మంచు మోహన్ బాబు నటవారసుడిగా తెలుగు తెరకు మంచు విష్ణు పరిచయమయ్యాడు. తన పేరే టైటిల్ గా కలిగిన ‘విష్ణు’ సినిమాతో, 17 సంవత్సరాల క్రితం ఆయన ప్రేక్షకుల ముందుకు వచ్చాడు. అప్పటి నుంచి జయాపజయాలను సమానంగా స్వీకరిస్తూ, ఎక్కడా గ్యాప్ రాకుండా దూసుకెళుతున్నాడు. సీనియర్ స్టార్ హీరో తనయుడే అయినా, ఆరంభంలోనే అఖండ విజయాలు ఆయన తలుపుతట్టలేదు. పరాజయాలను లెక్కచేయకుండా పట్టుదలతో ఆయన ముందడుగు వేయడం వలన, ‘ఢీ’ సినిమాతో ఆయన ఖాతాలోకి ఒక భారీ విజయం చేరిపోయింది. శ్రీను వైట్ల దర్శకత్వం వహించిన ఈ సినిమా, హీరోగా విష్ణుకి తనపై తనకి మరింత నమ్మకాన్ని పెంచింది. అలాంటి విష్ణు పుట్టినరోజు .. ఈ రోజు.
‘ఢీ’ సినిమా వరకూ యాక్షన్ తో కూడిన ఎమోషనల్ సినిమాలు చేస్తూ వచ్చిన విష్ణుకి, తన సినిమాల్లో కామెడీ కూడా వుంటే బాగుంటుందనే ఆలోచన ‘ఢీ’ సినిమాతోనే కలిగింది. తన తండ్రి విలన్ రోల్స్ చేసినా .. హీరోగా చేసినా కామెడీని విడిచిపెట్టలేదనే విషయాన్ని ఆయన గ్రహించాడు. ఇక అప్పటి నుంచి యాక్షన్ కామెడీతో కూడిన కథలకి ఎక్కువ ప్రాధాన్యతనిచ్చాడు. ఈ నేపథ్యంలో ఆయన ఎమోషన్ కి అవకాశం ఇస్తూనే రొమాన్స్ కి కూడా ప్రాధాన్యత పెంచాడు. తన సినిమాలు యూత్ తో పాటు మాస్ ఆడియన్స్ ను అలరించేలా ఉండాలనే ఉద్దేశంతో అదే తరహా కథలను ఎంచుకుంటూ వెళ్లాడు.
అలా మంచు విష్ణు యాక్షన్ .. ఎమోషన్ .. రొమాన్స్ .. కామెడీకి ప్రాధాన్యతనిస్తూ వెళ్లడం ఆయనకి బాగానే కలిసొచ్చింది. ‘దేనికైనా రెడీ‘ .. ‘ఈడోరకం ఆడోరకం’ సినిమాలు ఆయనకి మంచి పేరును తెచ్చిపెట్టాయి. కామెడీని కూడా విష్ణు బాగా పండించగలడనే పేరు తెచ్చుకున్నాడు. ‘లక్కున్నోడు’ .. ‘ఆచారి అమెరికాయాత్ర’ వంటి సినిమాలు ఆశించినస్థాయిలో ఆడకపోయినా, నటన పరంగా విష్ణుకు మంచి మార్కులనే తెచ్చిపెట్టాయి. ఈ నేపథ్యంలోనే ఆయన మల్టీ స్టారర్ సినిమాలు చేయాలనే ముచ్చటను కూడా తీర్చుకున్నాడు. ఆయన తాజా చిత్రంగా ప్రేక్షకుల ముందుకు రావడానికి ‘మోసగాళ్లు‘ సిద్ధమవుతోంది. సొంత బ్యానర్ పై నిర్మిస్తున్న ఈ సినిమాలో ఆయన జోడీగా కాజల్ కనిపించనుంది.
మోహన్ బాబు కెరియర్ ను పరిశీలిస్తే, యాక్షన్ తో పాటు ఎమోషన్ కి .. కామెడీకి .. రొమాన్స్ కి ఎంతో ప్రాధాన్యతను ఇచ్చిన విషయం అర్థమవుతుంది. తన కథల్లోను వాటికి ప్రాధాన్యతనిస్తూ విష్ణు ముందుకు వెళుతున్నాడు. మోహన్ బాబు ఒకవైపున హీరోగా చేస్తూనే మరో వైపున నిర్మాతగాను వ్యవహరించారు. విష్ణు కూడా అదేబాటలో నడుస్తున్నాడు. తాజాగా విష్ణు హీరోగా ఆయన సొంత బ్యానర్లో మరో సినిమా నిర్మితం కానుంది. ఈ సినిమాకి శ్రీను వైట్ల దర్శకత్వం వహించనున్నట్టు తెలుస్తోంది. గతంలో ఈ ఇద్దరి కాంబినేషన్లో ‘ఢీ’ వచ్చిన సంగతి తెలిసిందే. ఈ పుట్టిన రోజున కొత్త ప్రాజెక్టును గురించిన మరిన్ని వివరాలను విష్ణు తెలియజేయనున్నాడు. ఈ రోజున పుట్టినరోజు జరుపుకుంటున్న విష్ణుకు ‘ది లియో న్యూస్’ టీమ్ శుభాకాంక్షలు అందజేస్తోంది.
Must Read ;-సంపాదకీయం : తిప్పి తిప్పి బాబు పాలసీకే వచ్చిన జగన్!
