Struggle Of Film Producer :
సినిమా మాటలు చూస్తే కోట్లు దాటుతున్నాయి.. పరిశ్రమ ప్రగతి చూస్తే ఎక్కడ వేసిన గొంగళి అక్కడే. మరి ఈ కోట్లన్నీ ఎక్కడికి పోతున్నాయి? ఎవరి జేబుల్లో ఉంటున్నాయి? పత్రికల్లో కలెక్షన్ల లెక్కలు చూస్తే వేల కోట్లలో ఉంటోంది. నిర్మాతలు ఈ సొమ్మంతా ఎక్కడి నుంచి తెస్తున్నారు? ఎవరికి ఇస్తున్నారు? వసులైన సొమ్మును ఎక్కడ దాస్తున్నారు? ఈ ప్రశ్నలన్నిటికీ సమాధానం ఎవరి దగ్గర దొరుకుతుందో. సినిమా రంగం ఆ నలుగురి గుత్త సొత్తు అని కొందరంటారు. మరికొందరేమో ఆ పదిమంది హీరోల చేతుల్లోనే సినిమా రంగం ఉందంటారు. వీరితో సినిమాలు తీయడానికి నిర్మాతలు క్యూకడుతుంటారు.
లాభాలు లేకపోతే సినిమాలు తీయరు కదా. ఇలా సినిమాలు తీసి నిర్మాతలు ఎన్ని కోట్లు వేనకేసుకుంటున్నారో అనుకునే ప్రేక్షకులూ ఉంటారు. లేదు.. లేదు.. నిర్మాత అనేవాడు క్యాషియరు అంటారు ఇంకొందరు. మరి అలాంటప్పుడు ఎవడు సినిమాలు తీయమన్నాడు? హీరో కాల్షీట్ల కోసం ఎవరు ఎగబడమన్నారు అని ఎగతాళి చేసేవారు ఇంకొందరు. ఫలానా హీరోతో సినిమా తీస్తున్నాను అంటే అదో ప్రిస్టేజ్. అసలు రెగ్యులర్ గా సినిమాలు తీసే నిర్మాతలు ఎందరున్నారని లెక్కతీస్తే ఇక్కడా ఆ నలుగురే కనిపిస్తున్నారు.
ఆ బ్యానర్లు ఏమయ్యాయి?
ఎన్నో ఏళ్లుగా ఎన్నెన్నో సినిమాలు తీసిన ఆ బ్యానర్లు ఏమై పోయారు? ఆ నిర్మాతలు ఎక్కడున్నారు? వారి వారసులు ఎందుకు సినిమాలుు తీయడం లేదు? అని ఆరాతీస్తే ఏమీ కనిపించడం లేదు. పాత బ్యానర్లు మాయమైపోతున్నాయి.. కొత్త బ్యానర్లు పుట్టుకొస్తున్నాయి. ఓ అగ్ర హీరోతో ‘డ్రైవర్’ పేరుతో సినిమా తీసినాయన రోడ్డు మీద కాలినడకన తిరుగుతున్నాడట. సినిమాలు తీసి చేతులు కాల్చుకుని చివరికి కొబ్బరి కాయల వ్యాపారం చేసుకుని బతుకుతున్నాడు ఇంకో నిర్మాత. కార్లేసుకొచ్చి మంచి బంగ్లాలో ఉండి సినిమాలు తీసి అవేవీ లేకుండానే నిర్మాతలు మాయమైపోవడానికి కారణం ఏమిటో అర్థం కావడం లేదు.
Struggle Of Film Producer :
ఓ పాన్ ఇండియా మూవీ చేసేసి ఎంచక్కా ముంబైలో ఓ విలాసవంతమైన ఫ్లాట్ ను హీరో కొనేసుకుంటున్నాడు. అతని ఇంట్లో ఎన్ని కార్లు ఉన్నాయో అతనికే లెక్కతెలియడ లేదట. మంచి సినిమాలు తీసినా సొంత ఫ్లాట్ లేని నిర్మాతలు మాత్రం లెక్కలేనంతమంది ఉన్నారు. నిర్మాతలు తయారు చేసిన హీరోలున్నారుగానీ హీరోలు నిలబెట్టిన నిర్మాతలు మాత్రం కనిపించడం లేదు. ఏ నిర్మాత ఎక్కడుంటున్నాడో? ఎలా బతుకుతున్నాడో ఎవరికి పట్టడం లేదు. ఆయన రోడ్డు మీద వెళ్తుంటే మాత్రం ఫలానా హీరోతో ఫలానా సినిమా తీసిన నిర్మాత ఆయనే అనే మాట మాత్రమే వినిపిస్తోంది.
సినిమాలు అమ్మాల్సిన నిర్మాత..
స్టార్ హీరోతో సినిమా తీయలేక కొత్త హీరోలను నమ్ముకుని సినిమాను సగంలో ఆపేసి తిరుగు టపా కట్టేసే నిర్మాతలకు లెక్కేలేదు.ఇల్లూవాకిలి, కార్లు స్థలాలు అమ్ముకున్న నిర్మాతల లెక్కకు తక్కువేం లేదు. పెద్ద హీరో సినిమా వస్తుందంటే చిన్న హీరో సినిమాని థియేటర్లో నుంచి ఎత్తేయాల్సిందే. ఓటీటీ వచ్చాక కాస్త చిన్న నిర్మాతలు ఊపిరిపీల్చుకుంటున్నారు. ఆగిపోయిన సినిమాలను పట్టాలెక్కించి ఓటీటీ బాట పడుతున్నారు. ఇప్పుడు పెద్ద హీరోల సినిమా విడుదలైతే టిక్కెట్ ధరను పెంచుకునే వెసులుబాటు కల్పించారు. చిన్న సినిమా ఏ పాపం చేసిందో. బడ్జెట్ పెంచి సినిమాలు తీయడం వల్ల నిర్మాతలకు ఒనగూరే లాభం ఏదైనా ఉందా అంటే అదీ లేదు.
సినిమా బడ్జెట్ పెరగడానికి సవాలక్ష కారణాలు ఉన్నాయి. స్టార్ హీరో పారితోషికమే 100 కోట్లకు పెరిగిపోయింది. ఆ ఒక్క హీరో బడ్జెట్ తో ఓ 20 చిన్న సినిమాలు అవలీలగా తీసేయవచ్చు. ఇచ్చేవారు ఉన్నప్పుడు పుచ్చుకునేవారిని తప్పుబట్టాల్సిన అవసరమే లేదు. పెద్ద హీరోల సినిమాలు ఏడాది 10 వస్తుంటే చిన్న హీరోలవి ఓ 90 ఉంటున్నాయి. సినిమా ఆడితేనే పరిశ్రమ కళకళలాడుతుంది. సినిమా ఆడినా ఆడకపోయినా మునిగిపోతున్నది మాత్రం నిర్మాతే. అందుకే నిర్మాత చేసుకున్న తప్పిదాలే కారణం. నిర్మాత భవిష్యత్తును కాలమే నిర్ణయించాలి.
