పునీత్ రాజ్ కుమార్.. కన్నడ కంఠీరవ నట వారసుడిగా చిత్ర రంగ ప్రవేశం చేసినా తనదైన ప్రతిభతో అంచెలంచెలుగా ఎదిగిన హీరో పునీత్ రాజ్ కుమార్. చిన్న వయసు నుంచే ఎన్నో అవార్డులనూ రివార్డులనూ సొంతం చేసుకున్నారు. ముఖ్యంగా మన తెలుగు చిత్ర పరిశ్రమతో ఆయనకు అవినాభావ సంబంధం ఉంది. సోలో హీరోగా ఆయన నటించిన మొదటి చిత్రం కూడా తెలుగు దర్శకుడిదే కావడం విశేషం. ఆయనే పూరి జగన్నాథ్.
తెలుగులో విజయవంతమైన ‘ఇడియట్’ ఆధారంగా కన్నడంలో ‘అప్పు’ పేరుతో పునర్నిర్మించారు. ఇది మంచి విజయం సాధించింది. అలాంటి అప్పు అనేది ఆయనకు ముద్దు పేరుగానూ మారింది. అలాగే తెలుగు దర్శకుడు వీర శంకర్ కూడా నమ్మ బసవ పేరుతో ఓ సినిమా రూపొందించారు. ఇది కూడా 175 రోజులు ఆడింది. దీన్ని వీరశంకరే నిర్మించడం విశేషం.
కుటుంబానికే పెద్ద పీట
పునీత్ ది ప్రేమ వివాహం. భార్య అశ్వనీ రేవంత్ స్నేహితుల ద్వారా పరిచయం. అది ప్రేమగా మారి పెళ్లికి దారి తీసింది. వీరికి ఇద్దరు కుమార్తెలు. తనకు ఏ కాస్త సమయం దొరికినా కుటుంబానికే కేటాయిస్తారు. తన సరదా సమయాలను సోషల్ మీడియా ద్వారా పంచుకుంటారు. అన్న శివరాజ్ కుమార్ అంటే ఎంతో గౌరవం. తండ్రితో దిగిన ఫొటోలను కూడా సోషల్ మీడియాలో షేర్ చేస్తుంారు. సెప్టెంబరు 24న ఓ ఫోటో షేర్ చేశారు. ఆ పోస్ట్ ఇప్పుడు వైరల్ గా మారింది.
‘నాన్నతో కలిసి నయాగరా జలపాతం వద్ద గడిపిన ఆ క్షణాలు ఇప్పటికీ మధుర జ్ఞాపకాలే’ అని రాశారు. తండ్రి ఇచ్చిన స్ఫూర్తితోనే అనేక సేవాకార్యక్రమాలు చేశారు. పేద విద్యార్థులకు, అనాథలకు, వృద్ధులకు అండగా నిలిచారు. 26 అనాథాశ్రమాలు, 25 పాఠశాలలు,16 వృద్ధాశ్రమాలు, 19 గోశాలలు నిర్వహణ బాధ్యతలు చూస్తుంటారు. 1800 మంది విద్యార్థులను చదివిస్తున్నారు. ఇక మైసూర్లో బాలికా విద్యార్థినులను జాగ్రత్తగా చూసుకునే శక్తిధామ అనే పెద్ద సంస్థను కూబి నెలకొల్పారు. అందుకే ఆయన రియల్ పవర్ స్టార్ అనవచ్చు. పాఠశాల విద్యార్థుల కోసం ఇటీవల రాజ్కుమార్ లెర్నింగ్ యాప్ని అందుబాటులోకి తెచ్చారు.
వర్కవుట్లే కొంప ముంచాయా?
ఆయన జిమ్ చేస్తుండగా కుప్పకూలడంతో వర్కవుట్లే కొంప ముంచాయా అన్న అనుమానాలు వస్తున్నాయి. ఆయన మరణ వార్త తెలిసిన వెంటనే ఆ వర్కవుట్లే వైరల్ అయ్యాయి. పవర్ ఇన్ యు పేరుతో తన వర్కవుట్ వీడియోలను ఇన్ స్టాలో షేర్ చేస్తుంటారు. రిస్కీ వర్కవుట్లే ఎక్కువగా ఉన్నాయి. అతి సర్వత్రా వర్జయేత్ అంటుంటారు. అవే ఈ పరిస్థితికి దారితీశాయా అన్న అనుమానాలైతే ఉన్నాయి. ఇంత చిన్న వయసులోనే మరణించడం ఎందరినో కలచివేసింది. తన అన్న సినిమా విడుదల రోజు కావడంతో ఈరోజు ఉదయం 7.33 గంటలకు ఓ ట్వీట్ చేశారు. ఆ చిత్ర బృందానికి ఆల్ ది బెస్ట్ చెప్పారు.
పునీత్ చేసిన ఆఖరి ట్వీట్ కూడా ఇదే. ఆయనకు దైవ భక్తి కూడా ఎక్కువే. ఈ నవంబరు 1న తన సినిమాలకు సంబంధించి ఓ అప్ డేట్ కూడా ఇవ్వనున్నట్లు చెప్పారు. ప్రస్తుతం ఆయన రెండు సినిమాలకు ఓకే చెప్పారు. అవి చిత్రీకరణ దశలో ఉన్నాయి. నవంబరు 1న తను ఇవ్వబోయే స్పెషల్ అప్ డేట్ కు సంబంధించి ఓ క్లూ కూడా ఇచ్చారు. ‘దశాబ్దాల క్రితం ఓ కథ పుట్టింది. భావితరాల వారిలో స్ఫూర్తి నింపుతూ ఓ లెజండ్ తిరిగి రావడానికి సమయం ఆసన్నమైంది’ అంటూ రెండ్రోజుల క్రితం ట్వీట్ పెట్టారు. అదేంటో ఎవరికీ తెలియదు. ఈ లోపే ఈ లెజండ్ నిష్క్రమణ చెందారు.
Must Read ;- రజినీకాంత్ హెల్త్ బులెటిన్ విడుదల
