ప్లే బ్యాక్ (రివ్యూ)

కాలంలోకి ప్రయాణం చేసే కథలు సాధారణంగా హాలీవుడ్ లోనే పుడుతుంటాయి. ప్రాంతీయ భాషా చిత్రాల్లో ఇలాంటి ప్రయోగాలు చేయరు. దానికి కొంత కారణం బడ్జెట్ పరిమితులు కూడా. తెలుగులో టైమ్ మిషన్ కథాంశంతో వచ్చిన తొలి చిత్రం బాలకృష్ణ హీరో సింగీతం శ్రీనివాసరావు రూపొందించిన ‘ఆదిత్య 369’, ఆ తర్వాత సూర్య హీరోగా ‘24’ వచ్చింది. ఈసారి ఓ యూత్ ఫుల్ లవ్ స్టోరీతో వచ్చిన చిత్రమే ‘ప్లే బ్యాక్’. దర్శకుడు సుకుమార్ లెక్కల మాస్టారు అయితే, ఆయన సహాద్యోగి జక్కా హరిప్రసాద్ ఫిజిక్స్ మాస్టారు అనుకోవాలి. సుకుమార్ తో ఉన్న స్నేహం కారణంగా సినిమా రంగానికి వచ్చి తొలి ప్రయత్నంగా ఈ సినిమా రూపొందించారు. శ్రీ వెంకటేశ్వర ఆర్ట్ క్రియేషన్స్ పతాకంపై ప్రసాదరావు పెద్దినేని ఈ చిత్రాన్ని నిర్మించారు.

కథలోకి వెళితే..

ఇది టైమ్ మెషిన్ లవ్ స్టోరీ అనుకోవాలి. కాలంలోకి ప్రయాణం చేయడం అనేది కొత్త లైన్. ఈ సైన్స్ ఫిక్షన్ కు ప్రేమ కథను ముడిపెట్టి మలిచారు. కార్తి (దినేష్ తేజ్) మన తరం కుర్రాడు. జర్నిలిస్ట్ కావాలనేది అతని లైఫ్ యాంబిషన్. అలా ఉద్యోగ ప్రయత్నాలు చేసి టీవీ 5లో ఉద్యోగంలో చేరతాడు. అద్దె ఇంటి యజమానితో గొడవ కారణంగా వేరే ఇంటికి మారతాడు. ఆ ఇంట్లోకి వెళ్లాక అక్కడ ల్యాండ్ లైన్ ఫోన్ కనిపిస్తుంది. ఈరోజుల్లో ఈ ఫోన్ ఎక్కడికి అనుకుంటాడు. ఇంతలో ఆ ఫోన్ రింగవుతుంది. అవతలి నుంచి ఓ యువతి గొంతు. ఆమె పేరు సుజాత (అనన్య నాగెళ్ల). తనకు కావసింది తను కాదని, రాంగ్ నంబర్ అని పెట్టేస్తాడు. అయినా ఆమె మళ్లీ ఫోన్ చేస్తుంది. సరే యువతి ఫోన్ చేస్తే ఊరికే ఎలా ఉండబుద్దేస్తుంది మాటలు కలుపుతాడు.

ఆమె అతన్ని ఓ సాయం అడుగుతుంది. అతను అంగీకరిస్తాడు. ఆమెకు సెల్ ఫోన్, వెబ్ సైట్లు లాంటి వాటి గురించే తెలియదు. ఆమె కోసం పాస్ పోర్ట్ ఆఫీసుకు వెళితే కనిపించదు. చివరికి అతను తనకు తెలిసిన అంశాలన్నీ క్రోడీకరించి చూసి కంగుతింటాడు. ఆమె 1993లోని యువతి. తను 2019లో ఉన్నాడు. తనకూ ఆమెకూ కాలంలో ఈ తేడా ఏమిటో అతనికి అర్థం కాలేదు. మరో షాక్ ఏమిటంటే అసలు ఆ ల్యాండ్ లైన్ కనెక్షన్ ఎప్పుడో కట్ చేసేశారు. అయినా ఆమె నుంచి ఫోన్ వస్తూనే ఉంది. పైగా ఆమెకీ అతనికీ ఓ కనెక్షన్ కూడా ఉంది. ఆమె పెద్ద ప్రమాదంలో ఉందని కూడా అర్థమైంది. ఇలాంటి పరిస్థితిని అతను ఎలా ఎదుర్కొన్నాడు అన్నదే సినిమా.

ఎలా తీశారు? ఎలా చేశారు?

సైన్స్ ఫిక్షన్ కథ కాబట్టి దర్శకుడు చాలా థ్రిల్లింగ్ అంశాలతో దీన్ని రూపొందించారు. ఈ కథకు స్ఫూర్తి ఏదైనా గానీ దర్శకుడు తనకున్న ఫిజిక్స్ నాలెడ్జిని దీని మేకింగ్ కోసం బాగానే ఉపయోగించుకున్నారు. ఇలాంటి అంశాన్ని సులభంగా చెప్పగలగాలి. ఆ విషయంలో దర్శకుడు సక్సెస్ అయ్యారు. ఎక్కడా అతికి అవకాశం ఇవ్వకుండా ప్రేక్షకుడు ఉత్కంఠను మిస్సవకుండా తగిన జాగ్రత్తలు తీసుకున్నారు. ఈ కథకు కొత్త మొహాలు కాకుండా కాస్త తెలిసిన నటులు అయి ఉంటే కథ మీద ఇంకాస్త ఆసక్తి పెరిగేది.

కొత్త వారు కావడంతో సహజత్వానికి దగ్గరగా సినిమా సాగింది. అనన్య, దినేష్ తమ పాత్రలకు న్యాయం చేశారు. అనవసర కమర్షియల్ ఎలిమెంట్స్ జోలికి దర్శకుడు వెళ్లలేదు. ఎడిటింగ్ పనితనం ఈ సినిమాకి ప్లస్ అని చెప్పాలి. నేపథ్య సంగీతం కూడా బాగా కుదిరింది. కొత్తదనం కోరుకునే ప్రేక్షకులకు నచ్చే అంశాలన్నీ ఈ సినిమాలో ఉన్నాయి. దర్శకుడిగా జక్కా హరిప్రసాద్ కు మంచి పేరు వచ్చినట్టే. లెక్కల మాస్టారుకు తోడుగా మరో ఫిజిక్స్ మాస్టారు దొరికినట్టే.

తారాగణం: దినేష్ తేజ్, అనన్య , అర్జున్ కళ్యాణ్, మూర్తి, స్పందన, టీఎన్ ఆర్, చక్రపాణి, అశోక్ వర్ధన్, కార్తికేయ తదితరులు.
సంగీతం : కమ్రన్
సినిమాటోగ్రఫీ : బుజ్జి.కె.
ఎడిటర్: నాగేశ్వర రెడ్డి బొంతల
నిర్మాణం: శ్రీ వెంకటేశ్వర ఆర్ట్ క్రియేషన్స్
నిర్మాత : ప్రసాదరావు పెద్దినేని
కథ, స్క్రీన్ ప్లే, దర్శకత్వం: హరి ప్రసాద్ జక్కా
విడుదల: 5-3-2021
ఒక్క మాటలో: కొత్త ప్రయత్నం
రేటింగ్: 3/5

– హేమసుందర్ పామర్తి