KVP Ramachandra Rao Viral Comments On YS Jaganmohanreddy :
ఏపీ సీఎం జగన్ మోహ‌న్ రెడ్డి సాగిస్తున్న పాలన కార‌ణంగా ఆయ‌న‌పైనే కాకుండా వైసీపీకి కూడా జ‌నంలో బాగా వ్య‌తిరేక‌త పెరుగుతోంది. ఇటీవ‌లి కాలంలో ఈ త‌ర‌హా ప‌రిణామాల‌పై స‌ర్వేల మీద స‌ర్వేలు వెలువడుతున్నాయి. స్వ‌యంగా జగన్ చేయించుకున్న స‌ర్వేలోనే ఈ విష‌యం వెల్ల‌డైంద‌న్న కథనాలు కూడా ఆస‌క్తి రేకెత్తిస్తున్నాయి. ఈ సర్వేలో ఇప్ప‌టికిప్పుడు ఎన్నికలు జ‌రిగితే.. ఏకంగా 60 మంది సిట్టింగ్ వైసీపీ ఎమ్మెల్యేలు మ‌ళ్లీ గెల‌వ‌లేర‌ని, వీరిలో ఏకంగా 11 మంది మంత్రులు కూడా ఉన్నార‌ని తేలింది. అయితే ఇవేవీ ప‌ట్ట‌ని కాంగ్రెస్ పార్టీ రాజ్య‌స‌భ స‌భ్యుడు కేవీపీ రామ‌చంద్ర‌రావు.. జ‌నంలో జగన్ కు ఎలాంటి వ్య‌తిరేక‌త పెర‌గ‌లేద‌ని, ఇప్పటికీ ఏపీలో జగన్ ను ఢీకొట్టే నేతే లేర‌ని సంచలన కామెంట్లు చేశారు. కాంగ్రెస్ పార్టీకి పున‌ర్వైభ‌వం దిశ‌గా పార్టీ అధిష్ఠానం నిర్వ‌హించిన స‌మావేశానికి హాజ‌రైన కేవీవీ.. ఆ త‌ర్వాతే త‌మ పార్టీని జీరోను చేసిన జగన్ ను ఆకాశానికెత్తేస్తూ ఈ వ్యాఖ్యలు చేయ‌డం ఇప్పుడు కాంగ్రెస్ లో పెద్ద చ‌ర్చ‌నీయాంశంగా మారింది.
అల్లుడిపై ఆ మాత్రం ఉండొద్దా?
జగన్ తండ్రి, దివంగ‌త సీఎం వైఎస్ రాజ‌శేఖ‌ర‌రెడ్డికి ఆత్మగా పేరుప‌డిన కేవీపీ.. వైఎస్సార్ బ‌తికుండ‌గా.. వైఎస్ ఫ్యామిలీ వెన్నంటే సాగారు. రాజకీయాల్లోకి రాక‌ముందు నుంచి కూడా వైఎస్, కేవీపీ స్నేహితులే క‌దా. ఈ క్ర‌మంలో తన ఇంటిలో కంటే కూడా వైఎస్సార్ ఇంటి వ‌ద్దే కేవీపీ ఎక్కువ‌గా గడిపిన సంద‌ర్భాలు లేక‌పోలేదు. ఈ నేప‌థ్యంలో తన తండ్రి ఆప్త‌మిత్రుడైన కేవీపీ త‌న‌కు మామ కాక‌పోయినా.. మామ‌య్యా అంటూ జగన్ ఆయ‌న‌ను ఆప్యాయంగా పిలిచేవారు. కేవీపీ కూడా జగన్ ను అల్లుడ‌నే సంబోధించేవారు. కులాలు వేరైనా ఈ రెండు ఫ్యామిలీల మ‌ధ్య బంధం య‌మా స్ట్రాంగ్ గా ఉండేది. అయితే ఎప్పుడైతే వైఎస్సార్ చ‌నిపోయారో.. అప్పుడే వైఎస్ ఫ్యామిలీకి కేపీవీ కూడా క్ర‌మంగా దూర‌మైపోయారు. కాంగ్రెస్ పార్టీ చేసిన ఫిర్యాదు మేర‌కే జగన్ పై అక్ర‌మాస్తుల కేసు న‌మోదు కావ‌డం, ఆయ‌న జైలుకు కూడా వెళ్ల‌డం జ‌రిగినా.. కేవీపీ అటువైపు కన్నెత్తి కూడా చూడ‌లేద‌నే చెప్పాలి. మొత్తంగా వైఎస్సార్ మ‌ర‌ణం కేవీపీని వైఎస్ ఫ్యామిలీకి దూరం చేసింది. ఇప్పుడు జగన్ కు కేవీపీ మామ‌య్య లేరు, కేవీపీకి జగన్ అల్లుడు కూడా లేర‌న్న రీతిలోనే వ్య‌వ‌హారం న‌డుస్తోంది.
మ‌రి జగన్ పై ప్ర‌శంస‌లెందుకో?
కాంగ్రెస్ నుంచి బ‌య‌ట‌కు వచ్చి జగన్ వైసీపీ పేరిట వేరు కుంప‌టి పెట్టుకున్నారు. ఆ తర్వాత తెలుగు నేల రెండు రాష్ట్రాలుగా విడిపోయింది. ఆ తర్వాత ఏపీ శాఖ‌లోని కాంగ్రెస్ నేత‌ల్లో మెజారిటీ నాయ‌కులు వైసీపీలో చేరిపోయారు. వెర‌సి ఏపీలో కాంగ్రెస్ జీరో అయిపోయింది. అంటే.. ఇప్పుడు జగన్ కాంగ్రెస్ కు తొలి శ‌త్రువు కిందే లెక్క. ఇక కేవీపీ విష‌యానికి వ‌స్తే.. తెలంగాణ కోటాలో ఆయ‌న రాజ్య‌స‌భ‌కు ఎంపిక‌య్యారు. అయినా కూడా ఆయ‌న ఏపీకి న్యాయం చేసే దిశ‌గానే పార్ల‌మెంటులో పోరు సాగిస్తున్న వైనం ఇప్ప‌టికే ఆస‌క్తి రేకెత్తిస్తోంది. 2024 ఎన్నికల నాటికి ఏపీలో కాంగ్రెస్ కు పున‌ర్వైభ‌వం తీసుకొచ్చే దిశ‌గా అధిష్ఠానం చ‌ర్య‌లు ప్రారంభించింది. ఈ మంత‌నాల్లో కేవీపీ కీల‌కంగా వ్య‌వ‌హ‌రిస్తున్నారు. ఇలాంటి స‌మ‌యంలో జగన్ ను కీర్తిస్తూ కేవీపీ చేసిన కామెంట్లు వైర‌ల్ అయ్యాయి. అయినా కేవీపీ ఏమ‌న్నారంటే.. ‘‘రాజకీయాల్లో ఇప్పటికీ జగనే చాలా పవర్ ఫుల్ . జగన్ ను సవాలు చేసే స్ధితిలో ఏ ప్రతిపక్షం కూడా లేదు. అనేక సంక్షేమ పథకాలను అమలు చేస్తున్న జగన్ పాలనపైనే జనాలందరూ పాజిటివ్ గా ఉన్నారు. వైఎస్సార్ పాలన పైన కూడా అప్పట్లో ప్రతిపక్షాలు, మీడియా ఎంత దుమ్మెత్తిపోసినా రెండోసారి మళ్ళీ అధికారంలోకి వచ్చారు. అయితే 2024 ఎన్నికల్లో ఎలాంటి ఫలితాలు వస్తాయో చెప్పలేను’’ అని కేవీపీ అన్నారు.
Must Read ;- ఈ ముగ్గురూ మ‌ళ్లీ కాంగ్రెస్‌లో క‌నిపిస్తారా?
