స్నేహానికి అసలైన నిర్వచనం ‘పొరింజు మరియం జోస్’

మలయాళ సినిమాలు వైవిధ్యమైన కథలతో తెరకెక్కుతాయన్న సంగతి తెలిసిందే. అయితే మాస్ యాక్షన్ మూవీస్ ను కూడా ఆసక్తికరమైన కథాకథనాలతో తెరకెక్కించడం మలయాళ దర్శకులకు కొట్టిన పిండి. అమెజాన్ ప్రైమ్ లో భాషా బేధం లేకుండా అందరినీ ఆకట్టుకుంటోన్న ‘పొరింజు మరియం జోస్’ ఆ తరహా చిత్రమే. సీనియర్ డైరెక్టర్ జోషి చాన్నాళ్ళ తర్వాత ఈ సినిమాను తెరకెక్కించి.. విజయం సాధించాడు.

కథేంటి? : పొరింజు, జోస్ అనే కుర్రోళ్ళు, మరియం అనే అమ్మాయి చిన్నప్పటినుంచీ బెస్ట్ ఫ్రెండ్స్. అందులో పొరింజుకు, మరియంకు ఒకరంటే ఒకరు ఇష్గం. అది ప్రేమగా మారుతుంది. ముగ్గురూ పెరిగి పెద్దయినా వారిమధ్య స్నేహం అలాగే కొనసాగుతూ ఉంటుంది. పొరింజు వర్తమానంలో మాంసం వ్యాపారి. అలాగే.. లీపు అనే ప్రముఖుడి దగ్గర కిరాయి గూండాగా పనిచేస్తూంటాడు. ఒకసారి ఆ ఊళ్ళోని ఉత్సవాల్లో లీపు బంధువుల కుర్రోడు ప్రిన్స్ .. మరియమ్ తో అసభ్యంగా ప్రవర్తిస్తాడు. వాడ్ని జోస్ చితక్కొట్టి పంపిస్తాడు. అది మనసులో పెట్టుకున్న ప్రిన్స్ .. జోస్ ను దారుణంగా చంపిస్తాడు. దానికి ప్రతికారంగా పొరింజు ప్రిన్స్ ను హత్యచేస్తాడు. కానీ వాడ్ని చంపడం లీపు ను బాధిస్తుంది. అందుకే లీపు పొరింజు ను వెన్నుపోటు పొడుస్తాడు. ప్రాణానికి ప్రాణమైన ఇద్దరు స్నేహితుల్ని కోల్పోయిన మరియం.. ఒంటరిగా మిగిలిపోతుంది.

ఎలా తీశారు? : గ్రామీణ ప్రాంతాల్లో కక్ష్యలు , కుట్రలు ఏ రీతిలో ఉంటాయో దర్శకుడు జోషి కళ్ళకు కట్టినట్టు చూపించాడు. మరీ ముఖ్యంగా కేరళలో వాటి మోతాదు ఎక్కువ కాబట్టి.. దానికి తగ్గట్టుగానే కొన్ని వైవిధ్యమైన పాత్రల్ని డిజైన్ చేసుకొని.. ఆసక్తికరమైన సన్నివేశాలతో స్ర్కీన్ ప్లే రాసుకున్నాడు. అదే సమయంలో స్నేహం గొప్పతనాన్ని, ప్రేమలోని త్యాగగుణాన్ని ఈ సినిమాతో బాగా ఎలివేట్ చేసే ప్రయత్నం చేశాడు. అందులో జోషి చాలా వరకూ సక్సెస్ అయ్యాడు. పొరింజు గా జోజు జార్జ్, జోస్ గా చంబన్ వినోద్, మరియంగా నైలా ఉష, లీపు గా విజయ రాఘవన్ అద్భుతంగా నటించారు.

హైలైట్స్ : యాక్షన్ చిత్రాలు తీయడంలో జోషి దిట్ట అన్న సంగతి తెలిసిందే. చాన్నాళ్ళ గ్యాప్ తర్వాత దర్శకత్వం వహించినా సరే.. ఆయనలోని మేకింగ్ టాలెంట్ చెక్కు చెదరలేదు. పొరింజు ఎంట్రీ సీన్ లో వచ్చే ఫైట్ సన్నివేశంతో తనేంటో మరోసారి తెలియచెప్పాడు జోషి. ఈ సీన్ సినిమాకే హైలైట్ గా నిలుస్తుంది. అలాగే.. జోస్ చనిపోయే సీన్ కూడా సినిమాకి బలంగా నిలుస్తుంది. ఇక క్లైమాక్స్ అయితే చెప్పనక్కర్లేదు. నేరస్థుల్లో కూడా ఎథిక్స్ ఉంటాయని ఆ సీన్ తో తెలియచెప్పాడు దర్శకుడు జోషి. మొత్తానికి ‘పొరింజు మరియం జోస్’ సినిమా ప్రేక్షకుల్ని అలరిస్తుంది.
నటీనటులు : జోజు జార్జ్, నైలా ఉష, చంబన్ వినోద్, విజయరాఘవన్, అనిల్ నెడుమాంగాడ్, రాహుల్ మాధవ్, సుధీ కొప్ప, సలీం కుమార్, సాధిక్, శ్వాసిక, మాళివికా మీనన్ తదితరులు

నిర్మాణం : జోజు జార్జ్
దర్శకత్వం : జోషి
ఎక్కడ చూడాలి?: అమెజాన్ ప్రైమ్
ఒక్కమాటలో : హార్ట్ టచింగ్ యాక్షన్ మూవీ
భాష: మలయాళం
రేటింగ్ : 3 /5
-ఆర్కే