నాంది సక్సెస్ కు ఎవరు నాంది పలికారు?

నాంది సక్సెస్ గురించి ఎంత మాట్లాడుకున్నా తక్కువే. రివ్యూలతో సంబంధం లేకుండా ఓ పెద్ద సక్సెస్ వస్తే అందరూ దాన్ని గురించి మాట్లాడుకుని తీరతారు. ఇప్పుడు అందరి నోటా వినిపిస్తున్న సినిమా నాంది. నిజానికి ఈ సినిమా విడుదలైనప్పుడు ఎవరికీ దీని మీద ఎలాంటి అంచనాలూ లేవు. పైగా వెబ్ సైట్లు అన్నీ ఈ సినిమాకి రేటింగ్ 2.5 లేదా 2.75 రేటింగ్ మాత్రమే ఇచ్చాయి. కానీ వాస్తవానికి ఇప్పుడు నాంది బ్లాక్ బస్టర్ జాబితాలోకి వెళుతోంది. ఇందులో ఎలాంటి స్టార్ హీరో లేరు. పైగా అల్లరి నరేష్ కు ఇటీవల కాలంలో సక్సెస్ లు అసలే లేవు. గమ్యం లాంటి సక్సెస్ ను చూసి అతను చాలా కాలమైంది. బహుశా తనకు ఇలాంటి సక్సెస్ వస్తుందని అతను కూడా ఊహించి ఉండడు.

నాంది సక్సెస్ కు ఐఎండీబీ రేటింగ్

ఈ సినిమాకి ఐఎండీబీ ఇచ్చిన రేటింగ్ మామూలుగా లేదు. ఐఎండీబీ దీనికి 9.4 రేటింగ్ ఇచ్చింది. ఇటీవల కాలంలో విడుదలైన ఏ సినిమాకూ ఇలాంటి రేటింగ్ లేదు. కరోనా తర్వాత సినిమా థియేటర్లు ప్రారంభమయ్యాక సాయి ధరమ్ తేజ్ సినిమా ‘సోలో బ్రతుకే సో బెటర్’ తో తొలి విజయం లభించింది. ఆ తర్వాత సంక్రాంతి బరిలోకి దిగిన రవితేజ సినిమా ‘క్రాక్’ మంచి విజయాన్ని నమోదు చేసింది.

ఎవరూ ఊహించని సక్సెస్ రవితేజకు లభించింది. ఆ తర్వాత సాయి ధరమ్ తేజ్ తమ్ముడు వైష్ణవ్ తేజ్ హీరోగా రూపొందిన ‘ఉప్పెన’ విడుదలైంది. ఈ సినిమా వసూళ్లలో కొత్త రికార్డు సృష్టించింది. కలెక్షన్లలో దాదాపు 70 కోట్ల గ్రాస్ సాధించినట్టు చెబుతున్నారు. ఇప్పుడు ‘నాంది’ విషయానికి వస్తే తొలి రోజు ఎవరికీ ఈ సినిమా మీద ఎలాంటి అంచనాలూ లేవు. ఆ రోజు నాలుగు సినిమాలు విడుదలైతే ఆ నాలుగింటిలో ‘నాంది’ మెరుగైన సినిమాగా చెప్పారు.

క్రాక్, ఉప్పెన, నాందిలకు ఐఎండీబీ రేటింగులు

ఐఎండీబీ రేటింగుల్లో ఓ ప్రత్యేకత ఉంటుంది. ప్రేక్షకుల ఓటింగుకు అనుగుణంగా ఈ రేటింగులు ఉంటాయి. ఎవరో విమర్శకుడు ఇచ్చిన రేటింగులు ఇందులో ఉండవు. 10 పాయింట్లకు ఎన్ని పాయింట్లు వస్తాయి అన్నదాన్ని బట్టే రేటింగులు ఉంటాయి. ‘సోలో బ్రతుకే సో బెటర్’ సినిమాకి ఐఎండీబీ ఇచ్చిన రేటింగ్ 5.5 మాత్రమే. కానీ ఆ సినిమా సక్సెస్ జాబితాలోనే ఉంది. ఇక ‘క్రాక్ ’ సినిమాలోకి వద్దాం. ఈ సినిమాకి ఐఎండీబీ 6.9 రేటింగ్ ఇచ్చింది. అదే సమయంలో విడుదలైన తమిళ హీరో విజయ్ ‘మాస్టర్’కు 7.1 రేటింగ్ లభించింది.

అయినా ‘మాస్టర్’ కన్నా ‘క్రాక్ ’ పెద్ద విజయాన్ని సాధించింది. ఆ తర్వాత విడుదలైన జాంబిరెడ్డికి 7.5 రేటింగ్ లభించింది. వెబ్ రివ్యూలు నెగిటివ్ గా వచ్చినా ఇక్కడ ఐఎండీబీ రేటింగ్ మంచి ఫలితాన్ని చూపింది. కలెక్షన్లు కూడా అలాగే ఉన్నాయి. చివరికి ఆ సినిమా సేఫ్ జోన్ లోకి వెళ్లింది. 30 రోజుల్లో ప్రేమించడం ఎలా మూవీకి 6 రేటింగ్ ఉన్నా, వెబ్ లలో నెగిటివ్ రివ్యూలు ఉన్నా ఆ సినిమా సక్సెస్ జాబితాలోకి వెళ్లిపోయింది. కలెక్షన్లు బాగున్నాయి.

నాంది సక్సెస్ కు కారణం ఎవరు?

‘నాంది’ సినిమా సక్సెస్ కు కారణాల్ని విశ్లేషించాల్సి వస్తే. ఇది జనం మెచ్చిన సినిమా. మౌత్ టాక్ ఈ సినిమాకి మంచి విజయాన్ని అందించింది. ఐఎండీబీ 9.4 రేటింగ్ ఇవ్వడం మామూలు విషయం కాదు. ఇటీవల కాలంలో ఏ సినిమాకీ ఇలాంటి రేటింగ్ రాలేదు. పైగా ఈ సినిమాకి విజయ్ కొత్త దర్శకుడు. అతనికి ఇది తొలి ప్రయత్నం. సతీష్ వేగేశ్నకు నిర్మాతగా ఇది తొలి ప్రయత్నం. సినిమా కథాంశం కొత్తగా ఉండటం, కథనం విషయంలో దర్శకుడు ప్రత్యేక శ్రద్ధ పెట్టడం ఈ సినిమా విజయానికి సగం కారణం.

సినిమా ప్రథమార్థం చాలా బాగుందని, ద్వితీయార్థం ట్రాక్ తప్పిందని విమర్శకులు పేర్కొన్నారు. సినిమా చూసిన వారంతా అలాంటిదేమీ లేదు, సినిమా చాలా బాగుంది అనటం, ఈ మాటలు ఆనోటా ఈనోటా వ్యాప్తి చెందడం ఈ సినిమాకు ప్లస్ అయ్యింది. అందుకే ఈ సినిమా అల్లరి నరేష్ కెరీర్ లో ఓ మైలు రాయి అని చెప్పడంలో అతిశయోక్తి లేదు. సక్సెస్ లలో వెనకబడి పోయిన అతనికి ఊపు తెచ్చే విజయాన్ని నాంది సక్సెస్ అందించింది.

– హేమసుందర్ పామర్తి

Must Read ;- ‘ నాంది  అందుకే అంత హిట్ అయింది