Kerala On High Alert After Zika Virus Outbreak In Addition To Corona :
ఓ వైపు కరోనా సెకండ్ వెవ్ పూర్తిగా తగ్గకండానే థర్డ్ వేవ్ భయపెడుతుండగా మరో కొత్త వైరస్ మానవాళిపై దాడి చేస్తోంది. కరోనా డెల్టాప్లస్ వైరస్‌తో పాటు యూపీలో కొత్తగా కప్పా వేరియంట్ కేసులు వెలుగు చూశాయి. ఈ వైరస్‌లకు తోడు కేరళలోని తిరువనంతపురంలో జికా వైరస్ మానవాళిపై దాడి చేస్తోంది.
ఏడెస్ అనే దోమ నుంచి..
జికా వైరస్ ఏడెస్ అనే దోమ నుంచి మనుషులకు సోకుతుంది. ప్రాణాంతకం కాకపోయినప్పటికీ ఇప్పటి వరకూ ఈ వైరస్‌కు వ్యాక్సిన్ గానీ, యాంటీవైరల్ చికిత్సగానీ అందుబాటులో లేదు. పగటి పూట దోమ కాటు లేకుండా చూసుకోవడమే జికా వైరస్ బారిన పడకుండా ఉండేందుకు సురక్షితమైన పద్ధతి. జికా వైరస్ కలకలంతో కేరళ రాష్ట్ర వైద్య ఆరోగ్య శాఖ అప్రమత్తమైంది. తిరువనంతపురం జిల్లాలో జికా వైరస్ కేసులను గుర్తించినట్లు కేరళ ఆరోగ్య శాఖ మంత్రి వీణా జార్జ్ ధ్రువీకరించారు. వైరస్ నియంత్రణకు చర్యలు చేపడుతున్నట్లు వెల్లడించారు. కేరళ ఆరోగ్య మంత్రి వీణా జార్జ్ మాట్లాడుతూ ఆరోగ్య శాఖ, జిల్లా అధికారులు ఈ సమస్యను తీవ్రంగా పరిగణిస్తున్నట్లు తెలిపారు. ఈడెస్ జాతుల దోమల నమూనాలను సేకరించి చర్యలు తీసుకున్నారు. ఇది దోమ కాటు ద్వారా ప్రజలకు వ్యాపిస్తోందని, దీనిపై అన్ని జిల్లాల అధికారులను అప్రమత్తం చేసినట్లు తెలిపారు.
జ్వరం,దద్దుర్లు
తిరువనంతపురం జిల్లా పరస్సలైన్ ప్రాంతానికి చెందిన గర్భిణి జూన్ 28న జ్వరం, తలనొప్పి, దద్దుర్లతో ఆస్పత్రిలో చేరారు. ఆమె శాంపిల్స్‌ను పుణెలోని ఎన్‌ఐవీకి పంపగా జికా వైరస్ సోకినట్టుగా నిర్ధారణ అయింది. జూలై 7వ తేదీన ఆ మహిళ బిడ్డకు జన్మనిచ్చింది. అయితే, ప్రస్తుతం మహిళ పరిస్థితి నిలకడగా ఉందని వైద్యులు తెలిపారు. వారం రోజుల క్రితం ఆమె తల్లికి కూడా ఇలాంటి లక్షణాలే కనిపించినట్టుగా ప్రభుత్వ వర్గాలు తెలిపాయి. బాధితురాలు స్థానికంగా ఉన్న ఓ ప్రైవేట్ ఆసుపత్రిలో చికిత్స పొందుతున్నారు.
15 పాజిటివ్ కేసులు
ఇదిలావుంటే, తిరువనంతపురం జిల్లాలో అనుమానంగా ఉన్న మరో 19 శాంపిల్స్ పరీక్షలకు పంపగా 15 కేసులు జికా పాజిటివ్‌గా నిర్థారణ అయ్యాయి. కోవిడ్ -19 సెకండ్ వేవ్‌తో పోరాడుతున్న కేరళ ఇప్పుడు దీనితో మరింత ఆందోళన చెందుతోంది. కొత్తగా వెలుగు చూసిన జికా వైరస్‌తో కేంద్ర ప్రభుత్వం అప్రమత్తమైంది. ఆరుగురు సభ్యుల బృందాన్ని రాష్ట్ర ప్రభుత్వానికి మద్దతుగా పంపినట్లు ఆరోగ్య శాఖ కార్యదర్శి లావ్ అగర్వాల్ శుక్రవారం తెలిపారు. 2016-17లో గుజరాత్‌లోను జికా వైరస్ కేసులు వెలుగు చూశాయి.
వ్యాధి లక్షణాలు..
పగటిపూట సంచరించే ఏడెస్ దోమల నుంచి ఈ వైరస్ వ్యాపిస్తుంది. వైరస్ సోకితే జ్వరం, దద్దుర్లు, కండ్లకలక, కండరాలు, కీళ్ల నొప్పులు, అనారోగ్యం, తలనొప్పి వంటి లక్షణాలు కనిపిస్తాయి. ఈ లక్షణాలు సాధారణంగా 2నుంచి 7 రోజులు ఉంటాయి. జికా వైరస్‌తో సాధారణంగా తీవ్రమైన ఆరోగ్య సమస్యలు ఉండవని, విశ్రాంతి తీసుకుంటే ఈ వ్యాధి పూర్తిగా నయమవుతుందని వైద్యులు అంటున్నారు. వైరస్ గర్భిణీ స్త్రీలకు సోకితే పుట్టే పిల్లలపై ప్రభావం చూపిస్తుందని, వారిలో అనేక లోపాలకు దారితీయవచ్చని తెలిపారు.
Kerala On High Alert After Zika Virus Outbreak In Addition To Corona :
తొలిసారి ఉగాండాలో..
జికా వైరస్ అనేది దోమల ద్వారా పుట్టుకొచ్చే ఫ్లేవివైరస్, దీనిని ఉగాండాలో 1947లో కోతుల్లో గుర్తించారు. ఆ తరువాత 1952లో ఉగాండాతో పాటు యునైటెడ్ రిపబ్లిక్ ఆఫ్ టాంజానియాలో మానవుల్లో గుర్తించారు. ఆఫ్రికా, అమెరికా, ఆసియా, పసిఫిక్ దేశాలలో జికా వైరస్ వ్యాప్తి చెందింది. దోమల ద్వారా వ్యాపించే ఈ వైరస్ వల్ల పిల్లల్లో మెదడు పరిమాణం తగ్గిపోవడంతో పాటు గిలన్‌బరె సిండ్రోమ్ అనే ఆటో ఇమ్యూన్(రోగ నిరోధక వ్యవస్థ శరీరంలోని కణాలపైనే దాడి చేయడం)వ్యాధి వచ్చే అవకాశమూ ఉంటుంది.
యూపీలో కరోనా ‘కప్పా’ వేరియంట్ కేసులు
కరోనా వైరస్‌లో ‘కప్పా’ వేరియంట్‌కు సంబంధించిన రెండు కేసులు ఉత్తర్‌ప్రదేశ్‌లో వెలుగు చూశాయి. లఖ్‌నవూలోని కింగ్‌ జార్జి వైద్య కళాశాలలో 109 నమూనాలకు సంబంధించి జన్యుక్రమాన్ని పరిశీలించగా రెండు నమూనాల్లో ఈ వేరియంట్ జాడ కనిపించిందన్నారు. మిగతా వాటిలో డెల్టా ప్లస్‌ ఉందని చెప్పారు. అయితే ఈ రెండు రకాలు రాష్ట్రానికి కొత్తేమీ కాదని, కప్పా రకంపై ఆందోళన అవసరంలేదని, చికిత్స ఉందని ఆరోగ్యశాఖ అదనపు ముఖ్య కార్యదర్శి అమిత్‌ మోహన్ ప్రసాద్‌ చెప్పారు.
‘బి.1.617.1’ అనే శాస్త్రీయ నామం కలిగిన కప్పా వేరియంట్ మొదట గత ఏడాది అక్టోబరులో భారత్‌లో వెలుగు చూసింది. దీన్ని ఇప్పటివరకూ ఆందోళనకర రకంగా ప్రపంచ ఆరోగ్య సంస్థ ప్రకటించలేదు. డెల్టా, కప్పా వేరియంట్లు బి.1.617 అనే తరగతికి చెందినవే. రెండూ భారత్‌లోనే మొదట వెలుగు చూశాయి.
Must Read ;- పిల్లులూ దాడి చేస్తాయ్ .. యాంటీ రబీస్ వ్యాక్సిన్ తీసుకోవడం శ్రేయస్కరం
