అందుబాటు ధరల్లో అత్యాధునిక క్యాన్సర్ వైద్య చికిత్సను అందిస్తూ ప్రజల ఆదరాబిమానాలు పొందుతున్న హైదరాబాద్లోని బసవతారకం ఇండో అమెరికన్ క్యాన్సర్ హాస్పిటల్ అండ్ రీసెర్చ్ ఇన్ స్టిట్యూట్ నీతి ఆయోగ్ ప్రశంసలు అందుకుంది. ఇటీవలనే 22వ వసంతంలోకి అడుగిడిన BIACH & RI ఎప్పటి కప్పుడు నూతన సాంకేతికతను సమకూర్చుకుంటూ క్యాన్సర్ రోగులకు మెరుగైన వైద్యాన్ని అందిస్తోంది. లాభాపేక్ష లేకుండా పేద ప్రజలకు నిస్వార్థ వైద్య సేవలు అందిస్తున్న సంస్థగా BIACH & RI ను నీతి ఆయోగ్ తన నివేదికలో పేర్కొంది. దీనిపై ఈ సంస్థ ట్రస్టు బోర్డు ఛైర్మన్, ప్రముఖ సినీ నటుడు, హిందూపూర్ ఎమ్మెల్యే నందమూరి బాలకృష్ణ స్పందిస్తూ దేశ అత్యున్నత ప్రణాళిక వ్యవస్థ నీతి ఆయోగ్ తమ బసవతారకం క్యాన్సర్ ఆసుపత్రిని గుర్తించిందని చెప్పడానికి సంతోషిస్తున్నానని తెలిపారు. దేశంలో అత్యుత్తమ ప్రైవేటు ట్రస్ట్ ఆసుపత్రిగా నీతి ఆయోగ్ తమ BIACH & RIను పేర్కొందని వెల్లడించారు.
ఈ ఘనత అంతా దివంగత నందమూరి తారక రామారావుదే..
ఈ ఘనత అంతా తన తండ్రి దివంగత నందమూరి తారక రామారావుకే చెందుతుందని బాలయ్య వినమ్రంగా తెలిపారు. పేదలకు సముచిత ధరలో ప్రపంచస్థాయి క్యాన్సర్ చికిత్స అందాలన్న తన తండ్రి దార్శనికత వల్లే నేడు ఈ సంస్థకు గుర్తింపు లభించిందని వివరించారు. ట్రస్టు సభ్యులు, పెద్ద మనసు చూపుతున్న దాతలు, యాజమాన్యం, డాక్టర్లు, నర్సులు, సిబ్బంది తన తండ్రి ఆశయాన్ని నిజం చేస్తున్నారని కొనియాడారు. ఈ సందర్భంగా ప్రతి ఒక్కరికీ శుభాకాంక్షలు తెలుపుతున్నానని బాలయ్య పేర్కొన్నారు.
50 నుంచి 500 పడకలకు..
2000 సంవత్సరంలో 50 పడకలతో ప్రారంభమైన BIACH & RI నేడు 500 పడకలకు విస్తరించింది. ప్రస్తుతం అత్యాధునిక పరికరాలతో ఏడు విభాగాల్లో మెరుగైన క్యాన్సర్ చికిత్సలు అందిస్తోంది. ప్రవేటు ఆస్పత్రుల కంటే దాదాపు 20 శాతం తక్కువ ధరలకే క్యాన్సర్ చికిత్సలు అందిస్తోంది. అంతేకాకుండా క్రమం తప్పకుండా ఉచితంగా క్యాన్సర్ స్క్రీనింగ్ టెస్టులు చేస్తోంది. 15 ఏళ్లుగా దాదాపు 1,65,000 మంది ఉచితంగా క్యాన్సర్ స్క్రీనింగ్ టెస్టులు చేయించుకున్నారు. ఉభయ తెలుగు రాష్ట్రాల వారే కాకుండా దేశంలోని వివిధ రాష్ట్రాల నుంచి కూడ క్యాన్సర్ వైద్యానికి BIACH & RIను ఆశ్రయిస్తున్నారు.
హైదరాబాదులోని బసవతారకం ఇండో అమెరికన్ క్యాన్సర్ హాస్పిటల్ అండ్ రీసెర్చ్ ఇన్ స్టిట్యూట్తో పాటు పుట్టపర్తిలోని సత్యసాయి ఆసుపత్రులు లాభాపేక్ష చూసుకోవని, పేద ప్రజలకు నిస్వార్థ వైద్య సేవలు అందిస్తున్నాయని నీతి ఆయోగ్ తన నివేదికలో పేర్కొంది.
Must Read ;- అందుబాటు ధరల్లో అత్యాధునిక వైద్యం.. క్యాన్సర్ రోగుల పెన్నిధి BIACH & RI
