తెలుగు .. తమిళ భాషల్లో భారీ సినిమాలు రూపొందుతున్నాయి. భారీ తారాగణంతో .. వందలకోట్ల బడ్జెట్ తో .. అత్యాధునిక సాంకేతిక పరిజ్ఞానానికి ప్రాధాన్యతనిస్తూ కొత్త సినిమాలు నిర్మితమవుతున్నాయి. తెలుగు .. తమిళ కథలను ఫారిన్ వీధుల్లో పరుగెత్తిస్తూ భారీతనంలో అదొక భాగంగా చెప్పుకుంటున్నారు. యాక్షన్ సీన్ల కోసం కోట్లు కుమ్మరిస్తున్నారు. గ్రాఫిక్స్ తో చేసే గారడీ .. విదేశాల్లో చేసే హడావిడి పక్కన పెట్టేసి, కథాపరంగా .. స్టార్ డమ్ పరంగా చూసుకుంటే సౌత్ నుంచి రెండే రెండు భారీ సినిమాలు కనిపిస్తున్నాయి. అవే చిరూ ‘ఆచార్య‘ .. రజనీ ‘అన్నాత్తే‘.
టాలీవుడ్లో చిరంజీవికి గల క్రేజ్ ను గురించి ప్రత్యేకంగా చెప్పుకోవలసిన పనిలేదు. ప్రేక్షకుల అభిరుచికి తగినట్టుగా తనని తాను మార్చుకుంటూ .. మలుచుకుంటూ ఆయన తన కెరియర్ ను కొనసాగిస్తున్నారు. 150 సినిమాలకి పైగా అనుభవం ఆయన సొంతం. ఒక కథలో ఏయే అంశాలు ఉండాలి? తనని అభిమానించే ప్రేక్షకులు ఏం ఆశిస్తారు? ఏ తరహా పాటలు తన ఫ్యాన్స్ కి ఉత్సాహాన్ని కలిగిస్తాయనేది ఆయనకి బాగా తెలుసు. తన సినిమాకి సంబంధించిన ప్రతి ఒక్క విషయం పై ఆయనకి పూర్తి అవగాహన ఉంటుంది .. అందుకు తగినట్టుగానే ఆయన ప్రమేయమూ ఉంటుంది.
Must Read ;- చిరంజీవి చెప్పింది.. రజనీకాంత్ పాటించారా.?
చిరంజీవి తాజా చిత్రంగా ‘ఆచార్య’ రూపొందుతోంది. అవినీతి అధికారులను .. అక్రమాలకు పాల్పడే రాజకీయ నాయకులను నిలదీసే ఓ నిజాయితీ పరుడైన పౌరుడి పాత్ర ఇది. కొరటాల శివ దర్శకత్వం వహిస్తున్న ఈ సినిమాకి చరణ్ నిర్మాతగా వ్యవహరిస్తున్నాడు. కాజల్ కథానాయికగా నటిస్తున్న ఈ సినిమాకి ‘మణిశర్మ’ సంగీతాన్ని సమకూర్చాడు.ఈ సినిమాకి కథాకథనాలే ప్రధానమైన బలం .. పవర్ఫుల్ గా మలచబడిన మెగాస్టార్ పాత్రే హైలైట్. ఖర్చుతో పాటు కథాపరంగా కూడా ఈ సినిమాకి భారీతనాన్ని ఆపాదించడానికి కొరటాల తనవంతు ప్రయత్నం చేస్తున్నాడు. వచ్చే ఏడాదిలో ఈ సినిమా థియేటర్స్ కి రానుంది.
ఇక స్టార్ డమ్ పరంగా .. కథాపరంగా చూసుకుంటే, వచ్చే ఏడాది తమిళంలో విడుదల కానున్న భారీ చిత్రంగా ‘అన్నాత్తే’ కనిపిస్తోంది. రజనీ సినిమాలకి ఆయన స్టైలే ఆయుధం .. ఆయన క్రేజే భారీతనం. ఒకభారీ యాక్షన్ సీన్ కి పడే విజిల్స్ ఒకే ఒక్క డైలాగ్ తో పడేలా చేయగలగడం ఆయన ప్రత్యేకత. ఆయన కథానాయకుడిగా రూపొందుతున్న ఈ సినిమాకి ‘శివ’ దర్శకుడిగా వ్యవహరిస్తున్నాడు. ఆయన అజిత్ కి వరుస హిట్లు ఇచ్చి ఉన్న కారణంగా ఈ సినిమాపై భారీ అంచనాలు ఉన్నాయి. క్రేజ్ ఉన్న ఆర్టిస్టులు ఈ సినిమాకి అదనపు బలంగా మారనున్నారు. ఇదంతా చూస్తుంటే వచ్చే ఏడాదిలో ఇక్కడ ‘ఆచార్య’ .. అక్కడ ‘అన్నాత్తే’ కొత్త రికార్డులను సృష్టించడం ఖాయంగానే కనిపిస్తోంది.
