే.
ఎలా తీశారు? ఎలా చేశారు?
దర్శకుడికి ఇది సవాలే. దర్శకుడు కార్తీక్ రాపోలు దీన్ని డీల్ చేసిన విధానం బాగుంది. వినాదాత్మకంగా కథ చెప్పే ప్రయత్నం చేశాడు. హీరో శోభన్ తన సామర్థ్యాన్ని తెలుసుకోడానికి వేశ్యావాటికకు వెళ్లడం, డాక్టర్ దగ్గరకు వెళ్లి ఈ సైజుల గురించి చర్చించడం లాంటివన్నీ నవ్వు తెప్పిస్తాయి. పైగా చచ్చు సలహాలిచ్చే మిత్రబృందం ఒకటి. కథనంలో దర్శకుడు చాలా జాగ్రత్తలు తీసుకున్నారు. కథకు ఎమోషన్ అనే లింకు అవసరం కాబట్టి సెకండాఫ్ అంతా శోభనాన్ని వాయిదా వేసే అంశం మీదే సాగుతుంది.
బండారం బయటపడి హీరోయిన్ దూరం కావడం, మళ్లీ వీరిద్దరినీ కలిపే ప్రయత్నం చేయడం సనిమాటిక్ గా ఉంటుంది. సంతోష్ శోభన్ తన పాత్రను బాగానే రక్తికట్టించాడు. అసలు ఇలాంటి పాత్రను ఒప్పుకుని చేయడం కూడా విశేషమే. ఎక్స్ ప్రెషన్స్, డైలాగ్ డెలివరీ బాగున్నాయి. శోభన్ తండ్రిగా బ్రహ్మాజీ మెప్పించారు. సుదర్శన్ నవ్వులు బాగా పూయించారు. హీరోయిన్ కావ్యా థాపర్ నటన ఫరవాలేదు. శ్రద్ధాదాస్ పాత్ర పరిధి తక్కువ. కథలో కొత్తదనమేగాని కథనంలో మాత్రం పాతదనం కనిపించింది. డైలాగులు బాగా కుదిరాయి. ఇది వినోదం కోసం చేసిన ప్రయత్నంలాగే కనిపిస్తుంది.
నటీనటులు:
సంతోష్ శోభన్, కావ్య తప్పర్, శ్రద్దా దాస్, పోసాని కృష్ణమురళి, సప్తగిరి, సుదర్శన్, బ్రహ్మాజి, హర్ష వర్దన్
సాంకేతికవర్గం: సంగీతం: ప్రవీణ్ లక్కరాజు, కథ: మేర్లపాక గాంధీ, సినిమాటోగ్రఫీ: గోకుల్ భారతి, ఎడిటర్: సత్య. జి
దర్శకత్వం: కార్తీక్ రాపోలు
నిర్మాణం: యూవీ కాన్సెప్ట్స్
విడుదల తేదీ: 27-05-2021
విడుదల: అమెజాన్ ప్రైమ్
ఒక్క మాటలో: కథ చిన్నది.. సమస్య పెద్దది
రేటింగ్: 2.75/5
